ഡല്ഹിയില് ലോക്ഡൗണ് നീട്ടി; കേസുകള് കുറയുന്നുവെങ്കില് മാത്രം 31 ന് ശേഷം ലോക്ഡൗണ് വില്വലിക്കുവെന്ന് അരവിന്ദ് കെജ്രിവാള്; വാക്സിന് ക്ഷാമത്തെ തുടര്ന്ന് ഡല്ഹിയില് 18-44 വരെയുള്ളവരുടെ വാക്സീനേഷന് നിറുത്തിവച്ചു
കൊവിഡ് വ്യാപനത്തില് നേരിയ കുറവുണ്ടെങ്കിലും രാജ്യതലസ്ഥാനത്ത് ഏര്പ്പെടുത്തിയ ലോക്ക്ഡൗണ് ഒരാഴ്ച കൂടി നീട്ടാന് തീരുമാനം. മുഖ്യമന്ത്രി അരവിന്ദ് കെജ്രിവാളാണ് ഇക്കാര്യം അറിയിച്ചത്. ദില്ലിയിലെ പ്രതിദിന കൊവിഡ് കേസുകള് 1,600 ആയി കുറഞ്ഞിട്ടുണ്ട്. കേസുകള് ഇതേ രീതിയില് കുറയുകയാണെങ്കില് മാത്രമേ മേയ് 31 ന് ശേഷം ലോക്ഡൗണ് പിന്വലിക്കുവെന്നും മുഖ്യമന്ത്രി വ്യക്തമാക്കി.
പുതിയ രോഗികളുടെ എണ്ണം കൂടുന്നുവെങ്കിലും മരണനിരക്ക് ഉയര്ന്നു തന്നെയാണ് നില്ക്കുന്നത്. അതേസമയം ഡല്ഹിയില് 18-44 വരെയുള്ളവരുടെ വാക്സീനേഷന് നിറുത്തിവെച്ചിരിക്കുകയാണ്. ഈ വിഭാഗത്തിലുള്ളവര്ക്കായി നീക്കിവച്ച വാക്സീന് സ്റ്റോക്ക് അവസാനിച്ചതിനാലാണ് തീരുമാനത്തിലേക്ക് എത്തിയതെന്നാണ് മുഖ്യമന്ത്രി അറിയിച്ചത്. കൂടുതല് വാക്സീന് ഉടന് നല്കണമെന്നാവശ്യപ്പെട്ട് കെജ്രിവാള് പ്രധാനമന്ത്രി നരേന്ദ്രമോദിക്ക് കത്തയച്ചു.
നമ്മുടെ യുവാക്കള്ക്കുള്ള വാക്സിനേഷന് നിര്ത്തേണ്ടി വന്നിരിക്കുന്നു. യുവാക്കള്ക്കായി കേന്ദ്രം നല്കിയ വാക്സിന് തീര്ന്നു. ഇതോടെ, വാക്സിനേഷന് കേന്ദ്രങ്ങള് പൂട്ടേണ്ടി വന്നു. ഏതാനും ഡോസുകള് ബാക്കിയുണ്ട്. അവ വൈകീട്ടോടെ തീരും. വാക്സിന് ലഭിക്കാത്തതിനെ തുടര്ന്ന് വാക്സിനേഷന് കേന്ദ്രങ്ങള് പൂട്ടേണ്ടിവന്നതില് ഏറെ ദുഃഖിക്കുന്നു. കേന്ദ്രസര്ക്കാരിനോട് കൂടുതല് വാക്സിന് ചോദിച്ചിരുന്നു. അതുലഭിക്കുന്ന മുറയ്ക്ക് വാക്സിനേഷന് പുനരാരംഭിക്കുമെന്നും മുഖ്യമന്ത്രി അറിയിച്ചു.
എല്ലാ മാസവും 80 ലക്ഷം വാക്സിന് ഡല്ഹിക്കുവേണം. ഈ സ്ഥാനത്ത് 16 ലക്ഷം വാക്സിനേ ലഭിച്ചിട്ടുള്ളൂ. ജൂണില് ഡല്ഹിക്കായി എട്ടുലക്ഷം വാക്സിനേ വകയിരുത്തിയിട്ടുള്ളൂ. ഇതുവരെ അമ്പതുലക്ഷം പേര്ക്ക് വാക്സിന് നല്കി. ഡല്ഹിയിലെ മുതിര്ന്നവര്ക്കെല്ലാം നല്കാന് രണ്ടരക്കോടി വാക്സിന് വേണം. ഇപ്പോഴത്തെ നിലയില് എട്ടുലക്ഷം വാക്സിനേ നല്കൂവെങ്കില് ഡല്ഹിനിവാസികള്ക്കെല്ലാം വാക്സിനേഷന് പൂര്ത്തിയാക്കാന് 30 മാസമെടുക്കും. ഇതിനിടയില് എത്ര കോവിഡ് തരംഗങ്ങള് വന്നുപോവുമെന്നോ എത്രത്തോളംപേര്ക്ക് ജീവന് നഷ്ടപ്പെടുമെന്നോ അറിയില്ലെന്നും അദ്ദേഹം വ്യക്തമാക്കി.
അതേ സമയം യുപിയില് ഭാഗിക ലോക്ക് ഡൗണ് നീട്ടാന് യോഗി സര്ക്കാരും തീരുമാനിച്ചു. ഈ മാസം 31 വരെ നിയന്ത്രണം സമാനരീതിയില് തുടരാനാണ് സര്ക്കാര് തീരുമാനം. ഉത്തരാഖണ്ഡില് കൊവിഡ് ബാധിച്ചു മാതാപിതാക്കള് മരിച്ചാല് കുട്ടികളെ സര്ക്കാര് ഏറ്റെടുക്കുമെന്ന് ഉത്തരാഖണ്ഡ് മുഖ്യമന്ത്രി അറിയിച്ചു. ഇതിനായി സംസ്ഥാനത്ത് പുതിയ പദ്ധതിയും സര്ക്കാര് തുടങ്ങിയിട്ടുണ്ട്.
https://www.facebook.com/Malayalivartha
