നിര്‍ണായകമായ കേന്ദ്ര ബജറ്റ് ഇന്ന്. ധനമന്ത്രി നിര്‍മല സീതാരാമന്‍ രാവിലെ 11ന് പുതിയ സാമ്പത്തികവര്‍ഷത്തേക്കുള്ള ബജറ്റ് പാര്‍ലമെന്റില്‍ അവതരിപ്പിക്കും. കോവിഡ്കാല പ്രതിസന്ധികള്‍ക്കിടയില്‍ ആരോഗ്യമേഖലക്ക് കൂടിയ വിഹിതം നീക്കിവെക്കുന്ന പ്രഖ്യാപനം ബജറ്റില്‍ ഉണ്ടാകുമെന്നാണ് പ്രതീക്ഷകള്‍്.

ആരോഗ്യത്തിനു പുറമെ അടിസ്ഥാനസൗകര്യ വികസനം, തൊഴിലവസരങ്ങള്‍, പ്രതിരോധം എന്നിവക്കാണ് ഊന്നല്‍. വൈദ്യുതിവിതരണ ശൃംഖലയില്‍ അടക്കം പുതിയ മാറ്റങ്ങള്‍ കൊണ്ടുവരും. പതിറ്റാണ്ടുകള്‍ക്കിടയില്‍ കാണാത്ത വലിയ സാമ്പത്തിക തകര്‍ച്ച രാജ്യം നേരിടുന്ന ഘട്ടത്തിലാണ് മോദിസര്‍ക്കാറിന്റെ ഒമ്പതാമത്തെ ബജറ്റ് പാര്‍ലമെന്റില്‍ വെക്കുന്നത്.

തകര്‍ന്ന മേഖലകളെ പുനരുദ്ധരിക്കുന്നതിനും ദുര്‍ബല വിഭാഗങ്ങള്‍ക്കും സംരംഭങ്ങള്‍ക്കും കൈത്താങ്ങ് നല്‍കുന്നതിനുമുള്ള സര്‍ക്കാര്‍ നിര്‍ദേശങ്ങളിലേക്കാണ് ജനം ഉറ്റുനോക്കുന്നത്. അതേസമയം, വിഭവസമാഹരണം വര്‍ധിപ്പിക്കുന്നതിന് ഊന്നല്‍ നല്‍കുന്ന സര്‍ക്കാര്‍, അതിനുള്ള വഴിയായി പുതിയ പരിഷ്‌കരണ നിര്‍ദേശങ്ങള്‍ മുന്നോട്ടുവെക്കുമെന്നാണ് സൂചന. പ്രതിസന്ധികാലത്തെ സാമ്പത്തിക വാക്‌സിന്‍ എന്ന നിലയിലാണ് ഇക്കുറി ബജറ്റിന്റെ പ്രാധാന്യം.

പതിവു ബജറ്റുകളില്‍നിന്ന് ഭിന്നമായിരിക്കും ഇത്തവണ ബജറ്റെന്ന് ധനമന്ത്രി നിര്‍മല സീതാരാമന്‍ നേരത്തേ വ്യക്തമാക്കിയിരുന്നു. നടപടികള്‍ക്ക് വ്യവസായലോകത്തിന്റെയും സാധാരണക്കാരുടെയും വിശ്വാസം നേടുകയെന്ന വെല്ലുവിളിയാണ് സര്‍ക്കാറിനു മുന്നിലുള്ളത്.

പാര്‍ലമെന്റ് ബജറ്റ് സമ്മേളനത്തിന്റെ ആദ്യപാദം നിശ്ചയിച്ചതിനേക്കാള്‍ രണ്ടു ദിവസം നേരത്തേ പിരിഞ്ഞേക്കും. ഈ മാസം 15 വരെയാണ് ആദ്യഘട്ട സമ്മേളനം നിശ്ചയിച്ചിരുന്നത്.എന്നാല്‍, ഇത് 13 വരെയാക്കാനാണ് ചര്‍ച്ചകള്‍ നടക്കുന്നത്. രണ്ടാം പാദം മാര്‍ച്ച് എട്ടു മുതല്‍ ഏപ്രില്‍ എട്ടു വരെയാണ്. രാജ്യസഭാധ്യക്ഷന്‍ വിളിച്ച സര്‍വകക്ഷി യോഗത്തിലാണ് തീയതിമാറ്റത്തെക്കുറിച്ച സൂചന.

ഇത്തവണ ബജറ്റ് രേഖകള്‍ കടലാസില്‍ ലഭ്യമല്ല; സ്‌ക്രീനില്‍ മാത്രം. കോവിഡ്കാല സാമൂഹിക ജാഗ്രതകളുടെ ഭാഗമായി ബജറ്റുമായി ബന്ധപ്പെട്ടതൊന്നും അച്ചടിക്കേണ്ടതില്ലെന്ന് സര്‍ക്കാര്‍ തീരുമാനിച്ചു.പകരം ഇ- ബജറ്റായാണ് ലഭ്യമാക്കുന്നത്. എം.പിമാര്‍ അടക്കം ബജറ്റ് ഇന്റര്‍നെറ്റില്‍നിന്ന് ഡൗണ്‍ലോഡ് ചെയ്യണം. കമ്പ്യൂട്ടറിലും മൊബൈല്‍ ഫോണിലും ഇങ്ങനെ ഡൗണ്‍ലോഡ് ചെയ്യാവുന്ന ക്രമീകരണം കാലത്തിനൊത്ത മാറ്റമാണെന്ന് സര്‍ക്കാര്‍ പറയുന്നു.