അന്താരാഷ്ട്രതലത്തിലുള്ള രക്ഷപ്പെടുത്തല്‍ ശ്രമങ്ങളും പ്രാര്‍ഥനകളും എല്ലാം വിഫലമായി. അന്‍സര്‍ ഇഖ്ബാലിനെ പാകിസ്താന്‍ തൂക്കിക്കൊന്നു. അയല്‍വാസിയെ കൊലപ്പെടുത്തിയെന്നാണ് അന്‍സര്‍ ഇഖ്ബാലിനെതിരായ കേസ്. 16 വര്‍ഷം മുമ്പ് ക്രിക്കറ്റ് കളിക്കിടെയുണ്ടായ തര്‍ക്കത്തിനിടയിലാണ് സംഭവം. വീട്ടില്‍ തോക്കുസൂക്ഷിച്ചു എന്ന കുറ്റവും പോലീസ് ഇഖ്ബാലിനുമേല്‍ ചുമത്തി.
എന്നാല്‍, സംഭവം നടക്കുമ്പോള്‍ ഇഖ്ബാലിന് 15 വയസ്സേ ഉണ്ടായിരുന്നുള്ളൂവെന്നും അതിനാല്‍ത്തന്നെ വധശിക്ഷയില്‍നിന്ന് ഒഴിവാക്കണമെന്നും അഭിഭാഷകര്‍ വാദിച്ചെങ്കിലും കോടതി ശിക്ഷ നടപ്പാക്കാന്‍ അനുവദിക്കുകയായിരുന്നു.

പതിനഞ്ചാംവയസ്സില്‍ ചെയ്ത കുറ്റത്തിന് വധശിക്ഷ നല്‍കിയതിനെതിരെ അന്താരാഷ്ട്രസമൂഹവും രംഗത്തെത്തിയിരുന്നു. കുറ്റംചെയ്ത സമയത്ത് ഇഖ്ബാല്‍ കുട്ടിയായിരുന്നെന്നും വിചാരണവേളയില്‍ ഇക്കാര്യങ്ങളെല്ലാം തെളിയിക്കാന്‍ വേണ്ട രേഖകള്‍ ഹാജരാക്കിയെങ്കിലും കോടതി പ്രോസിക്യൂഷന്റെ തെളിവുകള്‍മാത്രമേ കണക്കിലെടുത്തുള്ളൂവെന്ന് ബ്രിട്ടീഷ് നിയമസഹായഗ്രൂപ്പ് പറഞ്ഞു.
കുറ്റം ചെയ്യുന്ന സമയത്ത് ഇഖ്ബാലിന് 20 വയസ്സ് ഉണ്ടായിരുന്നെന്നാണ് പോലീസ് രേഖ. ചൊവ്വാഴ്ച രാവിലെയാണ് സര്‍ഗോധ നഗരത്തില്‍ വധശിക്ഷ നടപ്പാക്കിയത്. മൃതദേഹം ബന്ധുക്കള്‍ക്ക് വിട്ടുകൊടുത്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha