പേരെടുക്കാന്‍ വേണ്ടി മോഡികാണിക്കുന്നത് വെറും ചെപ്പടിവിദ്യകളാണെന്ന് ശിവസേന. വിദേശ സന്ദര്‍ശനത്തിനിടെ മംഗോളിയക്ക് നൂറ് കോടി രൂപയുടെ ധനസഹായം പ്രഖ്യാപിച്ച പ്രധാനമന്ത്രി നരേന്ദ്ര മോദിയുടെ നടപടിയെ രൂക്ഷമായി വിമര്‍ശിച്ച് ഭരണത്തിലെ സഖ്യകക്ഷിയായ ശിവസേന രംഗത്തെത്തി. പാര്‍ട്ടിയുടെ മുഖപത്രമായ സാമ്‌നയിലൂടെയാണ് ശിവസേന മോദിയെ വിമര്‍ശിച്ച് രംഗത്തെത്തിയത്. കര്‍ഷകരുടെ വിഷയത്തെ ചൂണ്ടിയാണ് മോദിയെ വിമര്‍ശിച്ച് ശിവസേന രംഗത്തെത്തിയത് എന്നതിനാല്‍ വിഷയം കോണ്‍ഗ്രസിനുമുള്ള പിടിവള്ളിയായി. മഹാരാഷ്ട്രയില്‍ കൃഷിനാശം മൂലം കര്‍ഷകര്‍ കൂട്ട ആത്മഹത്യ ചെയ്യുമ്പോള്‍ പ്രധാനമന്ത്രി അവരെ സഹായിക്കാതെ മംഗോളിയയ്ക്ക് വന്‍ തുക സഹായം നല്‍കുകയാണെന്ന് ശിവസേന ആരോപിച്ചു. ഇത്രയും പണമുണ്ടെങ്കില്‍ കര്‍ഷകരുടെ കണ്ണീരൊപ്പാമായിരുന്നെന്നും ശിവസേന വിമര്‍ശിച്ചു.
മംഗോളിയയോട് കാണിച്ച മഹാമനസ്‌കത പ്രധാനമന്ത്രി മഹാരാഷ്ട്രയിലെ കര്‍ഷകരോടും ജൈതാപൂര്‍ ആണവ നിലയം കാരണം കുടിയൊഴിപ്പിക്കപ്പെട്ട കൊങ്കണ്‍ പ്രദേശവാസികളോടും കാണിക്കണം. കര്‍ഷകരുടെ പ്രശ്‌നത്തില്‍ കേന്ദ്രം ഉടന്‍ പരിഹാരം കാണണമെന്നും ശിവസേന കേന്ദ്ര സര്‍ക്കാരിനോട് ആവശ്യപ്പെട്ടു.
മഴക്കെടുതിയും വരള്‍ച്ചയും മൂലം കൃഷി നശിച്ച കര്‍ഷകര്‍ സര്‍ക്കാരില്‍ നിന്നുള്ള സഹായവും കാത്ത് കഴിയുകയാണ്. മംഗോളിയയിലെ ജനങ്ങള്‍ മഹാരാഷ്ടരയിലെ ജനങ്ങളെക്കാള്‍ വരുമാനമുള്ളവരാണെന്നും മുഖപ്രസംഗം ചൂണ്ടിക്കാട്ടുന്നു. മംഗോളിയയുടെ അടിസ്ഥാന സൗകര്യ വികസനത്തിന് 100 കോടി ഡോളര്‍ (6380 കോടി രൂപ) നല്‍കുമെന്ന് മംഗോളിയ സന്ദര്‍ശനത്തിനിടെ മോദി പ്രഖ്യാപിച്ചിരുന്നു. തന്റെ മൂന്ന് ദിവസത്തെ വിദേശ പര്യടനത്തിന്റെ ഭാഗമായി രണ്ടാം ദിവസമാണ് മോദി മംഗോളിയ സന്ദര്‍ശിച്ചത്.
വിദേശരാജ്യങ്ങള്‍ ചുറ്റിക്കറങ്ങിയുള്ള പ്രധാനമന്ത്രിയുടെ നീക്കത്തില്‍ പ്രതിപക്ഷത്തു നിന്നും സ്വന്തം പാര്‍ട്ടിയില്‍ നിന്നും വിമര്‍ശനം ഉയരുന്ന പശ്ചാത്തലത്തിലാണ് ശിവസേനയും വിമര്‍ശനവുമായി രംഗത്തെത്തിയത്. കേന്ദ്രസര്‍ക്കാര്‍ ഒന്നാം വര്‍ഷത്തിലേക്ക് കടക്കുമ്പോള്‍ അതിശക്തമായ പ്രതിഷേധം ഉയര്‍ത്താനാണ് കോണ്‍ഗ്രസിന്റെയും പരിപാടി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha