ലോകത്തിലെ ഏറ്റവും മലിനമായ ഇരുപത് നഗരങ്ങളുടെ പട്ടികയില്‍ പതിമൂന്നും ഇന്ത്യയിലെന്ന് പഠന റിപ്പോര്‍ട്ട്. ലോകപരിസ്ഥിതി ദിനത്തോട് അനുബന്ധിച്ച് പുറത്തുവിട്ട റിപ്പോര്‍ട്ടിലാണ് ഇക്കാര്യങ്ങള്‍ പറയുന്നത്. അന്തരീക്ഷ മലിനീകരണം കാരണം ഇന്ത്യയിലെ ജനങ്ങളുടെ ആയുസില്‍ 3.2 വര്‍ഷത്തിന്റെ കുറവുണ്ടാവുന്നു എന്നും റിപ്പോര്‍ട്ട് സൂചിപ്പിക്കുന്നു. എന്നാല്‍, കഴിഞ്ഞ മൂന്ന് വര്‍ഷമായി ഇക്കാര്യത്തില്‍ ചൈനയിലെ നിരക്ക് താരതമ്യേന കുറവാണ്. ചൈനയിലെ വെറും മൂന്ന് നഗരങ്ങള്‍ മാത്രമാണ് ഈ പട്ടികയില്‍ ഉള്‍പ്പെട്ടിട്ടുള്ളത്.
അതിവേഗം വികസിച്ചു കൊണ്ടിരിക്കുന്ന രണ്ട് സമ്പത്ത്് വ്യവസ്ഥകളാണ് ചൈനയും ഇന്ത്യയും എന്നതിനാല്‍ തന്നെ മലിനീകരണത്തിന്റെ കാര്യത്തില്‍ ഇരുരാജ്യങ്ങളും മുന്‍നിരയിലാണ്. കാര്‍ബണ്‍ വാതകം പുറന്തള്ളുന്നതില്‍ ചൈനയാണ് ഒന്നാം സ്ഥാനത്ത്, ഇന്ത്യ മൂന്നാമതും. അതേസമയം, സാമ്പത്തിക വളര്‍ച്ചയുടെ ഫലം പരിസ്ഥിതിയെ ദോഷകരമായി ബാധിക്കാതിരിക്കാന്‍ ചൈന നടത്തുന്ന ശ്രമങ്ങള്‍ ഇന്ത്യയെക്കാള്‍ മെച്ചമേറിയതാണ് എന്നത് വസ്തുതയാണ്.
മലിനമായി കിടന്ന പല നദികളും ചൈന വൃത്തിയാക്കി എടുത്തിരുന്നു. മാത്രമല്ല, നഗരങ്ങളിലെ വായു മലിനീകരണം പരിശോധിക്കുന്നതിനും തടയുന്നതിനും കര്‍ശനമായ നിയമങ്ങളും ചൈന നടപ്പാക്കി. രണ്ടായിരമാണ്ട് മുതല്‍ ചൈനയിലെ അന്തരീക്ഷ മലിനീകരണം 40 ശതമാനം കണ്ട് താഴ്ന്നതായാണ് റിപ്പോര്‍ട്ടില്‍ പറയുന്നത്. അതേസമയം, ഇതേകാലയളവില്‍ ഡല്‍ഹിയിലെ വായു മലിനീകരണത്തില്‍ 20 ശതമാനത്തിന്റെ വര്‍ദ്ധനയുണ്ടായി. ഇന്ത്യയിലെ നഗരങ്ങളിലെ സ്ഥിതിയും വ്യത്യസ്തമല്ല. തമിഴ്‌നാട്ടിലെ കോയമ്പത്തൂര്‍ മാത്രമാണ് ഇതിനൊരുപവാദം. കോയമ്പത്തൂരിലെ വായു ശ്വസിക്കാന്‍ കൊള്ളാവുന്നതാണ്.
ഗംഗ. യമുന എന്നീ നദികളാണ് ലോകത്തിലെ ഏറ്റവും മലിനമായ പത്തു നദികളുടെ പട്ടികയില്‍ ഇന്ത്യയില്‍ നിന്ന് ഉള്‍പ്പെട്ടിരിക്കുന്നത്. ചൈനയിലെ ഒരു നദി മാത്രമാണ് മലിന നദികളുടെ പട്ടികയിലുള്ളത്. പരിസ്ഥിതിപരമായി നശിച്ചു കൊണ്ടിരിക്കുന്ന ലോകത്തിലെ സോണുകളില്‍ ഗുജറാത്തിലെ വാപിയും ഒഡിഷയിലെ സുഖിന്ദയും ഉള്‍പ്പെടുന്നു. ഈ പട്ടികയില്‍ ചൈനയില്‍ നിന്ന് ഒന്നു പോലുമില്ല എന്നത് പരിസ്ഥിതി സംരക്ഷണത്തോടുള്ള അവരുടെ മനോഭാവം പ്രകടമാക്കുന്നതാണ്.
മൂന്ന് ദശാബ്ദം മുന്‍പുണ്ടായിരുന്നതിനെക്കാള്‍ മോശമായ രീതിയിലാണ് ഇന്ത്യയിലെ നദികള്‍ ഇപ്പോള്‍ മലിനമാക്കപ്പെടുന്നത് എന്നാണ് സെന്റര്‍ ഫോര്‍ സയന്‍സസ് ആന്‍ഡ് എന്‍വയോണ്‍മെന്റിന്റെ 2015ലെ റിപ്പോര്‍ട്ട് പറയുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha