സന്തോഷകരമായ ഒരു മൂഹൂർത്തത്തിനിടെ അപ്രതീക്ഷിതമായി ക്ഷണിക്കപ്പെടാത്ത ഒരു അതിഥി കടന്നു വന്നാൽ എങ്ങെനിയിരിക്കും. അത്തരത്തിൽ ഒരു ദുഖകരമായ സംഭവമാണ് ഇപ്പോൾ ഉത്തർപ്രദേശിൽ നിന്ന് കേൾക്കുന്നത്. വിവാഹ വേദിയിൽ വച്ച് നവവധു മരണപ്പെട്ട വാർത്തയാണ് ഇപ്പോൾ പുറത്ത് വരുന്നത്.

വിവാഹ ചടങ്ങിനിടെ ഹൃദയാഘാതം സംഭവിച്ച് വധു മരണപ്പെട്ടതിനെ തുടർന്ന് അതേ വേദിയിൽ വധുവിന്റെ സഹോദരിയെ വിവാഹം ചെയ്ത് വരൻ. ഉത്തർപ്രദേശിലെ എട്ടാവാ ജില്ലയിലെ സാന്ദ്പൂർ ഗ്രാമത്തിലാണ് സംഭവം നടന്നത്.

സോഷ്യൽ മീഡിയയിലും മറ്റും ഈ സംഭവം വലിയൊരു ചർച്ചാ വിഷയമായി മാറിയിട്ടുണ്ട്. മരിച്ച വധുവിന്റെ മൃതദേഹം മറ്റൊരു മുറിയിലേക്ക് മാറ്റിയ ശേഷമാണ് ഇവർ വിവാഹ ചടങ്ങുകളുമായി മുന്നോട്ട് നീങ്ങിയത് എന്നാണ് വിവരം.

സാന്ദ്പൂർ ഗ്രാമത്തിലെ പെൺകുട്ടായായ സുരഭിയും മഞ്ജേഷ് കുമാറും തമ്മിലായിരുന്നു വിവാഹം നിശ്ചയിച്ചിരുന്നത്. ഹിന്ദു ആചാരപ്രകാരം പരസ്പരം ഇരുവരും വിവാഹ മാലയണിയുകയും ചെയ്തിരുന്നു. എന്നാൽ ചടങ്ങുകൾ നടക്കുന്നതിനിടെ സുരഭിക്ക് അസ്വസ്തത അനുഭവപ്പെട്ട് കുഴഞ്ഞ് വീഴുകയായിരുന്നു.

ഉടൻ തന്നെ ഡോക്ടറെ കാണിച്ചെങ്കിലും ഫലമുണ്ടായില്ല. പരിശോധിച്ച ഡോക്ടർ സുരഭിയുടെ മരണം പിന്നീട് സ്ഥിരീകരിക്കുകയായിരുന്നു. ഹൃദയാഘാതമാണ് മരണ കാരണം എന്നാണ് പ്രാഥമിക നിഗമനം.

എന്നാൽ സുരഭി മരിച്ച ശേഷവും മറ്റൊരാളെ കണ്ടെത്തി വിവാഹ ചടങ്ങുമായി മുന്നോട്ട് പോകാനാണ് വരന്റെയും വധുവിന്റെയും കുടുംബം ഒന്നിച്ചിരുന്ന് തീരുമാനിച്ചത് എന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്.

“അത്തരം ഒരു സാഹചര്യത്തിൽ എന്തു ചെയ്യണം എന്ന് ഞങ്ങൾക്ക് അറിയില്ലായിരുന്നു. രണ്ടു കുടുബാംഗങ്ങളും ഒന്നിച്ചിരുന്ന സംസാരിക്കുന്നതിനിടെ ഒരാൾ ഇളയ സഹോദരി നിഷയുമായി വിവാഹം നടത്താം എന്ന കാര്യം മുന്നോട്ട് വെച്ചു.

ശേഷം ഇരു കുടുംബങ്ങളും ഇക്കാര്യം ചർച്ച ചെയ്യുകയും തീരുമാനം എടുക്കുകയും ആയിരുന്നു” എന്നാണ് മരിച്ച സുരഭിയുടെ സഹോദരൻ മാധ്യമ പ്രവർത്തകരോട് പറഞ്ഞത്.

സുരഭിയുടെ മൃതദേഹം മറ്റൊരു മുറിയിലേക്ക് മാറ്റിയ ശേഷമാണ് സഹോദരി നിഷയുടെയും മഞ്ജേഷിൻ്റെയും വിവാഹ ചടങ്ങുകൾ നടത്തിയത്. വിവാഹത്തിന് ശേഷം വധുവുമായി വരൻ്റെ വീട്ടുകാർ മടങ്ങി കഴിഞ്ഞാണ് സുരഭിയുടെ സംസ്കാര ചടങ്ങുകൾ നടത്തിയതെന്നും സഹോദരൻ വ്യക്തമാക്കി.

“ഏറെ പ്രയാസത്തോടെയും ദുഃഖത്തോടെയും എടുത്ത തീരുമാനമായിരുന്നു ഇതെന്നും. ഒരു മകളുടെ മൃതദേഹം മുറിയിൽ കിടത്തുകയും അടുത്ത മുറിയിൽ മറ്റൊരു മകളുടെ വിവാഹം നടക്കുകയും ചെയ്യുക.

മരണത്തിന്റെ ദുഃഖവും വിവാഹത്തിന്റെ സന്തോഷവും ഒരേ സമയം അനുഭവിക്കേണ്ടി വരുമെന്ന് ഒരിക്കലും ചിന്തിച്ചിരുന്നില്ല” എന്നാണ് സുരഭിയുടെ അമ്മാവനായ അജബ് സിംഗ് പറഞ്ഞു.

വിവാഹ ചടങ്ങുകൾ നടക്കുന്നതിനിടെ വധു മരിക്കുന്ന സംഭവം ഇന്ത്യയിൽ ഇത് ആദ്യമായിട്ടല്ല. അടുത്തിടെ ഒഡീഷയിലും വിവാഹ ചടങ്ങുകൾ നടക്കുന്നതിനിടെ വധു മരിച്ചിരുന്നു.

വിവാഹത്തിന് ശേഷം വരന് ഒപ്പം മടങ്ങുന്നതിനിടെ അമിതമായി കരയുകയും ഇതേ തുടർന്ന് ഹൃദയാഘാതം ഉണ്ടായതുമാണ് മരണത്തിന് കാരണമായത്. ഒഡീഷയിലെ സോനേപൂർ ജില്ലയിലാണ് ആഘോഷം ദുഃഖത്തിലേക്ക് വഴിതെറ്റിയത്. ഗുപ്തേശ്വരി സഹോ എന്ന യുവതിയാണ് വിവാഹത്തിന് പിന്നാലെ മരണപ്പെട്ടത്.

ബൊലാങ്കിരി ജില്ലയിലുള്ള വരൻ്റെ വീട്ടിലേക്ക് വധുവിനെ അയക്കുന്ന ചടങ്ങിനിടെ ഇവർ തളർന്ന് വീഴുകയും പിന്നീട് മരിക്കുകയുമായിരുന്നു. തളർന്നു വീണ ഉടൻ മുഖത്ത് വെള്ളം തളിക്കുകയും മറ്റും ചെയ്തിട്ടും ബോധം വരാത്തതിനെ തുടർന്ന് തൊട്ടടുത്തുള്ള ആശുപത്രിയിൽ എത്തിച്ചെങ്കിലും രക്ഷിക്കാൻ സാധിച്ചില്ല.