കോണ്‍ഗ്രസ് വീണ്ടും അധികാരത്തിലെത്തിയാല്‍ പഞ്ചാബില്‍ വീട്ടമ്മമാര്‍ക്ക് മാസം 2000 രൂപ വീതം നല്‍കുമെന്ന് പിസിസി അധ്യക്ഷന്‍ നവ്‌ജോത് സിങ് സിദ്ദു. മാത്രമല്ല വീട്ടമ്മമാര്‍ക്ക് ഒരു വര്‍ഷത്തേക്ക് എട്ട് വീതം സൗജന്യ എല്‍പിജി ഗ്യാസ് സിലിണ്ടറുകള്‍ നല്‍കുമെന്നും നവജോത് സിങ് സിദ്ദു പറഞ്ഞു.

കോളേജ് വിദ്യാര്‍ഥിനികള്‍ക്ക് ഇലക്ട്രിക് സ്‌കൂട്ടര്‍ നല്‍കും. പന്ത്രണ്ടാം ക്ലാസ് പാസാകുന്ന പെണ്‍കുട്ടികള്‍ക്ക് 20,000 രൂപയും പത്ത് പാസാകുന്ന കുട്ടികള്‍ക്ക് 15,000 രൂപയും അഞ്ചാം ക്ലാസിന് മുകളിലുള്ളവര്‍ക്ക് 5000 രൂപയും നല്‍കുമെന്ന് പഞ്ചാബ് കോണ്‍ഗ്രസ് അധ്യക്ഷന്‍ അറിയിച്ചു.

ഉന്നത പഠനത്തിന് പോകുന്ന പെണ്‍കുട്ടികള്‍ക്ക് പലിശരഹിത ലോണ്‍ അനുവദിക്കും. ഓരോ ജില്ലകള്‍ കേന്ദ്രീകരിച്ച് സ്ത്രീകള്‍ക്ക് പ്രത്യേക നൈപുണ്യ പരിശീലന കേന്ദ്രങ്ങള്‍ ആരംഭിക്കും.

രണ്ട് മുതല്‍ 16 ലക്ഷം വരെയുള്ള ലോണ്‍ അനുവദിക്കുമെന്നും സിദ്ദു അറിയിച്ചു. പഞ്ചാബ് അര്‍ബന്‍ എംപ്ലോയ്‌മെന്റ് ഗ്യാരന്റി മിഷന്‍ പ്രകാരം സ്ത്രീകള്‍ക്കായി 33 ശതമാനം തൊഴില്‍ സംവരണം ഏര്‍പ്പെടുത്തും. സ്ത്രീ സുരക്ഷക്കായി പ്രത്യേക വനിത കമാന്‍ഡോ ബറ്റാലിയന്‍ നിയമിക്കുമെന്നും സിദ്ദു പറഞ്ഞു.