ഒരു പ്രചാരവേലയ്ക്കും ഇന്ത്യയുടെ ഐക്യത്തെ നശിപ്പിക്കാന്‍ കഴിയില്ല.... കാര്‍ഷിക നിയമങ്ങള്‍ക്കെതിരേ നടക്കുന്ന കര്‍ഷക പ്രക്ഷോഭത്തിന് ലഭിക്കുന്ന അന്തര്‍ദേശീയ പിന്തുണയെ അപലപിച്ച് കേന്ദ്ര ആഭ്യന്തരമന്ത്രി അമിത് ഷായും രംഗത്ത്.

ഒരു പ്രചരണങ്ങള്‍ക്കും ഇന്ത്യ പുതിയ ഉയരത്തില്‍ എത്തുന്നതില്‍നിന്നും തടയാനാവില്ല. 'പുരോഗതി'ക്ക് മാത്രമേ ഇന്ത്യയുടെ വിധി നിര്‍ണയിക്കാന്‍ സാധിക്കൂ. പ്രചരണങ്ങള്‍ക്ക് ഇന്ത്യയുടെ വിധിയെ നിര്‍ണയിക്കാന്‍ കഴിയില്ല. പുരോഗതിക്കു മാത്രമാണ് അത് സാധ്യമാവുക. പുരോഗതി കൈവരിക്കുന്നതിനായി ഇന്ത്യ ഒറ്റക്കെട്ടായി നില്‍ക്കുന്നെന്നും ഷാ ട്വീറ്റില്‍ പറഞ്ഞു.

കര്‍ഷക സമരത്തിന് പിന്തുണ പ്രഖ്യാപിച്ചുകൊണ്ട് പ്രമുഖര്‍ നടത്തിയ പ്രതികരണങ്ങള്‍ കൃത്യതയില്ലാത്തതും ഉത്തരവാദിത്വരഹിതവുമാണെന്ന് ചൂണ്ടിക്കാട്ടി വിദേശകാര്യ മന്ത്രാലയം നേരത്തെ പ്രസ്താവനയിറക്കിയിരുന്നു.

നിക്ഷിപ്ത താത്പര്യക്കാരായ ചിലര്‍ അവരുടെ അജണ്ടകള്‍ പ്രതിഷേധക്കാരില്‍ അടിച്ചേല്‍ പ്പിക്കാനും അവരെ വഴിതെറ്റിക്കാനും ശ്രമിക്കുന്നത് ദൗര്‍ഭാഗ്യകരമാണ്. ഇതിന്റെ ഏറ്റവും മോശമായ അവസ്ഥയാണ് ജനുവരി 26ന് കണ്ടത്.

ഇന്ത്യയ്‌ക്കെതിരെ അന്താരാഷ്ട്ര പിന്തുണ നേടാന്‍ ഈ നിക്ഷിപ്ത താത്പര്യക്കാര്‍ ശ്രമിക്കുന്നു. ഇത്തരക്കാരുടെ പ്രേരണ മൂലമാണ് ലോകത്തിന്റെ ചില ഭാഗ ങ്ങളില്‍ മഹാത്മാഗാന്ധിയുടെ പ്രതിമ തകര്‍ക്കപ്പെട്ട സംഭവമുണ്ടായത്. ഇന്ത്യയ്ക്കും സംസ്‌കാരമുള്ള ഏതു സമൂഹത്തിനും അസ്വസ്ഥതയുണ്ടാക്കുന്ന കാര്യമാ ണിതെന്നും പ്രസ്താവനയില്‍ പറയുന്നു.