കിലോയ്ക്ക് വെറും ഒരു രൂപ വിലയിട്ടതില്‍ പ്രതിഷേധിച്ച് 10 ക്വിന്റലല്‍ കോളിഫഌര്‍ റോഡില്‍ ഉപേക്ഷിച്ച് കര്‍ഷകന്‍. ഉത്തര്‍പ്രദേശിലെ പിലിബിതിലാണ് സംഭവം നടന്നത്. ലൈസന്‍സുള്ള വ്യാപാരികള്‍ വളരെ തുച്ഛമായ വില പറഞ്ഞതില്‍ അരിശം പൂണ്ട കര്‍ഷകര്‍, ആവശ്യക്കാര്‍ കാശില്ലാതെ തന്നെ കൊണ്ടു പോയിക്കോട്ടെ എന്നും പ്രഖ്യാപിച്ചാണ് പച്ചക്കറി റോട്ടിലെറിഞ്ഞത്. പിലിബിത്തിലെ ജഹാനാബാദുകാരനായ മുഹമ്മദ് സലീം എന്ന കര്‍ഷകന്‍ പറയുന്നത് അഗ്രികള്‍ച്ചറല്‍ പ്രൊഡ്യൂസ് മാര്‍ക്കറ്റ് കമ്മിറ്റി വ്യാപാരികള്‍ പറഞ്ഞ തുക വണ്ടി കൂലിക്കു പോലും തികയില്ല എന്നാണ്. ഒരു ഏക്കര്‍ ഭൂമിയില്‍ കൃഷിയിറിക്കിയിരുന്നു, കൂടാതെ, വളം, ജലസേചനം, വിത്ത് തുടങ്ങിയ കാര്യങ്ങളള്‍ക്കായി 8,000 ത്തോളം രൂപം അധികം ചെലവഴിച്ചിട്ടുണ്ടെന്ന് സലീം പറയുന്നു. കൊയ്ത്തിനും മറ്റു ഗതാഗത ആവശ്യങ്ങള്‍ക്കുമായി 4,000 രൂപ വേറെയും ചെലവാക്കി. നിലവില്‍, മാര്‍ക്കറ്റില്‍ ഒരു കിലോ ക്വാളിഫ്‌ലവറിന് 12 മൂതല്‍ 14 രൂപ വരെ വില വരുന്നതിനാല്‍ എട്ടു രൂപയെങ്കിലും പ്രതീക്ഷിച്ചിരുന്നതായി സലീം പറയുന്നു. ക്വാളിഫ്‌ലവര്‍ വീട്ടിലേക്ക് തിരിച്ചു കൊണ്ടുവരാനുള്ള വണ്ടി കാശ് ഇല്ലാത്തതു കൊണ്ടാണ് അവ റോഡില്‍ ഉപേക്ഷിച്ചതെന്നും സലീം ഒരു ദേശീയ മാധ്യമത്തോടു പറഞ്ഞു. തനിക്ക് വേറെ മാര്‍ഗമില്ലെന്നാണ് സലിം പറയുന്നത്. അടുത്ത തവണ കൃഷി ഇറക്കാനുള്ള മുടക്കുമുതല്‍ പോലും ഇത്തവണ കിട്ടിയില്ല. വന്‍ തുക സ്വകാര്യ ബാങ്കില്‍ നിന്നും ലോണ്‍ എടുത്തിട്ടുണ്ട്. സാധാരണ ബാങ്കുകള്‍ കര്‍ഷകര്‍ക്ക് ലോണുകള്‍ നല്‍കാന്‍ വിസമ്മതിച്ചതായും സലീം പറയുന്നു. പ്രായമായ അമ്മയും ഭാര്യയും സ്‌കൂള്‍ വിദ്യാര്‍ത്ഥികളായ രണ്ട് പെണ്‍കുട്ടികളും ഇളയ സഹോദരനും അടങ്ങുന്നതാണ് സലീമിന്റെ കുടുംബം. കുടുംബം പുലര്‍ത്താന്‍ താനും സോഹദരനും ഇനി കൂലിപ്പണിക്ക് പോകേണ്ട അവസ്ഥയിലാണെന്നും സലിം പറയുന്നു.