മലയാളി നേഴ്‌സുമാരെ പെരുവഴിയിലാക്കാന്‍ സൗദി: ജനറല്‍ നേഴ്‌സുമാരെ മുഴുവന്‍ പിരിച്ചു വിടുമെന്ന് സൂചന
നേഴ്‌സുമാര്‍ക്ക് ഇടിത്തീ വാര്‍ത്തയുമായി സൗദി. ഏറ്റവും കൂടുതല്‍ മലയാളി നഴ്‌സുമ്മാര്‍ ജോലി ചെയ്യുന്ന വിദേശ രാജ്യമാണ് സൗദി. വിദേശികളായ ജി.എന്‍.എം. നേഴ്‌സുമാരെ സൗദി ആരോഗ്യ മന്ത്രാലയം പിരിച്ചുവിടുമെന്ന് സൂചന. മലയാളികള്‍ അടക്കമുള്ള ആയിരക്കണക്കിന് നേഴ്‌സുമാര്‍ക്ക് ഇതോടെ ജോലി നഷ്ടമാകും. ബിഎസ്എസി നേഴ്‌സുമാരെ മാത്രം ഇനി നിയമിക്കാനാണ് നീക്കം. ഈ മാതൃക ഗള്‍ഫിലെ മറ്റ് രാജ്യങ്ങളും പിന്തുടരാന്‍ സാധ്യതയുണ്ട്. ഈ നീക്കം അതുകൊണ്ട് തന്നെ കേരളത്തിന് ഏറെ തിരിച്ചടിയാണ്. സ്വദേശികളുടെ എണ്ണം വര്‍ദ്ധിപ്പിക്കുകയാണ് അവരുടെ നീക്കം.
വിദേശ ആരോഗ്യ മന്ത്രാലയങ്ങള്‍ ജനറല്‍ നേഴ്‌സുമാര്‍ക്കു വിലക്ക് ഏര്‍പ്പെടുത്തുന്നത് നേരത്തെ തന്നെ തുടങ്ങിയിരുന്നു. രണ്ടു വര്‍ഷത്തിനു മേല്‍ പ്രവൃത്തിപരിചയമുള്ള ബി.എസ്‌സി. നേഴ്‌സുമാരെ മാത്രമാണ് പല രാജ്യങ്ങളും പുതുതായി ജോലിക്കെടുക്കുന്നത്. അടുത്തിടെ സൗദി, കുവൈത്ത്, ബഹ്‌റൈന്‍ ആരോഗ്യ മന്ത്രാലയങ്ങള്‍ നടത്തിയ അഭിമുഖങ്ങളില്‍ ഇവരെ മാത്രമാണു പരിഗണിച്ചത്. ഇതിന്റെ ചുവടു പിടിച്ചാണ് പുതിയ സര്‍ക്കുലര്‍ എത്തിയത്. ഇതോടെ ആശുപത്രികളാണ് വെട്ടിലായത്. ക്ലിനിക്കുകളും സ്വകാര്യ ആശുപത്രികളും മാത്രമാണ് നിലവില്‍ ജനറല്‍ നേഴ്‌സുമാരെ റിക്രൂട്ട് ചെയ്യുന്നത്. ഇതും വൈകാതെ നിലയ്ക്കുമെന്ന് റിക്രൂട്ട്‌മെന്റ് ചുമതലയുള്ള സര്‍ക്കാര്‍ ഏജന്‍സികള്‍ വ്യക്തമാക്കുന്നു.
ഡിപ്ലോമക്കാരായ വിദേശ നേഴ്‌സുമാരുടെ തൊഴില്‍ കരാറുകള്‍ പുതുക്കി നല്‍കില്ലെന്ന് ആശുപത്രികള്‍ക്കയച്ച സര്‍ക്കുലറില്‍ സൗദി ആരോഗ്യ മന്ത്രാലയം വ്യക്തമാക്കി. കരാര്‍ അവസാനിക്കുന്ന മുറയ്ക്ക് ജനറല്‍ നേഴ്‌സുമാരുടെ സേവനം അവസാനിപ്പിക്കും. ബിരുദധാരികളായ നേഴ്‌സുമാരുടെ കരാര്‍ മാത്രമേ പുതുക്കിനല്‍കൂ. സ്വദേശികളായ നേഴ്‌സുമാര്‍ക്കു തൊഴില്‍ നല്‍കുക എന്ന ലക്ഷ്യത്തോടെയാണ് സൗദി വിദേശ നേഴ്‌സുമാരെ ഒഴിവാക്കുന്നത്. 20000 പേരെ ആരോഗ്യ മേഖലയിലെ ഉന്നത പഠനത്തിനായി വിദേശത്തേക്കയയ്ക്കാന്‍ സൗദി അറേബ്യ നടപടി തുടങ്ങി. ഡോക്ടര്‍മാര്‍ക്കു പുറമേ നേഴ്‌സുമാര്‍ അടക്കമുള്ള പാരാമെഡിക്കല്‍ ജീവനക്കാരെയും ടെക്‌നീഷ്യന്മാരെയും തെരഞ്ഞെടുത്ത് വിദേശത്തു വിദഗ്ധ പരിശീലനം നല്‍കുന്നതാണു പദ്ധതി. പരിശീലനത്തിന് സ്‌കോളര്‍ഷിപ്പും അനുവദിച്ചിട്ടുണ്ട്. യു.എ.ഇയിലെ ആരോഗ്യ മേഖലയില്‍ പ്രവര്‍ത്തിക്കുന്നവരില്‍ 70 ശതമാനവും വിദേശികളാണെന്നാണ് ഔദ്യോഗിക കണക്ക്.
രണ്ടു മാസത്തില്‍ താഴെ കരാര്‍ കാലാവധി ശേഷിക്കുന്ന ജനറല്‍ നേഴ്‌സുമാരെ ഇക്കാര്യം രേഖാമൂലം അറിയിക്കണമെന്ന് ആരോഗ്യ മന്ത്രാലയം ആശുപത്രി അധികൃതര്‍ക്കു നിര്‍ദ്ദേശം നല്‍കി. എന്നാല്‍ ഇതു മൂലം വലിയ പ്രതിസന്ധി സൗദിയിലെ തൊഴില്‍ മേഖലയ്ക്കും ഉണ്ടാകും. ഒറ്റയടിക്ക് നേഴ്‌സുമാരുടെ കുറവ് അനുഭവപ്പെടും. ഇന്ത്യയില്‍ നഴ്‌സുമാരെ റിക്രൂട്ട് ചെയ്യുന്നതിന് കര്‍ശന വ്യവസ്ഥകള്‍ നിലവിലുണ്ട്. അതുകൊണ്ട് തന്നെ പിരിച്ചു വിടുന്നവര്‍ക്ക് പകരക്കാരെ കണ്ടെത്തുക പ്രയാസവുമാണ്. ഇതെല്ലാം ഉയര്‍ത്തി തീരുമാനം പിന്‍വലിക്കാനുള്ള ശ്രമവും ചില ആശുപത്രികള്‍ ചെയ്യുന്നുണ്ട്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
