പ്രധാനമന്ത്രി നരേന്ദ്ര മോഡിയ്‌ക്കെതിരെ ആഞ്ഞടിച്ച് ഡല്‍ഹി മുഖ്യമന്ത്രി അരവിന്ദ് കേജരിവാള്‍ രംഗത്ത്. ഡല്‍ഹി നിയമസഭയിലേയ്ക്ക് നടന്ന തെരഞ്ഞെടുപ്പിലെ സമ്പൂര്‍ണ പരാജയത്തിനു പ്രധാനമന്ത്രി പ്രതികാരം ചെയ്യുകയാണെന്ന് അരവിന്ദ് കേജരിവാള്‍ പറഞ്ഞു.

ഡല്‍ഹി ലഫ്. ഗവര്‍ണര്‍ നജീബ് ജംഗ് കേന്ദ്ര സര്‍ക്കാരിന്റെ പോളിംഗ് ഏജന്റ് ആണെന്നും ബിജെപിയുടെ ഹെഡ് ക്വാര്‍ട്ടേഴ്‌സാണ് അദ്ദേഹത്തിന്റെ ഔദ്യോഗിക വസതിയെന്നും കേജരിവാള്‍ കൂട്ടിച്ചേര്‍ത്തു. ദേശീയ മാധ്യമത്തിന് നല്കിയ അഭിമുഖത്തിലാണ് കേജരിവാള്‍ കേന്ദ്ര സര്‍ക്കാരിനെതിരേയും ലഫ്.ഗവര്‍ണര്‍ക്കെതിരേയും ഇത്തരമൊരു പരാമര്‍ശവുമായി എത്തിയത്.
ഡല്‍ഹി ഭരിക്കാന്‍ ആം ആദ്മി പാര്‍ട്ടിയെയാണ് ജനങ്ങള്‍ തെരഞ്ഞെടുത്തത്. രാജ്യം ഭരിക്കാന്‍ മോദിയേയും. അതുകൊണ്ട് ഞങ്ങള്‍ ഡല്‍ഹി ഭരിക്കട്ടെയെന്നും ലഫ്. ഗവര്‍ണറിലൂടെ എഎപി സര്‍ക്കാരിനെ ശല്യം ചെയ്യരുതെന്നും കേജരിവാള്‍ മോദിയോടു അഭ്യര്‍ഥിച്ചു. തെരഞ്ഞെടുപ്പില്‍ പരാജയപ്പെട്ടതിനു ഡല്‍ഹിയിലെ ജനങ്ങളോടും എഎപിയോടും പ്രതികാരം ചെയ്യുന്നത് ശരിയല്ലെന്നു അദ്ദേഹം പറഞ്ഞു.
ഡല്‍ഹി ഉപമുഖ്യമന്ത്രിയോടൊ മറ്റു മന്ത്രിമാരോടൊ ലഫ്. ഗവര്‍ണര്‍ സംസാരിക്കാന്‍ കുട്ടാക്കുന്നില്ലെന്നും എന്നാല്‍ ബിജെപിയുടെ ഓഫീസിലെ ഒരു വാച്ച് മാന്‍ വിളിച്ചാല്‍ പോലും സംസാരിക്കാന്‍ അദ്ദേഹം തയാറാവുന്നുവെന്നും കേജരിവാള്‍ ആരോപിച്ചു. എഎപിയുടെ ഭരണം വിജയിക്കാന്‍ സമ്മതിക്കാതിരിക്കുകയെന്നതാണ് മോദിയുടെ ലക്ഷ്യം.

ഇനി മറ്റെവിടെയെങ്കിലും തങ്ങള്‍ ഈ വിജയം ആവര്‍ത്തിച്ചാല്‍ അത് ബിജെപിയെ ദോഷകരമായി ബാധിക്കുമെന്ന് മോദി ഭയക്കുന്നു. അതുകൊണ്ടാണ് ലഫ്. ജനറലിനെ പോലെയുള്ള ആളുകളെയിറക്കി ഭരണത്തെ തകര്‍ക്കാന്‍ ശ്രമിക്കുന്നതെന്നും കേജരിവാള്‍ പറഞ്ഞു.
ലഫ് ഗവര്‍ണറെ കൊണ്ട് എഎപിയെയും കേജരിവാളിനെയും തകര്‍ക്കുകയാണ് മോദിയുടെ ലക്ഷ്യം. എന്നാല്‍ താന്‍ രാഹുല്‍ ഗാന്ധിയല്ലെന്നു മോദി ഓര്‍ക്കണമെന്നും കേന്ദ്ര സര്‍ക്കാര്‍ ലഫ്. ഗവര്‍ണറെ നിയമിച്ചത് തങ്ങളെ ശല്യം ചെയ്യാനാണെന്നും അദ്ദേഹം കൂട്ടിച്ചേര്‍ത്തു. ലഫ്. ഗവര്‍ണറും താനും തമ്മില്‍ നല്ല ബന്ധമാണ്. പക്ഷെ അദ്ദേഹത്തിനു ജോലി സംരക്ഷിക്കാനായി മോദി പറയുന്നത് ചെയ്യേണ്ടി വരുമെന്നും കേജരിവാള്‍ പരിഹസിച്ചു.

അഴിമതി നിവാരണ സേനയിലേക്കുള്ള നിയമനത്തെപ്പറ്റിയുള്ള വിവാദങ്ങള്‍ ശരിയല്ല. ഇതിനു മുന്‍പും ഇത്തരം നടപടികളുണ്ടായിട്ടുണ്ട്. മുമ്പ് ഷീലാ ദീക്ഷിതിന്റെ ഭരണക്കാലത്ത് ആന്‍ഡമാനില്‍ നിന്നും പോലീസുകാരെ നിയമിച്ചിരുന്നു. ഉന്നത നിയമനത്തിനുള്ള അവകാശം സര്‍ക്കാരിനുണ്ടെന്നും അദ്ദേഹം പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha