മോദി സര്ക്കാരിനെതിരെ ആഞ്ഞടിച്ച് ബാബാ രാംദേവ്
ബിജെപിയെ ഞെട്ടിച്ച് രാം ദേവ് സര്ക്കാരിനെതിരെ ആഞ്ഞടിച്ചു. നരേന്ദ്ര മോദി സര്ക്കാര് ഒന്നാം വാര്ഷികാഘോഷത്തിന് ഒരുങ്ങവെ, ബിജെപിയെ ഞെട്ടിച്ചു യോഗ ഗുരു രാംദേവിന്റെ പരസ്യ വിമര്ശനം.
കര്ഷകരെ ബാധിക്കുന്ന ഭൂമി ഏറ്റെടുക്കല് ബില്ലിന്റെ കാര്യത്തില് മോദി സര്ക്കാര് വേണ്ടത്ര ഗൗരവം കാട്ടിയില്ലെന്നു രാംദേവ് തുറന്നടിച്ചു.കേന്ദ്ര സര്ക്കാരിനെയും മന്ത്രിമാരെയും കുറ്റപ്പെടുത്തിയതിനൊപ്പം രാംദേവ് കോണ്ഗ്രസ് ഉപാധ്യക്ഷന് രാഹുല് ഗാന്ധിയെ പ്രശംസിച്ചതു ബിജെപി നേതൃത്വത്തിന് അപ്രതീക്ഷിത അടിയായി. വിമത ത്രിമൂര്ത്തികളായ സുബ്രഹ്മണ്യന് സ്വാമി, അരുണ് ഷൂറി, റാം ജഠ്മലാനി എന്നിവര് സര്ക്കാരിനെ വിമര്ശിച്ചതിനു പിന്നാലെയാണ് രാംദേവും രംഗത്തിറങ്ങിയത്.
ഭൂമി ഏറ്റെടുക്കല് കാര്യത്തില് ഓര്ഡിനന്സുമായി എടുത്തുചാടി തീരുമാനമെടുത്തത് ഉചിതമായില്ല. അധികാരത്തിലെത്തിയതോടെ കേന്ദ്രമന്ത്രിമാര് അഹങ്കാരികളായെന്നും രാംദേവ് കുറ്റപ്പെടുത്തി. മന്ത്രിമാരായ ഉടന് പലരും മൊബൈല് ഫോണ് നമ്പര് മാറ്റി. ജനങ്ങളുടെ പ്രശ്നങ്ങള് അറിയാനും പരിഹരിക്കാനും മന്ത്രിമാര് താല്പര്യം കാണിക്കണമെന്നും രാംദേവ് പറഞ്ഞു.
ലോക്സഭാ തിരഞ്ഞെടുപ്പു പരാജയത്തിനു ശേഷം നിര്ജീവമായിരുന്ന കോണ്ഗ്രസിനു രാഹുല് ഗാന്ധി പുതുജീവന് നല്കിയെന്നും രാംദേവ് പ്രശംസിച്ചു.പ്രധാനമന്ത്രി നരേന്ദ്ര മോദിയെ പൊതുവേദികളില് പ്രകീര്ത്തിച്ചിരുന്ന രാംദേവിന്റെ പരസ്യ വിമര്ശനം പാര്ട്ടി അണികളില് ആശയക്കുഴപ്പം സൃഷ്ടിക്കുമെന്ന ആശങ്കയിലാണ് ബിജെപി നേതൃത്വം. ലോക്സഭാ തിരഞ്ഞെടുപ്പു വേളയില് മോദിയെ പിന്തുണച്ചു രാംദേവ് സജീവമായി രംഗത്തുണ്ടായിരുന്നു. ബിഹാറില് നിയമസഭാ തിരഞ്ഞെടുപ്പ് ഈ വര്ഷം നടക്കാനിരിക്കെ യാദവ സമുദായത്തില് നിര്ണായക സ്വാധീനമുള്ള രാംദേവ് ഇടഞ്ഞത് ബിജെപിക്കു തിരിച്ചടിയാകും.
ലോക്സഭാ തിരഞ്ഞെടുപ്പില് യുപി, ബിഹാര് സംസ്ഥാനങ്ങളിലെ യാദവ സമുദായത്തെ ബിജെപിക്ക് അനുകൂലമാക്കുന്നതില് രാംദേവിന്റെ നിലപാടുകള് സഹായിച്ചിരുന്നു. യുപിഎ ഭരണകാലത്തു വിദേശ ബാങ്കുകളിലെ കള്ളപ്പണം പിടിച്ചെടുക്കണമെന്ന ആവശ്യവുമായി പ്രചാരണം നടത്തിയ രാംദേവ് എന്ഡിഎ സര്ക്കാര് സ്വീകരിച്ച നടപടികളില് തൃപ്തനല്ലെന്നും സൂചനയുണ്ട്. കള്ളപ്പണ വിഷയത്തില് രാംദേവിനൊപ്പമുണ്ടായിരുന്ന മുതിര്ന്ന അഭിഭാഷകന് റാം ജഠ്മലാനി അടുത്തിടെ കേന്ദ്ര സര്ക്കാരിനെതിരെ രൂക്ഷ വിമര്ശനം നടത്തിയിരുന്നു.
ബിജെപിയുടെ തിരഞ്ഞെടുപ്പു പ്രകടന പത്രികയിലുണ്ടായിരുന്ന ഹിന്ദുത്വ അജന്ഡ നടപ്പാക്കാന് വൈകുന്നതില് പാര്ട്ടി ദേശീയ നിര്വാഹക സമിതി അംഗമായ സുബ്രഹ്മണ്യന് സ്വാമിയും നേതൃത്വത്തിനെതിരെ തിരിഞ്ഞിട്ടുണ്ട്. ഇക്കാര്യം ചര്ച്ച ചെയ്യാന് പാര്ട്ടി ദേശീയ നിര്വാഹക സമിതിയുടെ പ്രത്യേക യോഗം വിളിക്കണമെന്നു സുബ്രഹ്മണ്യന് സ്വാമി പാര്ട്ടി അധ്യക്ഷന് അമിത് ഷായോട് ആവശ്യപ്പെട്ടിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
