പുരകത്തുമ്പോള്‍ വാഴവെട്ടുന്ന ശൈലിയുമായി മഹാരാഷ്ട്ര സര്‍ക്കാര്‍. കൃഷി നാശത്തില്‍ നാടൊട്ടുക്ക് കര്‍ഷകര്‍ ആത്മഹത്യ ചെയ്യുമ്പോള്‍ ഡാന്‍സ് പാര്‍ട്ടിക്ക് സഹായവുമായി ഫഡ്‌നാവിസ് സര്‍ക്കാര്‍. വിദേശത്ത് നൃത്ത പരിപാടിയില്‍ പങ്കെടുക്കാന്‍ ഡാന്‍സ്ഗ്രൂപ്പിന് ദുരിതാശ്വാസ നിധിയില്‍ നിന്നും പണം അനുവദിച്ച് മഹാരാഷ്ട്ര സര്‍ക്കാര്‍ വിവാദത്തില്‍. വരള്‍ച്ചയും കൃഷിനാശവും കൊണ്ട് കര്‍ഷകര്‍ വലയുമ്പോള്‍ സര്‍ക്കാര്‍ ഉദ്യോഗസ്ഥന് പങ്കാളിത്തമുള്ള നൃത്തസംഘത്തിന് തായ്‌ലന്റില്‍ മത്സരത്തില്‍ പങ്കെടുക്കാന്‍ മുഖ്യമന്ത്രിയുടെ ദുരിതാശ്വാസ നിധിയില്‍ നിന്നും എട്ടു ലക്ഷം രൂപ അനുവദിച്ചാണ് ദേവേന്ദ്ര ഫഡ്‌നാവീസ് വിവാദത്തില്‍ തലയിട്ടത്.
ഡിസംബര്‍ 26 മുതല്‍ 30 വരെ ബാങ്കോക്കിലും തായ്‌ലന്റിലും നടക്കുന്ന നൃത്ത പരിപാടിയില്‍ സാഞ്ചിവാലയ ജിംഖാന എന്ന 15 അംഗ നൃത്ത സംഘത്തിന് പങ്കെടുക്കാനായിരുന്നു പണം അനുവദിച്ചത്. സംസ്ഥാനം വരള്‍ച്ചയില്‍ വറുതി അനുഭവിക്കുമ്പോള്‍ ഫഡ്‌നാവീസിന്റെ നടപടി വിവാദത്തിലായിട്ടുണ്ട്. പൊതുപ്രവര്‍ത്തകനായ അനില്‍ ഗല്‍ഗാലിയാണ് വിവരാവകാശ രേഖയിലൂടെ ഇക്കാര്യം പുറത്തു കൊണ്ടുവന്നത്. നടപടിയിലൂടെ ഫഡ്‌നാവീസ് അധികാര ദുര്‍വിനിയോഗമാണ് നടത്തിയതെന്ന് ഗല്‍ഗാലി ആരോപിച്ചു.
പ്രകൃതിക്ഷോഭം അനുഭവിക്കുന്നവര്‍ക്ക് സഹായം നല്‍കാനുള്ള ഫണ്ടില്‍ നിന്നാണ് പണം നല്‍കിയതെന്നും വിവരാവകാശ രേഖയില്‍ പറഞ്ഞിട്ടുണ്ട്. വിളനാശം സംഭവിച്ചതിലൂടെ മഹാരാഷ്ട്രയില്‍ 14,708 ഗ്രാമങ്ങളാണ് വറുതിയില്‍ ബുദ്ധിമുട്ടുന്നത്. ഇത് 50 ശതമാനത്തില്‍ താഴെയാണെന്ന് കൃഷിമന്ത്രിയും പറയുന്നു. ഈ വര്‍ഷം 75 ശതമാനം പോലും കാലവര്‍ഷം കിട്ടിയില്ല എന്നത് 189 താലൂക്കുകളില്‍ കാര്യങ്ങള്‍ ദുരിതമാക്കിയിട്ടുണ്ട്. ഗ്രാമങ്ങളില്‍ 8,522 ഇടങ്ങളിലും വരള്‍ച്ച പ്രഖ്യാപിച്ചിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha