സി.ബി.എസ്.ഇ അഖിലേന്ത്യ പ്രീമെഡിക്കല്‍ പരീക്ഷയില്‍ ഹരിയാന സ്വദേശിയായ വിപുല്‍ ഗാര്‍ഗ് ഒന്നാം റാങ്ക് നേടി. വിപുലിന്റെ പിതാവ് ജിന്ദിലെ ബാഗ് കച്ചവടക്കാരനാണ്. രണ്ടാം റാങ്ക് രാജസ്ഥാന്‍ സ്വദേശിനിയായ ഖുശി തിവാരിയ്ക്കാണ്. റിസര്‍വേഷനില്ലാത്ത ക്യാറ്റഗറിയില്‍ നിന്നുള്ളവരാണ് ഒന്നും രണ്ടും സ്ഥാനക്കാര്‍.

വിപുലിന് പന്ത്രണ്ടാം ക്ലാസില്‍ 90 ശതമാനം മാര്‍ക്കാണ് ലഭിച്ചത്. തന്നെ പഠിപ്പിക്കാന്‍ മാതാപിതാക്കള്‍ ഏറെ ബുദ്ധിമുട്ടിയിട്ടുണ്ടെന്നും താന്‍ ഡോക്ടറാകണമെന്നത് അവരുടെ വലിയ ആഗ്രഹമാണെന്നും വിപുല്‍ പറഞ്ഞു. തനിക്ക് കാര്‍ഡിയോളജിസ്‌റ്റോ ന്യൂറോളജിസ്‌റ്റോ ആകണമെന്നാണ് ആഗ്രഹമെന്നും തന്റെ വിജയത്തിന്റെ രഹസ്യം ഏകാഗ്രതയും ഫോക്കസുമാണെന്നും വിപുല്‍ പറഞ്ഞു.

ചോദ്യക്കടലാസ് ചോര്‍ന്നതിനാലും ഉത്തരസൂചിക പ്രചരിച്ചതിനാലും 2015 മെയ് മൂന്നാം തീയതി നടത്തിയ പരീക്ഷ സുപ്രീം കോടതി റദ്ദാക്കിയിരുന്നു. ജൂലായ് 25ന് വീണ്ടും പരീക്ഷ നടത്തിയപ്പോള്‍ തനിക്ക് കുറച്ച് ടെന്‍ഷന്‍ തോന്നിയിരുന്നെങ്കിലും മാതാപിതാക്കളുടേയും അദ്ധ്യാപകരുടേയും എല്ലാവിധ പിന്തുണയും തനിക്കുണ്ടായിരുന്നെന്ന് വിപുല്‍ പറഞ്ഞു.

ന്യൂഡല്‍ഹിയിലെ മൗലാന ആസാദ് മെഡിക്കല്‍ കോളേജില്‍ ചേര്‍ന്ന് പഠിക്കണമെന്നും അവിടെ നിന്നും ജിന്ദിലെത്തി പ്രാക്ടീസ് ചെയ്യണമെന്നുമാണ് തന്റെ ആഗ്രഹം. കുറഞ്ഞ ചെലവില്‍ ചികിത്സ നല്‍കി തന്റെ പ്രദേശത്തുള്ള ജനങ്ങളെ സഹായിക്കണമെന്നാണ് തന്റെ ആഗ്രഹമെന്നും വിപുല്‍ കൂട്ടിച്ചേര്‍ത്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha