രാഹുല്‍ ഗാന്ധി പാര്‍ട്ടി അധ്യക്ഷ പദവി ഏറ്റെടുക്കുന്നതിനെക്കുറിച്ചു കോണ്‍ഗ്രസില്‍ വീണ്ടും ചര്‍ച്ച സജീവമായി. ഈ വര്‍ഷം തന്നെ രാഹുല്‍ പദവിയേല്‍ക്കുമെന്നു മുന്‍ മന്ത്രിയും പാര്‍ട്ടി തന്ത്രജ്ഞനുമായ ജയറാം രമേശ് പ്രതീക്ഷ പ്രകടിപ്പിച്ചു. പാര്‍ട്ടി അണികളുടെ പൊതു വികാരമാണിതെന്നായിരുന്നു വക്താവ് ജ്യോതിരാദിത്യ സിന്ധ്യയുടെ പ്രതികരണം.

അവധി കഴിഞ്ഞു തിരിച്ചെത്തിയ രാഹുല്‍ പാര്‍ട്ടിയിലുണ്ടാക്കിയ പുത്തനുണര്‍വിലേക്കു കൂടിയാണ് ചര്‍ച്ചകള്‍ വിരല്‍ ചൂണ്ടുന്നത്. ഏതാനും ദിവസം മുന്‍പുവരെ രാഹുലിന്റെ നേതൃഗുണങ്ങളെക്കുറിച്ചു ചോദ്യമുയര്‍ത്തിയിരുന്ന മുന്‍ മുഖ്യമന്ത്രി ഷീലാ ദീക്ഷിതും പുത്രന്‍ സന്ദീപ് ദീക്ഷിതും ഉള്‍പ്പെടെയുള്ളവര്‍ ഇപ്പോള്‍ നിശ്ശബ്ദത പാലിക്കുന്നു.

രാഹുല്‍ ഈ വര്‍ഷം തന്നെ പാര്‍ട്ടി അധ്യക്ഷനാകുമെന്നു പ്രതീക്ഷിക്കുന്നുവെന്നായിരുന്നു ജയറാം രമേശ് ഹൈദരാബാദില്‍ നടത്തിയ അഭിപ്രായപ്രകടനം. ജവാഹര്‍ലാല്‍ നെഹ്‌റുവിന്റെ കാലത്തു കാമരാജ്, പ്രതാപ് സിങ് കയ്‌റോണ്‍, വൈ.ബി. ചവാന്‍, ബി.സി. റോയ്, ജി.ബി. പന്ത് തുടങ്ങിയ നേതാക്കളുണ്ടായിരുന്നതു പോലെ, നേതൃദാരിദ്ര്യമില്ലാത്ത സ്ഥിതി വീണ്ടും ഉണ്ടാവണം. സംസ്ഥാനങ്ങളില്‍ പുതു നേതൃനിര സൃഷ്ടിക്കാനുള്ള ശ്രമത്തിലാണു രാഹുല്‍. പാര്‍ട്ടിക്കു പൊതു തിരഞ്ഞെടുപ്പു മാത്രം ജയിച്ചാല്‍ പോരാ, സംസ്ഥാന തിരഞ്ഞെടുപ്പുകളും ജയിക്കണമെന്ന് ജയറാം പറഞ്ഞു.

രാഹുല്‍ എത്രയും പെട്ടെന്നു പാര്‍ട്ടിയുടെ നേതൃത്വമേല്‍ക്കണമെന്നാണു പ്രവര്‍ത്തകരുടെ ആഗ്രഹമെന്ന് ജ്യോതിരാദിത്യ പ്രതികരിച്ചു. എന്നാല്‍, അന്തിമ തീരുമാനമെടുക്കേണ്ടതു രാഹുല്‍തന്നെയാണെന്ന് അദ്ദേഹം ഓര്‍മിപ്പിച്ചു. അടുത്തുതന്നെ ചേരുന്ന പ്രവര്‍ത്തകസമിതി യോഗം രാഹുലിനെ അധ്യക്ഷനാക്കാന്‍ നിര്‍ദേശിക്കാനും അതിനു പിന്നാലെ പ്രത്യേക എഐസിസി സമ്മേളനം ചേര്‍ന്ന് ഇക്കാര്യം ശരിവയ്ക്കാനും വരെ സാധ്യത നിലനില്‍ക്കുന്നു. യഥാര്‍ഥത്തില്‍, രാഹുല്‍ ഈ വര്‍ഷം പാര്‍ട്ടി അധ്യക്ഷനാകുമെന്നത് കോണ്‍ഗ്രസില്‍ ഇപ്പോള്‍ തര്‍ക്കവിഷയമല്ല. അത് എത്ര പെട്ടെന്നുണ്ടാകും എന്നതാണു ചോദ്യം.

അധ്യക്ഷനാകാന്‍ മടിയില്ലെന്നു രാഹുല്‍ അടുപ്പക്കാരോടു സൂചിപ്പിച്ചിട്ടുണ്ട്. എന്നാല്‍, സംഘടനാ തിരഞ്ഞെടുപ്പു പ്രക്രിയയ്ക്കു തുടക്കമായിരിക്കെ ഡിസംബറിനു മുന്‍പ് അധികാരമേല്‍ക്കണോ എന്നു തീരുമാനിക്കേണ്ടതു രാഹുല്‍തന്നെ. തിരഞ്ഞെടുപ്പു പ്രക്രിയയ്‌ക്കൊടുവില്‍, ഡിസംബറില്‍ നടക്കുന്ന പ്ലിനറിയാണ് പാര്‍ട്ടി മേധാവിയെ തിരഞ്ഞെടുക്കേണ്ടത്. സംഘടനാ തിരഞ്ഞെടുപ്പു നടത്തി പാര്‍ട്ടിയുടെ ഊര്‍ജസ്വലത വീണ്ടെടുക്കണമെന്ന നിലപാടു പലവട്ടം പരസ്യപ്പെടുത്തിയിട്ടുള്ള രാഹുല്‍ അതിനു മുന്‍പ് അധ്യക്ഷ പദവിയേല്‍ക്കാന്‍ സന്നദ്ധനായാല്‍ അതു ചെറുകിട അദ്ഭുതമാകും.

ഇന്ത്യക്കാരനെന്ന നിലയില്‍ താന്‍ അഭിമാനിക്കുന്നുവെന്നു  രാഹുല്‍ ഗാന്ധി. ഇന്ത്യക്കാരനായതിന്റെ പേരില്‍ ലജ്ജിക്കുന്ന കാലമുണ്ടായിരുന്നെന്നു പ്രധാനമന്ത്രി നരേന്ദ്ര മോദി വിദേശത്തു നടത്തിയ പ്രസ്താവന വിവാദമുയര്‍ത്തിയ സാഹചര്യത്തിലാണു അമേഠിയില്‍ ത്രിദിന സന്ദര്‍ശനം പൂര്‍ത്തിയാക്കി തലസ്ഥാനത്തേക്കു മടങ്ങുംവഴി രാഹുലിന്റെ അഭിപ്രായപ്രകടനം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക