42 വര്‍ഷങ്ങള്‍ക്കു മുമ്പു ക്രൂരമായ ലൈംഗീക പീഡനത്തിനിരയായി അബോധാവസ്ഥയിലായിരുന്ന അരുണ ഷാന്‍ബാഗ്(65) അന്തരിച്ചു. മുംബൈയിലെ കെഇഎം ആശുപത്രിയില്‍ തിങ്കളാഴ്ച രാവിലെ 8:30നായിരുന്നു അന്ത്യം. കഴിഞ്ഞ കുറെ ദിവസങ്ങളായി അരുണയുടെ അവസ്ഥ ഗുരുതരമായി തുടരുകയായിരുന്നു. വെന്റിലേറ്ററിന്റെ സഹായത്തോടെയായിരുന്നു ജീവന്‍ നിലനിര്‍ത്തിയിരുന്നത്.
കര്‍ണാടകയിലെ ഹാല്‍ദിപുര്‍ സ്വദേശിനിയാണ് അരുണ. 1973 ല്‍ കിംഗ് എഡ്വേഡ് ആശുപത്രിയില്‍ നഴ്‌സായി ജോലി ചെയ്യവെയാണു അരുണ വാര്‍ഡ് ബോയിയുടെ ആക്രമണത്തിനിരയായത്. 1973 നവംബര്‍ 27നു വൈകുന്നേരം ജോലിയില്‍ പ്രവേശിക്കുന്നതിനായി എത്തിയ അരുണ ഡ്രസിംഗ് റൂമില്‍ സാരി മാറി യൂണിഫോം ധരിക്കുന്നതിനിടെയാണു വാര്‍ഡ് ബോയിയുടെ ആക്രമണത്തിനിരയായത്.
പട്ടിയെ കെട്ടുന്ന ചങ്ങലയില്‍ അരുണയെ കെട്ടിയട്ട ശേഷമാണു മാനംഭഗപ്പെടുത്തിയത്. മാനഭംഗത്തിനിടെ തലയ്ക്കു പരിക്കേല്‍ക്കുകയും തലച്ചോറിലേയ്ക്കുള്ള രക്തപ്രവാഹം നിലയ്ക്കുകയുമായിരുന്നു. അബോധാവസ്ഥയിലായ അരുണ ഇതേ ആശുപത്രിയില്‍ തന്നെ ചികിത്സയില്‍ കഴിയുകയായിരുന്നു.
പിങ്കി വിരാനി എന്ന മാധ്യമ പ്രവര്‍ത്തകയാണു അരുണയുടെ കഥ പുറംലോകത്തെയറിയിച്ചത്. അരുണയെ ദയാവധത്തിനു വിധേയയാക്കണമെന്ന വിരാനിയുടെ ഹര്‍ജി 2011 മാര്‍ച്ചില്‍ സുപ്രീംകോടതി തള്ളിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha