യോഗയെ എതിര്‍ക്കുന്നവര്‍ ഇന്ത്യയില്‍ ജീവിക്കേണ്ടതില്ലെന്നു ബിജെപി എംപി യോഗി ആദിത്യനാഥ്. വിവാദ പ്രസ്താവനകള്‍ വേണ്ടെന്ന് പ്രധാനമന്ത്രി നിര്‍ദേശിച്ചു ദിവസങ്ങള്‍ക്കുള്ളിലാണ് ബിജെപി നേതാവിന്റെ പ്രകോപനപരമായ പ്രസംഗം.
രാജ്യത്തെ സര്‍ക്കാര്‍ സ്‌കൂളുകളില്‍ യോഗ നിര്‍ബന്ധമാക്കാനുള്ള കേന്ദ്ര സര്‍ക്കാര്‍ നീക്കത്തിനെതിരെ ഓള്‍ ഇന്ത്യ മുസ്‌ലിം പഴ്‌സനേല്‍ ലോ ബോര്‍ഡ് രംഗത്തു വന്നിരുന്നു. യോഗയുടെ ഭാഗമായുള്ള സൂര്യനമസ്‌കാരം ഇസ്‌ലാം മതവിശ്വാസങ്ങള്‍ക്കെതിരാണെന്ന് മുസ്‌ലിം ലോ ബോര്‍ഡ് വ്യക്തമാക്കിയിരുന്നു. രാജ്യത്തെ സര്‍ക്കാര്‍ സ്‌കൂളുകളില്‍ യോഗ പരിശീലനം നിര്‍ബന്ധമാക്കുന്ന തരത്തിലുള്ള നീക്കങ്ങള്‍ക്കെതിരെ രാജ്യ വ്യാപകമായി പ്രചാരണം നടത്താനും തീരുമാനിച്ചിരുന്നു. ഈ സാഹചര്യത്തിലാണു ഗൊരഖ്പൂര്‍ എംപി ആദിത്യനാഥിന്റെ ഈ പരാമര്‍ശം. പരാമര്‍ശം വ്യാപക പ്രതിഷേധത്തിനിടയാക്കിക്കഴിഞ്ഞു.
എല്ലാ വര്‍ഷവും ജൂണ്‍ 21 രാജ്യാന്തര യോഗദിനമായി ആചരിക്കാന്‍ ഐക്യരാഷ്ട്ര സംഘടന തീരുമാനിച്ചിരുന്നു. ഇന്ത്യന്‍ സര്‍ക്കാര്‍ പ്രത്യേക താല്‍പര്യമെടുത്തു നടത്തിയ നീക്കത്തിന്റെ ഫലമായിട്ടായിരുന്നു ഈ തീരുമാനം. ഈ പശ്ചാത്തലത്തില്‍ പ്രഥമ രാജ്യാന്തര യോഗ ദിനം വമ്പിച്ച പരിപാടികളോടെ ആഘോഷിക്കാന്‍ കേന്ദ്ര സര്‍ക്കാര്‍ തയാറെടുക്കുന്നതിനിടെയാണു വിവാദം പൊട്ടിപ്പുറപ്പെട്ടിരിക്കുന്നത്.
സൂര്യനമസ്‌കാരം സ്‌കൂളുകളില്‍ നിര്‍ബന്ധമാക്കരുതെന്നും ഇസ്‌ലാം മതവിശ്വാസമനുസരിച്ച് ഇത് തെറ്റാണെന്നും മുസ്‌ലിം ബോര്‍ഡ് ചൂണ്ടിക്കാട്ടുന്നു. സ്‌കൂളുകളില്‍ യോഗ നിര്‍ബന്ധമാക്കുന്ന തരത്തിലുള്ള നീക്കങ്ങള്‍ക്കെതിരെ രാജ്യവ്യാപകമായി പ്രചാരണ പരിപാടികള്‍ സംഘടിപ്പിക്കുന്നതിനു പുറമെ, ആവശ്യമെങ്കില്‍ ഇതുമായി ബന്ധപ്പെട്ടു കോടതിയെ സമീപിക്കാനും മുസ്‌ലിം ബോര്‍ഡ് പദ്ധതിയിടുന്നതായാണു റിപ്പോര്‍ട്ടുകള്‍. നിര്‍ബന്ധിത സുര്യനമ സ്‌കാരത്തെ മുസ്‌ലീം ലീഗ് എതിര്‍ക്കുമെന്ന് ഇ.ടി.മുഹമ്മദ് ബഷീര്‍ എംപിയും നേരത്തെ വ്യക്തമാക്കിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha