പൊളിറ്റ് ബ്യൂറോ കമ്മിഷന്റെ നേതൃത്വം സ്വയം ഏറ്റെടുത്ത് സിപിഎം ജനറല്‍ സെക്രട്ടറി സീതാറാം യച്ചൂരി. യെച്ചൂരിയുടെ തീരുമാനം മറ്റുള്ളവരില്‍ അമ്പരപ്പുളവാക്കി.കേരളത്തിലെ പാര്‍ട്ടിയിലുള്ള പ്രശ്‌നങ്ങള്‍ പരിശോധിക്കാന്‍ നിലവിലെ രീതിയില്‍ പിബി കമ്മിഷന്‍ തുടരാമെന്നായിരുന്നു കഴിഞ്ഞ ദിവസം കേന്ദ്ര കമ്മിറ്റിയിലുണ്ടായ തീരുമാനം.
കഴിഞ്ഞ ഏപ്രിലില്‍ സ്ഥാനമൊഴിഞ്ഞ ജനറല്‍ സെക്രട്ടറി പ്രകാശ് കാരാട്ടിനായിരുന്നു കമ്മിഷന്റെ നേതൃസ്ഥാനം. നിലവിലെ രീതി തുടരാമെന്നാണ് തീരുമാനമെങ്കില്‍, കാരാട്ടിന്റെ നേതൃത്വത്തിലാണ് വീണ്ടും കമ്മിഷന്‍ പ്രവര്‍ത്തിക്കേണ്ടത്. എന്നാല്‍, കേന്ദ്ര കമ്മിറ്റിയുടെ തീരുമാനങ്ങള്‍ വിശദീകരിച്ച പത്രസമ്മേളനത്തിലാണു കമ്മിഷന്റെ തലവന്‍ ആരെന്ന മാധ്യമപ്രവര്‍ത്തകരുടെ ചോദ്യത്തിന് ഉത്തരമായി ജനറല്‍ സെക്രട്ടറിയാണു യോഗം വിളിക്കുന്നതെന്ന് വിശദീകരിച്ചത്. കമ്മിഷന്‍ ജനറല്‍ സെക്രട്ടറിയുടെ നേതൃത്വത്തില്‍ പ്രവര്‍ത്തിക്കുമെന്ന് എടുത്തുപറഞ്ഞു. കഴിഞ്ഞ ദിവസം തീരുമാനമൊന്നും ഉണ്ടായിട്ടില്ലെന്നാണ് മറുപക്ഷത്തിന്റെ വാദം. ജനറല്‍ സെക്രട്ടറിയെന്ന നിലയ്ക്കു മാത്രമാണ് കാരാട്ട് കമ്മിഷന്റെ അമരക്കാരനായതെന്നാണ് യച്ചൂരിയുടെ നിലപാട്. അതുകൊണ്ടുതന്നെ, പുതിയ ജനറല്‍ സെക്രട്ടറിയെന്ന നിലയ്ക്ക് തന്റെ നേതൃത്വത്തില്‍ കമ്മിഷന്‍ പ്രവര്‍ത്തിക്കുമെന്ന് അദ്ദേഹം പറയാതെ പറയുകയായിരുന്നു.
ജനറല്‍ സെക്രട്ടറിക്കു കമ്മിഷന്റെ യോഗം വിളിച്ചുകൂട്ടാനുള്ള അധികാരത്തെ മറുപക്ഷം ചോദ്യം ചെയ്യുന്നില്ല. എന്നാല്‍, കാരാട്ടിന്റെ നേതൃത്വത്തിലല്ല കമ്മിഷന്‍ പ്രവര്‍ത്തിക്കുകയെന്ന് ഇപ്പോള്‍ പറയുന്നതെങ്ങനെയെന്നാണ് അവരുടെ ചോദ്യം. എന്നാല്‍, കാരാട്ടിന്റെ നേതൃത്വത്തിലല്ല കമ്മിഷന്‍ കേരളത്തിലെ പാര്‍ട്ടി സെക്രട്ടേറിയറ്റിനെ കേള്‍ക്കാന്‍ പോയതെന്നും അതു പിബിയുടെ തീരുമാനമായിരുന്നുവെന്നുമാണ് യച്ചൂരിയുടെ വാദമെന്നും സൂചനയുണ്ട്.
വിഷയം കേരളത്തിലെ പാര്‍ട്ടിയിലെ പ്രശ്‌നങ്ങളാണെന്നതും അവയെ സമീപിക്കേണ്ടത് എങ്ങനെയെന്നതില്‍ യച്ചൂരിയും കാരാട്ടും വിരുദ്ധധ്രുവങ്ങളിലാണെന്നതുമാണ് യച്ചൂരിയുടെ നീക്കത്തെ പ്രസക്തമാക്കുന്നത്. തന്നെ എങ്ങനെയും പുകച്ചു പുറത്തു ചാടിക്കാനാണ് പിണറായി വിജയനും കൂട്ടരും ശ്രമിക്കുന്നതെന്നാണ് കഴിഞ്ഞ ദിവസം വി.എസ്.അച്യുതാനന്ദന്‍, യച്ചൂരിയെ കണ്ടു വിശദീകരിച്ചത്. വിഎസുതന്നെയാണ് കേരളത്തിലെ പാര്‍ട്ടിയിലെ ജനകീയ നേതാവെന്നും അദ്ദേഹത്തെ ഒഴിവാക്കി മുന്നോട്ടുപോകുക ബുദ്ധിപരമല്ലെന്നും യച്ചൂരിക്കു നിലപാടുമുണ്ട്.വിഎസിനെ പാര്‍ട്ടിയില്‍നിന്നു പുറത്താക്കുന്നത് അദ്ദേഹത്തെ പാര്‍ട്ടിയുടെ ശത്രുക്കള്‍ക്കു മുതലെടുപ്പിനായി വിട്ടുകൊടുക്കുന്ന നടപടിയാവുമെന്നതില്‍ നേതൃനിരയിലുള്ളവര്‍ക്കും തര്‍ക്കമില്ല.
പുറത്താക്കുന്നില്ലെങ്കില്‍, ഉടനെ പ്രതിപക്ഷ നേതൃസ്ഥാനത്തുനിന്നെങ്കിലും മാറ്റണമെന്ന പിണറായിപക്ഷ വാദത്തെ കാരാട്ടും മറ്റും എതിര്‍ക്കുന്നില്ല. എത്രയും വേഗം കമ്മിഷന്‍ നടപടികള്‍ പൂര്‍ത്തിയാക്കുമെന്നാണ് യച്ചൂരി പറഞ്ഞത്. എന്നാല്‍, എത്രയും വേഗം എന്നതിന്റെ സമയപരിധി എന്തെന്ന് ആര്‍ക്കും വ്യക്തതയില്ല.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha