സഹോദരി ഒളിച്ചോടി വിവാഹം കഴിച്ചതിലുള്ള വൈരാഗ്യത്തില്‍ സഹോദരിയുടെ ഭർതൃപിതാവിനെ കുത്തിക്കൊലപ്പെടുത്തി യുവാവ് പ്രതികാരം ചെയ്തു. ഗുജറാത്തിലെ മോര്‍ബി ജില്ലയില്‍ വെള്ളിയാഴ്ചയാണ് സംഭവം നടന്നത്.

ഉപ്പ് നിര്‍മാണ തൊഴിലാളിയായ ഭാരത് വഗേല എന്ന 52 കാരനാണ് മരണപ്പെട്ടത്. ഒന്നരമാസം മുൻപേ വഗേലയുടെ മകന്‍ പ്രതിയുടെ സഹോദരിയോടൊപ്പം ഒളിച്ചോടി വിവാഹം കഴിച്ചിരുന്നു. ഇതിന്റെ വൈരാഗ്യത്തെ തുടര്‍ന്നാണ് കൊലപാതകമെന്ന് പൊലീസ് പറയുന്നു.

വഗേലയുടെ മകന്‍ ഹരേഷും ജിഗ്‌നാസ എന്ന യുവതിയും തമ്മില്‍ പ്രണയത്തിലായിരുന്നു. വിവാഹ അഭ്യര്‍ഥനയുമായി ഇരു കുടുംബങ്ങളെയും സമീപിച്ചിരുന്നെങ്കിലും സമ്മതം നല്‍കിയിരുന്നില്ല. തുടര്‍ന്ന് ഒന്നരമാസം മുമ്ബ് ഹരേഷും ജിഗ്‌നാസയും സ്വന്തം ഇഷ്ടത്തിന് വിവാഹം കഴിക്കുകയായിരുന്നു.

തുടര്‍ന്ന് ഹരേഷിനോടും പിതാവ് വഗേലയോടും ജിഗ്‌നാസയുടെ സഹോദരന്‍ ദിനു മാഹല്യക്ക് വൈരാഗ്യം തോന്നുകയായിരുന്നു. വെള്ളിയാഴ്ച വഗേലയും ഭാര്യ ഭാനുവും സമീപ ഗ്രാമത്തില്‍ താമസിക്കുന്ന അമ്മയെ കണ്ടു മടങ്ങുന്നതിനിടെ ദിനു തടഞ്ഞുനിര്‍ത്തി കുത്തുകയായിരുന്നു.

ഉടന്‍ തന്നെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ കഴിഞ്ഞില്ല. സംഭവത്തില്‍ ദിനുവിനെ പൊലീസ് ശനിയാഴ്ച കസ്റ്റഡിയിലെടുത്തു.