ഗോവധ നിരോധന കാര്യത്തില്‍ തീവ്ര നിലപാടുമായി കേന്ദ്രമന്ത്രി. മഹാരാഷ്ട്രയിലെയും ഹരിയാനയിലെയും ബീഫ് നിരോധനം മൂലം കുടുംബം പട്ടിണിയില്‍ ആയത് ആയിരക്കണക്കിന് വരുന്ന മുസ്ലിംകുടുംബങ്ങളാണ്. ഈ മേഖലയില്‍ ജോലി ചെയ്തിരുന്നവര്‍ക്ക് തൊഴില്‍ നഷ്ടമാകുകയും ചെയ്തു. ഇങ്ങനെ സ്വസമുദായത്തിലെ ആയിരങ്ങള്‍ പട്ടിണിയില്‍ ആയപ്പോഴും കടുത്ത സംഘപരിവാര്‍ നേതാക്കളെ പോലും തോല്‍പ്പിക്കുന്ന നിലപാടുമായി കേന്ദ്രമന്ത്രിസഭയിലെ മുസ്ലിം സമുദായംഗമായ മുക്താര്‍ അബ്ബാസ് നഖ്വി രംഗത്തെത്തി.
ബീഫ് കഴിക്കണമെന്നുള്ളവര്‍ പാക്കിസ്ഥാനിലേക്ക് പോകണമെന്നാണ് പാര്‍ലമെന്ററികാര്യ സഹമന്ത്രി കൂടായിയ മുക്താര്‍ അബ്ബാസ് നഖ്‌വി പറഞ്ഞത്. ഗോവധ നിരോധനത്തെ ന്യായീകരിച്ച അദ്ദേഹം, ഇത് ലാഭത്തിന്റെയോ നഷ്ടത്തിന്റെയോ വിഷയമല്ലെന്നും വിശ്വാസത്തിന്റെ പ്രശ്‌നമാണെന്നും പറഞ്ഞു. ഹിന്ദു വിശ്വാസികളുടെ വൈകാരിക വിഷയമാണ് ഇതെന്നായിരുന്നു നഖ്‌വിയുടെ അഭിപ്രായം. ഒരു ദേശീയ ടെലിവിഷനു നല്‍കിയ അഭിമുഖത്തിലാണ് നഖ്‌വി വിവാദ പരാമര്‍ശം നടത്തിയത്.
ബീഫ് കഴിക്കാതെ ജീവിക്കാന്‍ കഴിയാത്തവര്‍ക്ക് പാക്കിസ്ഥാനിലേക്കോ അറബ് രാജ്യങ്ങളിലേക്കോ പോകാം. അല്ലെങ്കില്‍ ബിഫ് ലഭിക്കുന്ന ഏതു സ്ഥലത്തേയ്ക്കു വേണമെങ്കിലും പോകാം. മുസ്‌ലിമുകള്‍ പോലും ഇതിനെതിരാണെന്നും നഖ്‌വി കൂട്ടിച്ചേര്‍ത്തു. ഗോവ, ജമ്മു കശ്മീര്‍, കേരളം പോലെ ബീഫ് അധികം കഴിക്കുന്നവരുള്ള സ്ഥലങ്ങളില്‍ ബീഫ് നിരോധിക്കുന്നത് എങ്ങനെയാണെന്ന എഐഎംഐഎം പ്രസിഡന്റ് അസദ്ദീന്‍ ഒവൈസിയുടെ പ്രസ്താവനയോട് പ്രതികരിക്കുകയായിരുന്നു അദ്ദേഹം.
അതേസമയം മുഖ്താര്‍ അബ്ബാസ് നഖ്വിയുടെ പ്രസ്താവന വിവാദത്തില്‍ ആയിട്ടുണ്ട്. പാക്കിസ്ഥാനിലേക്ക് പോകണമെന്ന വിധത്തിലുള്ള പ്രസ്താവന അംഗീകരിക്കാന്‍ സാധിക്കില്ലെന്നാണ് കോണ്‍ഗ്രസ് നേതാക്കളുടെ പക്ഷം. എന്നാല്‍ രാജ്യവ്യാപകമായി ഗോവധ നിരോധനം നടപ്പിലാക്കുമെന്ന നിലപാടിലാണ് സംഘപരിവാര്‍ നേതൃത്വവും സര്‍ക്കാറും. ഗോവധ നിരോധനം വ്യാപകമാക്കുമെന്ന് ആഭ്യന്തര മന്ത്രി രാജ്‌നാഥ് സിംഗും നേരത്തെ വ്യക്തമാക്കിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha