പ്രധാനമന്ത്രി നരേന്ദ്ര മോഡിയെ രൂക്ഷമായി വിമര്‍ശിച്ച് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി രംഗത്ത്. രാജ്യത്ത് ആത്മഹത്യ ചെയ്ത ഒരു കര്‍ഷകന്റെ വീടെങ്കിലും ലോകം മുഴുവന്‍ ചുറ്റുന്ന മോഡി സന്ദര്‍ശിച്ചിട്ടുണ്ടോയെന്ന് രാഹുല്‍ ചോദിച്ചു. അമേത്തിയില്‍ കര്‍ഷകരെ സന്ദര്‍ശിക്കാന്‍ എത്തിയതായിരുന്നു രാഹുല്‍.
അമേത്തിയിലെ ഫുഡ് പാര്‍ക്ക് പദ്ധതി ഉപേക്ഷിച്ച കേന്ദ്രസര്‍ക്കാര്‍ നടപടിയേയും രാഹുല്‍ വിമര്‍ശിച്ചു. ഒരുപാട് പേര്‍ക്ക് ഉപകാര പ്രദമാകുന്നതായിരുന്നു പദ്ധതി. എന്നാല്‍ പദ്ധതി മോഡി സര്‍ക്കാര്‍ ഉപേക്ഷിച്ചു. പദ്ധതി നടപ്പാക്കാന്‍ തനിക്ക് ആവുന്നതെല്ലാം ചെയ്യുമെന്നും രാഹുല്‍ പറഞ്ഞു.
രണ്ട് മാസത്തെ അജ്ഞാത വാസത്തിന് ശേഷം ഇന്ത്യയില്‍ തിരിച്ചെത്തിയ രാഹുല്‍ മോഡിക്കെതിരെ നിരന്തരം രംഗത്തെത്തിയിരുന്നു. കള്ളന്‍മാര്‍ പകല്‍ വെളിച്ചത്തില്‍ സ്യൂട്ട് ധരിച്ച് വരുമെന്നായിരുന്നു നേരത്തെ മോഡിയെക്കുറിച്ചുള്ള രാഹുലിന്റെ പരാമര്‍ശം. ഭൂമിയേറ്റെടുക്കല്‍ ബില്‍ കര്‍ഷക വിരുദ്ധമാണെന്നും രാഹുല്‍ ആരോപിച്ചു. മോഡിയുടെ വിദേശ സന്ദര്‍ശനങ്ങളേയും രാഹുല്‍ കുറ്റപ്പെടുത്തിയിരുന്നു. കഴിഞ്ഞ വര്‍ഷം നടന്ന പൊതുതെരഞ്ഞെടുപ്പില്‍ കോണ്‍ഗ്രസ്സിനേറ്റ തിരിച്ചടി മറികടക്കുകയെന്ന ലക്ഷ്യമിട്ട് രാഹുല്‍ ഇന്ത്യയെമ്പാടും സന്ദര്‍ശനം നടത്തിവരുകയാണ്.
തനിക്കെതിരെ ഉയരുന്ന വിമര്‍ശനങ്ങള്‍ക്കെതിരെ ചൈനീസ് സന്ദര്‍ശനത്തിനിടെ മോഡി രംഗത്ത് വന്നിരുന്നു. വിശ്രമമില്ലാതെ ജോലി ചെയ്യുന്നതിന് തന്നെ ചിലര്‍ വിമര്‍ശിക്കുകയാണ്. വിശ്രമിക്കാതെ ജോലി ചെയ്യുന്നത് കുറ്റമാണെങ്കില്‍ അത് ഇനിയും തുടരും. രാജ്യത്തെ 125 കോടി വരുന്ന ജനങ്ങള്‍ക്ക് വേണ്ടിയാണ് തന്റെ ഓരോ നിമിഷവുമെന്ന് മോഡി പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha