മുസ്ലീങ്ങളെ സംബന്ധിച്ചിടത്തോളം ആഘോഷത്തിന്റെ സമയമാണ് ഈദ് ദിനം. എന്നാല്‍ ജമ്മു-കാശ്മീരിലെ പുല്‍വാമ ജില്ലയിലുള്ള വാലിബുഗ് ഗ്രാമത്തിലെ മുസ്ലീങ്ങള്‍ ഇത്തവണ ഈദ് ആഘോഷിച്ചില്ല.

ആ ദിവസം തങ്ങളുടെ അയല്‍വാസിയായ രാമചന്ദ് കൗള്‍ എന്ന കാശ്മീരി പണ്ഡിറ്റിന്റെ (കാശ്മീരി ഹിന്ദു ) നിര്യാണത്തില്‍ അനുശോചിക്കുകയായിരുന്നു. കൗളിന്റെ സംസ്‌കാരചടങ്ങുകള്‍ നടത്താന്‍ വേണ്ട നടപടികളെല്ലാം ചെയ്തതും ശവമഞ്ചം ചുമന്ന് ശ്മശാനത്തില്‍ എത്തിച്ചതും അവരായിരുന്നു.

തങ്ങളുടെ അയല്‍വാസികളായ മുസ്ലീങ്ങളുടെ പ്രവര്‍ത്തി തന്നെ ഏറെ സ്പര്‍ശിച്ചതായി കൗളിന്റെ മകന്‍ വിനോദ് പറഞ്ഞു. ഈദ് സമയത്ത് അവരെല്ലാം തിരക്കിലാകുന്ന സമയമായിരുന്നെന്നും എന്നിട്ടും അതൊക്കെ അവഗണിച്ച് അവര്‍ തന്റെ അച്ഛന്റെ അന്തിമോപചാരങ്ങള്‍ അര്‍പ്പിക്കാന്‍ എത്തുമെന്ന് താന്‍ പ്രതീക്ഷിച്ചതേയില്ലെന്നും അദ്ദേഹം വ്യക്തമാക്കി.

ഇരുപത്തിയഞ്ച് വര്‍ഷം മുമ്പ് പുല്‍വാമയില്‍ കൂട്ടക്കുടിയൊഴിപ്പിക്കല്‍ നടത്തിയപ്പോള്‍ ആയിരക്കണക്കിന് പണ്ഡിറ്റുകള്‍ അവിടെ നിന്നും മാറിത്താമസിച്ചു. അപ്പോഴും അവിടെ നിന്നും പോകാന്‍ തയ്യാറാകാതിരുന്ന വ്യക്തിയായിരുന്നു രാമചന്ദ് കൗള്‍. ഇദ്ദേഹത്തോടൊപ്പം ഏഴ് പണ്ഡിറ്റ് കുടുംബങ്ങളും താഴ്‌വരയിലെ വാലിബുഗ് ഗ്രാമത്തില്‍ നിന്നും കുടിയൊഴിയാന്‍ തയ്യാറായില്ല.

ഇരു സമൂഹങ്ങളും തമ്മിലുള്ള ബന്ധം വളരെ ദൃഢമാണെന്നും അവ അത്ര എളുപ്പം തകര്‍ക്കാനാകില്ലെന്നുമാണ് കൗളിന്റെ അയല്‍വാസിയായ ഗുലാം റസൂല്‍ പറയുന്നത്. തങ്ങള്‍ അവരെ സ്വന്തം സഹോദരന്മാരെ പോലെ സംരക്ഷിക്കുമെന്നും അവരോടൊപ്പം ഒന്നിച്ച് ആഘോഷിക്കുകയും അവരുടെ ദുഃഖത്തില്‍ പങ്കു ചേരുകയും ചെയ്യുമെന്നും അദ്ദേഹം വ്യക്തമാക്കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha