ആശങ്കയോടെ മഹാരാഷ്ട്ര.... പ്രതിദിനം കോവിഡ് നിരക്ക് വര്‍ദ്ധിക്കുന്നു.... സംസ്ഥാന സര്‍ക്കാര്‍ പ്രഖ്യാപിച്ച രാത്രി കര്‍ഫ്യൂ ഇന്നു രാത്രി മുതല്‍ പ്രാബല്യത്തില്‍ വരും, ഷോപ്പിങ് മാളുകള്‍ അടക്കമുള്ളവ രാത്രി എട്ട് മുതല്‍ രാവിലെ ഏഴുവരെ അടച്ചിടണമെന്ന് നിര്‍ദ്ദേശം. മഹാരാഷ്ട്രയില്‍ 35,726 പേര്‍ക്കുകൂടി കോവിഡ് സ്ഥിരീകരിച്ചു.

ഇതോടെ ഇതുവരെ രോഗം സ്ഥിരീകരിച്ചവരുടെ എണ്ണം 26,73,461 ആയി. 166 പേര്‍കൂടി ശനിയാഴ്ച മരിച്ചതോടെ ആകെ മരണം 54,073 ആയി. ഈ വര്‍ഷത്തെ ഏറ്റവും ഉയര്‍ന്ന പ്രതിദിന മരണസംഖ്യയാണ് ഇന്ന് രേഖപ്പെടുത്തിയതെന്ന് പിടിഐ വാര്‍ത്താ ഏജന്‍സി റിപ്പോര്‍ട്ടു ചെയ്തു. 14,523 പേര്‍ ഇന്ന് രോഗമുക്തി നേടി ആശുപത്രി വിട്ടു.

23,14,579 പേരാണ് സംസ്ഥാനത്ത് ഇതുവരെ രോഗമുക്തി നേടിയത്. 3,03,475 ആണ് നിലവില്‍ സംസ്ഥാനത്തെ സജീവ കേസുകള്‍. 56.58 ശതമാനമാണ് സംസ്ഥാനത്തെ രോഗമുക്തി നിരക്ക്. 2.02 ശതമാനമാണ് മരണ നിരക്കെന്നും ആരോഗ്യ വകുപ്പ് അധികൃതര്‍ വാര്‍ത്താക്കുറിപ്പില്‍ അറിയിച്ചു.

തലസ്ഥാനമായ മുംബൈയില്‍ ഇന്ന് 6130 പേര്‍ക്കാണ് കോവിഡ് സ്ഥിരീകരിച്ചത്. ഇതുവരെ ഉള്ളതില്‍വച്ച് ഏറ്റവും ഉയര്‍ന്ന കണക്കാണിത്.

അതിനിടെ കോവിഡ് കേസുകള്‍ വര്‍ധിച്ച സാഹചര്യത്തില്‍ സംസ്ഥാന സര്‍ക്കാര്‍ പ്രഖ്യാപിച്ച രാത്രി കര്‍ഫ്യൂ ഞായറാഴ്ച രാത്രി മുതല്‍ പ്രാബല്യത്തില്‍ വരും. ഷോപ്പിങ് മാളുകള്‍ അടക്കമുള്ളവ രാത്രി എട്ട് മുതല്‍ രാവിലെ ഏഴുവരെ അടച്ചിടണമെന്നാണ് നിര്‍ദ്ദേശം.

ആള്‍ക്കൂട്ടങ്ങള്‍ ഒഴിവാക്കാന്‍ സര്‍ക്കാര്‍ കര്‍ശന നിര്‍ദ്ധേശം നല്‍കിയിരിക്കുകയാണ്. മതപരവും രാഷ്ട്രീയപരവുമായ ആള്‍ക്കൂട്ടങ്ങള്‍ക്കടക്കമാണ് വിലക്കേര്‍പ്പെടുത്തിയിരിക്കുന്നത്.

രാത്രികാല കര്‍ഫ്യു നിലനില്‍ക്കും. റസ്റ്റോറന്റുകള്‍, മാളുകള്‍, പാര്‍ക്കുകള്‍ തുടങ്ങിയവ രാത്രി എട്ടുമണി മുതല്‍ ഏഴുവരെ അടച്ചിടും. ഈ സമയങ്ങളില്‍ ബീച്ചില്‍ പോകുന്നതിനും നിയന്ത്രണം ഏര്‍പ്പെടുത്തിയിട്ടുണ്ടെന്നും സര്‍ക്കാര്‍ വ്യക്തമാക്കി.

നിയന്ത്രണങ്ങള്‍ കടുപ്പിക്കുമ്പോഴും ജനങ്ങള്‍ മാസ്‌ക് ധരിക്കുന്നതിലടക്കം വിമുഖത കാണിക്കുകയാണ്. കോവിഡ് മാനദണ്ഡങ്ങള്‍ ലംഘിക്കുന്നവര്‍ക്കെതിരെ കര്‍ശന നടപടി സ്വീകരിക്കുമെന്നും സര്‍ക്കാര്‍ വ്യക്തമാക്കുന്നു. നിയമം ലംഘിക്കുന്നവര്‍ക്കെതിരെ കര്‍ശന പിഴ ഏര്‍പ്പെടുത്താനാണ് സര്‍ക്കാര്‍ തീരുമാനം.