മഹാത്മാ ഗാന്ധിയുടെ ഘാതകന്‍ വിനായക് നാഥുറാം ഗോഡ്‌സെയെ തൂക്കിലേറ്റിയ ദിവസമായ നവംബര്‍ 15 ബലിദാന ദിനമായി ആചരിയ്ക്കുമെന്ന ഹിന്ദുമഹാസഭ. ഗോഡ്‌സെയ്ക്ക് അമ്പലങ്ങള്‍ പണിയുമെന്ന ഹിന്ദുമഹാസഭയുടെ പ്രഖ്യാപനം നേരത്തെ വലിയ വിവാദമായിരുന്നു. ഹിന്ദുമഹാസഭ പ്രസിഡന്റ് ചന്ദ്രപ്രകാശ് കൗശിക്കാണ് രാജ്യവ്യാപകമായി ബലിദാന്‍ ദിവസ് ആചരിയ്ക്കുമെന്ന് പ്രഖ്യാപിച്ചത്. ഗാന്ധിയേക്കാള്‍ ദേശസ്‌നേഹിയായിരുന്നു ഗോഡ്‌സെയെന്ന് ചന്ദ്രപ്രകാശ് കൗശിക് പറഞ്ഞു. രാജ്യത്തെ വലിയൊരു വിഭാഗം ജനങ്ങള്‍ അങ്ങനെയാണ് കരുതുന്നതെന്നും കൗശിക് അഭിപ്രായപ്പെട്ടു. ഗോഡ്‌സെ എന്തിന് ഗാന്ധിയെ വധിച്ചുവെന്ന് ചിന്തിയ്ക്കാനുള്ള ദിവസമാണ് നവംബര്‍ 15 എന്നും ഒരു ഇംഗ്ലീഷ് ദിനപത്രവുമായുള്ള അഭിമുഖത്തില്‍ ചന്ദ്രപ്രകാശ് കൗശിക് പറഞ്ഞു.
ഗോഡ്‌സെയുടെ \'ബലിദാന\' ദിനത്തില്‍ വിദ്യാര്‍ത്ഥികള്‍ ഗോഡ്‌സെയുടെ ജീവിതം ആസ്പദമാക്കി നാടകങ്ങള്‍ അവതരിപ്പിയ്ക്കുമെന്നും ഹിന്ദുമഹാസഭ നേതാവ് പറഞ്ഞു. ഗാന്ധിവധക്കേസിന്റെ വിചാരണ സമയത്ത് ഗോഡ്‌സെ കോടതിയില്‍ നടത്തിയ പ്രസ്താവന ഹിന്ദുമഹാസഭ പ്രചരിപ്പിയ്ക്കും. നാഥുറാം ഗോഡ്‌സെയുടെ സഹോദരനും ഗാന്ധി വധക്കേസില്‍ ജീവപര്യന്തം തടവിന് ശിക്ഷിയ്ക്കപ്പെട്ടയാളുമായ ഗോപാല്‍ ഗോഡ്‌സെയുടെ \'ഗാന്ധി വധം എന്തുകൊണ്ട്\' എന്ന പുസ്തകത്തിന്റെ കോപ്പികള്‍ മഹാസഭ പ്രവര്‍ത്തകര്‍ വിതരണം ചെയ്യും.1949 നവംബര്‍ 15ന് പഞ്ചാബിലെ അംബാല ജയിലിലാണ് ഗാന്ധി ഘാതകനായ നാഥുറാം ഗോഡ്‌സെയുടേയും ഗൂഢാലോചനയില്‍ പ്രധാന പങ്ക് വഹിച്ച നാരായണ്‍ ആപ്‌തെയുടേയും വധശിക്ഷ നടപ്പാക്കിയത്‌.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha