കസ്തൂരി രംഗന്‍ റിപ്പോര്‍ട്ട് നടപ്പാക്കുന്നതുമായി ബന്ധപ്പെട്ട് പരിസ്ഥിതി ദുര്‍ബല മേഖലകളെ തരംതിരിച്ച് വീണ്ടും റിപ്പോര്‍ട്ട് നല്‍കാന്‍ കേരളം അടക്കമുള്ള സംസ്ഥാനങ്ങള്‍ക്കു കേന്ദ്ര പരിസ്ഥിതി മന്ത്രാലയത്തിന്റെ നിര്‍ദേശം. റിപ്പോര്‍ട്ട് സംബന്ധിച്ച അന്തിമ വിജ്ഞാപനം സെപ്റ്റംബര്‍ വരെ നീട്ടാനും ഇന്നലെ നടന്ന യോഗത്തില്‍ തീരുമാനമായി.
കസ്തൂരിരംഗന്‍ റിപ്പോര്‍ട്ടിനെച്ചൊല്ലി മലയോര ജനതയുടെ ആശങ്കയ്ക്കു പരിഹാരമില്ലാതെയാണ് പരിസ്ഥിതി മന്ത്രാലയം ഇന്നലെ വിളിച്ചുചേര്‍ത്ത യോഗവും അവസാനിച്ചത്. തന്ത്രപ്രധാന യോഗമായിട്ടും കേരളത്തില്‍ നിന്നു മന്ത്രിക്കു പകരം പ്രിന്‍സിപ്പല്‍ സെക്രട്ടറിയാണു പങ്കെടുത്തത്. അന്തിമ വിജ്ഞാപനം സെപ്റ്റംബറില്‍ പുറത്തിറക്കാനാണു തീരുമാനമെങ്കിലും അതിനു മുന്‍പ് കരട് വിജ്ഞാപനത്തിന്റെ കാലാവധി കഴിയുകയാണെങ്കില്‍ നിയമം പ്രാബല്യത്തില്‍ വരുമോയെന്ന ആശങ്കയുണ്ട്. അന്തിമ തീരുമാനം വൈകുന്നതിനാല്‍ സ്ഥലം വില്‍പ്പനയടക്കം നടക്കാതെ മലയോര മേഖല സാമ്പത്തിക മാന്ദ്യത്തിലുമാണ്. റിപ്പോര്‍ട്ടിന്റെ പരിധിയില്‍ വരുന്ന ആറു സംസ്ഥാനങ്ങളിലെയും പരിസ്ഥിതി മന്ത്രിമാരെ പങ്കെടുപ്പിച്ച് അടുത്ത മാസം യോഗം നടത്താനും തീരുമാനമായി.
ഇന്നലെ നടന്ന യോഗത്തില്‍ ഗുജറാത്ത്, ഗോവ, കര്‍ണാടകം സംസ്ഥാനങ്ങളിലെ പരിസ്ഥിതി മന്ത്രിമാരും മഹാരാഷ്ട്ര, തമിഴ്‌നാട്, കേരളം എന്നീ സംസ്ഥാനങ്ങളിലെ പ്രിന്‍സിപ്പല്‍ സെക്രട്ടറിമാരും പങ്കെടുത്തു.
റിപ്പോര്‍ട്ട് നടപ്പാക്കുന്നതിനെച്ചൊല്ലി ജനങ്ങള്‍ ആശങ്കപ്പെടേണ്ടതില്ലെന്നും ഉപജീവനത്തെ ബാധിക്കുന്ന യാതൊരു ഇടപെടലും ഉണ്ടാകില്ലെന്നും കേന്ദ്ര പരിസ്ഥിതി മന്ത്രി പ്രകാശ് ജാവ്‌ദേക്കര്‍ ഉറപ്പു നല്‍കുന്നുണ്ടെങ്കിലും ഇക്കാര്യത്തില്‍ ആശങ്ക നിലനില്‍ക്കുന്നു. റിപ്പോര്‍ട്ടില്‍ സൂചിപ്പിച്ച പരിസ്ഥിതി ദുര്‍ബല മേഖലയിലെ വാണിജ്യാടിസ്ഥാനത്തിലുള്ള ക്വാറികളുടെ പ്രവര്‍ത്തനം നിരോധിക്കുമെന്നും മലിനീകരണത്തിന് കാരണമാകുന്ന വ്യവസായ ശാലകള്‍ക്ക് പൂട്ടുവീഴുമെന്നും മന്ത്രി ഉറപ്പിച്ചുപറയുന്നുമുണ്ട്. ഇതൊരിക്കലും ചെറുകിട ക്വാറികളുടെ പ്രവര്‍ത്തനത്തെ ബാധിക്കില്ലെന്നും മന്ത്രി വ്യക്തമാക്കി. വ്യവസായശാലകളും മൈനിങ് മേഖലകളും തരംതിരിക്കുന്നതിലെ മാനദണ്ഡങ്ങളാണ് ആശങ്കയ്ക്കു കാരണമാകുന്നത്.
ജനങ്ങളുടെ ആശങ്ക കണക്കിലെടുത്ത് സംസ്ഥാന സര്‍ക്കാര്‍ നിയോഗിച്ച ഉമ്മന്‍ വി. ഉമ്മന്‍ കമ്മിറ്റി റിപ്പോര്‍ട്ട് തയ്യാറാക്കുകയും സംസ്ഥാന സര്‍ക്കാര്‍ വഴി കേന്ദ്ര പരിസ്ഥിതി മന്ത്രാലയത്തിനു സമര്‍പ്പിക്കുകയും ചെയ്തിരുന്നു. ഈ റിപ്പോര്‍ട്ട് ഇതുവരെ പുറത്തുവിട്ടിട്ടില്ല. ഈ റിപ്പോര്‍ട്ട് നിലനില്‍ക്കെയാണ് പരിസ്ഥിതി ദുര്‍ബല മേഖലകളെ തരംതിരിച്ച് വീണ്ടും റിപ്പോര്‍ട്ട് സമര്‍പ്പിക്കാന്‍ പരിസ്ഥിതി മന്ത്രാലയം ആവശ്യപ്പെട്ടിരിക്കുന്നത്.
കസ്തൂരിരംഗന്‍ റിപ്പോര്‍ട്ട് നടപ്പാക്കണമെന്നാണ് ആര്‍.എസ്.എസ്. ആവശ്യപ്പെട്ടിരുന്നത്. സംസ്ഥാന ബി.ജെ.പി. ഘടകത്തിന്റേതും ഇതേ നിലപാടായിരുന്നു. തദ്ദേശ ഭരണസ്ഥാപന തെരഞ്ഞെടുപ്പിലും തുടര്‍ന്നു വരുന്ന നിയമസഭാ തെരഞ്ഞടുപ്പിലും സംസ്ഥാനത്ത് നേട്ടം കൊയ്യാന്‍ പദ്ധതി തയാറാക്കുന്നതിനിടയില്‍ ബി.ജെ.പി. മലയോര ജനതയുടെ എതിര്‍പ്പിനിടയാക്കുന്ന തരത്തില്‍ റിപ്പോര്‍ട്ട് നടപ്പാക്കുമോയെന്നതു കണ്ടറിയണം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha