തമിഴ്‌നാട് മുഖ്യമന്ത്രി ജയലളിതയുടെ ആസ്തി നാലു വര്‍ഷം കൊണ്ട് ഇരട്ടിയായി. ആര്‍ കെ നഗര്‍ ഉപതിരഞ്ഞെടുപ്പില്‍ നാമനിര്‍ദ്ദേശ പത്രികയോടൊപ്പം സമര്‍പ്പിച്ച സത്യവാങ്മൂലത്തില്‍ കാണിച്ചിരിക്കുന്ന ആസ്തി 117.13 കോടി രൂപയാണ് 2011ല്‍ മത്സരിക്കുമ്പോള്‍ ഇത് 51.40 കോടിയായിരുന്നു. 2006 ല്‍ 24.7 കോടിയും.
വിവിധ ബാങ്കുകളിലായി ജയയ്ക്കുള്ളത് 9.80 കോടി രൂപയുടെ നിക്ഷേപം. പണമായി കൈയ്യിലുള്ളത് 39,000 രൂപ. സ്വര്‍ണം 2660 പവന്‍. എന്നാല്‍ സ്വത്തു കേസുമായി ബന്ധപ്പെട്ട് ഇതു ട്രഷറിയിലായതിനാല്‍ ഇതിന്റെ വില ആസ്തിയില്‍ ഉള്‍പ്പെടുത്തിയിട്ടില്ല. സ്വന്തമായുള്ള 1250 കിലോ വെള്ളിക്കു 3.12 കോടി രൂപയാണു മതിപ്പു വില.
കോടനാട് എസ്റ്റേറ്റ് ഉള്‍പ്പെടെ അഞ്ചു സ്ഥാപനങ്ങളിലായുള്ള നിക്ഷേപം 31.68 കോടി രൂപയുടേതാണ്. പോയസ് ഗാര്‍ഡനിലെ വസതിയുടെ ഇപ്പോഴത്തെ വിപണി മൂല്യം 43.96 കോടി. ജയലളിതയും അമ്മയും ചേര്‍ന്ന് 1967 ല്‍ 1.32 ലക്ഷം രൂപയ്ക്കു വാങ്ങിയതാണിത്. പോയസ് ഗാര്‍ഡനിലുള്‍പ്പെടെ നാലു സ്ഥലങ്ങളില്‍ വാണിജ്യാവശ്യങ്ങള്‍ക്കുള്ള കെട്ടിടങ്ങളും ജയയുടെ ഉടമസ്ഥതയിലുണ്ട്.
ഹൈദരാബാദില്‍ ജീഡിമട്ട്‌ല ഗ്രാമത്തില്‍ 14.5 ഏക്കര്‍ കൃഷിഭൂമിയുടെ മൂല്യം 14.44 കോടി രൂപ. 1980 മോഡല്‍ അംബാസഡര്‍ കാര്‍ ഉള്‍പ്പെടെ 42.25 ലക്ഷം വിലമതിക്കുന്ന ഒമ്പതു വാഹനങ്ങളുണ്ട്.
2013-14 വര്‍ഷത്തെ ആദായ നികുതി കണക്കുകള്‍ പ്രകാരം ജയലളിതയുടെ വാര്‍ഷിക വരുമാനം 33.22 ലക്ഷം രൂപയാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha