ആലിന് മോള്ക്ക് സര്ക്കാരിന്റെ ആദരം, ഔദ്യോഗിക ബഹുമതികള് നല്കി ആലിന് മോളെ കേരളം യാത്രയാക്കും
സംസ്ഥാനത്തെ ഏറ്റവും പ്രായം കുറഞ്ഞ അവയവദാതാവാണ് ആലിന്. കരള്, രണ്ട് വൃക്കകള്, ഹൃദയവാല്വ്, രണ്ട് നേത്രപടലങ്ങള് എന്നിവയാണ് ആലിന് ദാനം ചെയ്തത്. വേര്പാടിലും അഞ്ചുപേര്ക്ക് പുതുജീവിതം നല്കി കേരളത്തിന്റെ നൊമ്പരമായി മാറിയിരിക്കുകയാണ് പത്തുമാസം പ്രായമുള്ള ആലിന് ഷെറിന് എബ്രഹാം. കോട്ടയത്തുണ്ടായ വാഹനാപകടത്തില് മസ്തിഷ്ക മരണം സംഭവിച്ച ആലിന്റെ അവയവങ്ങള് ദാനം ചെയ്യാന് മാതാപിതാക്കള് എടുത്ത തീരുമാനം കേരളത്തിന് വലിയൊരു മാതൃകയാണെന്ന് മുഖ്യമന്ത്രി പിണറായി വിജയന് പറഞ്ഞു.
രാത്രിയായതിനാല് ഹെലികോപ്റ്റര് യാത്രയ്ക്ക് അനുമതി ലഭിക്കാത്ത സാഹചര്യത്തില് റോഡ് മാര്ഗമാണ് അവയവങ്ങള് കൊച്ചിയില് നിന്നും തിരുവനന്തപുരത്തെത്തിച്ചത്. പൊലീസ് സേനയുടെ കൃത്യമായ ഇടപെടലിലൂടെ ഗതാഗതം സുഗമമാക്കിയാണ് അതിവേഗം അവയവങ്ങള് ആശുപത്രികളില് എത്തിച്ചത്. ബന്ധുക്കളുടെ താല്പര്യം പരിഗണിച്ച് കോട്ടയം മെഡിക്കല് കോളേജില് രാത്രി തന്നെ പോസ്റ്റ്മോര്ട്ടം നടപടികള് പൂര്ത്തിയാക്കാന് പ്രത്യേക സജ്ജീകരണങ്ങള് ഒരുക്കിയിരുന്നുവെന്ന് മുഖ്യമന്ത്രി പറഞ്ഞു.
ആലിനില് നിന്നും സ്വീകരിച്ച അവയവങ്ങള് നിലവില് രണ്ട് കുഞ്ഞുങ്ങള്ക്കാണ് നല്കിയത്. അവരുടെ ആരോഗ്യനില മെച്ചപ്പെട്ടു വരുന്നതായാണ് ആശുപത്രി അധികൃതര് നല്കുന്ന വിവരം. ഈ ഉദ്യമത്തില് പങ്കാളികളായ ആരോഗ്യപ്രവര്ത്തകര്, പൊലീസ് ഉദ്യോഗസ്ഥര്, ആംബുലന്സ് െ്രെഡവര്മാര് എന്നിവരെ മുഖ്യമന്ത്രി അഭിനന്ദിച്ചു. സര്ക്കാര്സ്വകാര്യ മേഖലകള് തമ്മിലുള്ള മികച്ച ഏകോപനം ഈ ദൗത്യം വിജയകരമാക്കാന് സഹായിച്ചുവെന്നും അദ്ദേഹം ചൂണ്ടിക്കാട്ടി.
തീരാനോവിനിടയിലും അവയവദാനത്തിന് തയ്യാറായ അരുണ് എബ്രഹാമിന്റേയും ഷെറിന് ആന് ജോണിന്റേയും തീരുമാനം മഹത്തരമാണ്. കേരള സമൂഹത്തിന് മുന്നില് അവര് വലിയൊരു മാതൃകയാണ് സൃഷ്ടിച്ചിരിക്കുന്നത്. ആലിന്റെ കുടുംബത്തിന്റെയും നാടിന്റെയും ദുഃഖത്തില് പങ്കുചേരുന്നതായും, ഔദ്യോഗിക ബഹുമതികളോടെ കുഞ്ഞിനെ നാട് യാത്രയാക്കുമെന്നും മുഖ്യമന്ത്രി അറിയിച്ചു.
https://www.facebook.com/Malayalivartha
