തനിക്കെതിരെ കൈക്കൊണ്ട അച്ചടക്ക നടപടിക്കെതിരെ കടുത്ത പ്രതിഷേധവുമായി പ്രേംകുമാര്‍ രംഗത്തെത്തി. തന്നെ സ്ഥാനത്തുനിന്ന് പുറത്താക്കിയത് ഇരട്ടനീതിയാണെന്നും രാഷ്ട്രീയമായ വിവേചനമാണ് ഇതിന് പിന്നിലെന്നും അദ്ദേഹം ആരോപിച്ചു. സച്ചിദാനന്ദന്‍ ഗുരുതരമായ പ്രസ്താവനയാണ് നടത്തിയത്. എന്നിട്ടും അക്കാദമി ചെയര്‍മാന്‍ സ്ഥാനത്ത് തുടരുന്നു.

ആശാ വര്‍ക്കര്‍മാരുടെ സമരത്തെ അനുകൂലിച്ച പരാമര്‍ശമാണ് തന്നെ പുറത്താക്കാന്‍ കാരണം. എന്താണ് സംഭവിച്ചതെന്ന് ഔദ്യോഗിക അറിയിപ്പ് ലഭിച്ചിട്ടില്ല. ആശാസമര പരാമര്‍ശമാണ് കാരണമെന്ന് മാധ്യമങ്ങളില്‍ നിന്നാണ് അറിഞ്ഞത്. നടത്തിയത് സദുദ്ദേശപരമായ അഭിപ്രായമാണെന്നും പ്രേംകുമാര്‍.

സാമാന്യമായ നീതി നിഷേധം നടന്നു. ഇരട്ട നീതിയാണ് നടന്നത്. 35 വര്‍ഷമായി ഇടതുപക്ഷ അനുഭാവിയാണ്. കൊടിയേരി സഖാവാണ് തന്നെ വൈസ് ചെയര്‍മാനാകാന്‍ നിര്‍ബന്ധിച്ചത്. 15000 രൂപയായിരുന്നു ഓണറേറിയം. സിനിമപോലും മാറ്റിവച്ച് പ്രവര്‍ത്തിച്ചു. അത്രയും അര്‍പ്പണ ബോധത്തോടെ പ്രവര്‍ത്തിച്ച ഇടത്തുനിന്ന് പറഞ്ഞുവിടുമ്പോള്‍ അതിനൊരു മാന്യതവേണമായിരുന്നെന്നും അദ്ദേഹം പറഞ്ഞു.

മാറ്റുന്നതും പുറത്താക്കുന്നതുമൊക്കെ സര്‍ക്കാര്‍ തീരുമാനം. യാത്രയപ്പ് നല്‍കാന്‍ പോലും തയ്യാറായില്ല. സച്ചിദാനന്ദന്‍ മാഷിനോട് ബഹുമാനം മാത്രം. താരതമ്യം ചെയ്യാനില്ല. വരേണ്യതയോടുള്ള വിനീതത്വമാണോ വിധേയത്വമാണോ എന്നറിയില്ല. മനുഷ്യനായതിനാല്‍ എന്റെ അഭിപ്രായം പറഞ്ഞെന്ന് മാത്രം. അതൃപ്തിയുടെ വിഷയമല്ലെന്നും ഒരു ഘട്ടം വന്നപ്പോള്‍ പറഞ്ഞുവെന്നും പ്രേംകുമാര്‍ പറഞ്ഞു.