മഞ്ഞുമല ദുരന്തം...... വിറങ്ങലിച്ച് ഉത്തരാഖണ്ഡ്... മഞ്ഞുപാളി സ്‌ഫോടനത്തെ തുടര്‍ന്നുണ്ടായ മിന്നല്‍പ്രളയത്തില്‍ 150 പേരെ കാണാതായി.

നദിയില്‍ നിന്ന് 10 മൃതദേഹങ്ങള്‍ കണ്ടെടുത്തു. ഒഴുക്കില്‍ കാണാതായവര്‍ക്കായി ഇപ്പോഴും തിരച്ചില്‍ തുടരുകയാണ്.

പ്രളയത്തില്‍ 125 പേരെ കാണാതായെന്നാണ് ഔദ്യോഗിക അറിയിപ്പെങ്കിലും കുത്തൊഴുക്കില്‍ 150 പേരെങ്കിലും അകപ്പെട്ടിട്ടുണ്ടെന്നും, ഇവര്‍ രക്ഷപ്പെട്ടിരിക്കാന്‍ സാദ്ധ്യത വിരളമാണെന്നും രക്ഷാപ്രവര്‍ത്തനത്തിന് നേതൃത്വം നല്‍കുന്ന ദുരന്ത നിവാരണ സേന അറിയിച്ചു.

നദിയുടെ പ്രവാഹപാതയിലെ തീരഗ്രാമങ്ങളില്‍ നിന്ന് ആളുകളെ ഒഴിപ്പിച്ചിട്ടുണ്ടെങ്കിലും പ്രളയം കനത്ത നാശം വിതച്ചേക്കുമെന്നാണ് ആശങ്ക. 2013-ല്‍ ഉത്തരാഖണ്ഡില്‍ മേഘവിസ്‌ഫോടന പ്രതിഭാസത്തെ തുടര്‍ന്നുണ്ടായ പേമാരിയിലും മണ്ണിടിച്ചിലിലും ആറായിരത്തോളം പേര്‍ മരണമടഞ്ഞിരുന്നു. ചമോലി ജില്ലയില്‍ തപോവന്‍ പ്രദേശത്തെ റെയ്നി ഗ്രാമത്തില്‍ ഇന്നലെ രാവിലെ 10.45- നായിരുന്നു ദുരന്തം.



ഋഷിഗംഗ നദിയില്‍ നിര്‍മ്മാണത്തിലിരുന്ന തപോവന്‍ താപവൈദ്യുതി നിലയത്തിന്റെ ഭാഗമായ അണക്കെട്ടാണ് തകര്‍ന്നത്. എന്‍.ടി.പി.സിക്കു (നാഷണല്‍ തെര്‍മല്‍ പവര്‍ കോര്‍പറേഷന്‍) കീഴിലുള്ള പദ്ധതിയില്‍ ജോലിചെയ്തിരുന്ന തൊഴിലാളികളാണ് കാണാതായ എല്ലാവരും. അണക്കെട്ടിന്റെ ഭാഗമായ തുരങ്കത്തില്‍ കുടുങ്ങിപ്പോയ ഇരുപതോളം തൊഴിലാളികളില്‍ 16 പേരെ രക്ഷപ്പെടുത്തി.

ജോഷിമഠ് പര്‍വത മേഖലയിലെ നന്ദാദേവി മഞ്ഞുമലയുടെ ഭാഗമാണ് തകര്‍ന്നത്. കൂറ്റന്‍ മഞ്ഞുമലയും ധൗളി നദിയില്‍ മാരകശക്തിയോടെ പ്രവഹിച്ച പ്രളയജലവും അണക്കെട്ട് തകര്‍ക്കുകയായിരുന്നു. സമീപപ്രദേശമായ മലരിയിലെ പാലം ഒഴുകിപ്പോയി. മറ്റൊരു അണക്കെട്ടിനും കേടുപറ്റി. അണക്കെട്ടു തകര്‍ന്ന് പതിനഞ്ചു മിനിട്ടിനകം, ജോഷിമഠില്‍ നിന്ന് 26 കിലോമീറ്റര്‍ അകലെ റെയ്നി ഗ്രാമത്തില്‍ ധൗളി ഗംഗാ നദിയില്‍ വന്‍ പ്രളയം ദൃശ്യമായിരുന്നു.




ഇരുകരകളെയും കവര്‍ന്ന പ്രളയത്തില്‍ നിരവധി വീടുകള്‍ തകര്‍ന്നു. ഋഷിഗംഗാ തീരങ്ങളിലും അനേകം പേര്‍ ദുരന്തത്തിനിരയായി. നൂറുകണക്കിന് ഇന്‍ഡോ ടിബറ്റന്‍ ഭടന്മാരും 400 കരസേനാംഗങ്ങളും മെഡിക്കല്‍ സംഘവും ഇവിടെ രക്ഷാപ്രവര്‍ത്തനം തുടരുന്നു. ഉത്തരാഖണ്ഡ് മുഖ്യമന്ത്രി ത്രിവേന്ദ്ര സിംഗ് റാവത്ത് റെയ്നിയിലെത്തി സ്ഥിതിഗതികള്‍ വിലയിരുത്തി.

ഇന്‍ഡോ ടിബറ്റന്‍ അതിര്‍ത്തിസേനയും കരസേനയും പൊലീസും രക്ഷാപ്രവര്‍ത്തനം നടത്തുന്നുണ്ട്. ദുരന്തസ്ഥലത്ത് മെഡിക്കല്‍ സംഘം ക്യാംപ് ചെയ്യുന്നു.ആറു ലക്ഷം ധനസഹായംദുരന്തത്തിന് ഇരയായവരുടെ കുടുംബാംഗങ്ങള്‍ക്ക് അടിയന്തര ധനസഹായമായി ഉത്തരാഖണ്ഡ് നാലു ലക്ഷം രൂപ വീതം നല്‍കും. രണ്ടു ലക്ഷം രൂപ വീതം കേന്ദ്രവും പ്രഖ്യാപിച്ചിട്ടുണ്ട്. ഉത്തരാഖണ്ഡ് വലിയ ദുരന്തമാണ് നേരിട്ടതെന്ന് പ്രധാനമന്ത്രി നരേന്ദ്ര മോദി പറഞ്ഞു. സ്ഥിതി വിലയിരുത്താന്‍ കേന്ദ്ര ആഭ്യന്തര മന്ത്രി അമിത് ഷാ ഉത്തരാഖണ്ഡിലെത്തും.