കേരളാ ഹൗസില് പശുവിറച്ചിയുണ്ടെന്നാരോപിച്ച് ഒരു സംഘമെത്തി സംഘര്ഷത്തിനിടയാക്കി, ബീഫ് വിളമ്പുന്നത് നിര്ത്തിവെച്ച് അധികൃതര്
കേരളാ ഹൗസില് പശുവിറച്ചിയാണ് ഊണിനൊപ്പം വിളമ്പുന്നതെന്ന് ആരോപിച്ച് മൂന്നംഗ സംഘം എത്തിയതു സംഘര്ഷത്തിനിടയാക്കി. ഡല്ഹി പോലീസ് സ്ഥലത്തെത്തി പരിശോധന നടത്തിയെങ്കിലും ഒന്നും കണ്ടെത്താനായില്ല. തല്ക്കാലത്തേക്ക് കേരള ഹൗസില് ഭക്ഷണത്തിനൊപ്പം പോത്തിറച്ചി ഉണ്ടാകില്ലെന്ന് അധികൃതര് അറിയിച്ചു.
കേരളാ ഹൗസിലെ ഭക്ഷണശാലയിലെ വിലവിവരപ്പട്ടികയില് മറ്റുള്ള ഭക്ഷണസാധനങ്ങളുടെ വിവരങ്ങള് ഇംഗ്ലീഷിലും ബീഫ് എന്നത് മലയാളത്തിലുമാണ് എഴുതിയിട്ടുള്ളത്. ഉച്ചയോടെ ഒരു മലയാളി ഉള്പ്പെടെയുള്ള മൂന്നംഗ സംഘം എത്തി ഭക്ഷണം കഴിച്ച ശേഷം വിലവിവരപ്പട്ടിക മൊബൈല് കാമറയില് പകര്ത്തി. സംഘത്തിലെ രണ്ടു പേര് കര്ണാടക സ്വദേശികളാണെന്ന് അറിയുന്നു. ഫോട്ടോ എടുത്തതിടെ തുടര്ന്ന് ജീവനക്കാരുമായി സംഘര്ഷമുണ്ടായി. ഇതിനിടെ ഇവര് ഓടി രക്ഷപ്പെട്ടു.
കര്ണാടക സ്വദേശിയായ യുവാവ് വൈകിട്ട് നാലരയോടെ വീണ്ടും സ്റ്റാഫ് കാന്റീനിലെത്തി ഫോട്ടോ എടുക്കാന് ശ്രമിച്ചതോടെ കേരളാ ഹൗസ് ജീവനക്കാരുമായി വാക്കേറ്റമുണ്ടായി. ജീവനക്കാര് ഇയാളെ മര്ദിച്ചതായും പരാതിയുണ്ട്. പോലീസ് വാഹനത്തിലാണ് ഇയാളെ കേരളാ ഹൗസ് വളപ്പിനു പുറത്തെത്തിച്ചത്.
ഇതിനു ശേഷം പോലീസ് സംഘം കേരളാ ഹൗസിലെ സമൃദ്ധി സ്റ്റാഫ് കാന്റീനിലെത്തി പരിശോധന നടത്തുകയായിരുന്നു. അടുക്കളയില് കയറി പരിശോധന നടത്തിയെങ്കിലും ഒന്നും കണ്ടെത്താനായില്ല. പോത്തിറച്ചി മാത്രമാണു വിളമ്പുന്നതെന്നും പശുവിറച്ചി ഉപയോഗിക്കുന്നില്ലെന്നും അധികൃതര്.
ഡല്ഹിയില് പോത്തിറച്ചിക്കു നിരോധനമില്ല. സംഘര്ഷം ഉണ്ടായ സാഹചര്യത്തില് സ്റ്റാഫ് കാന്റീനില് തല്ക്കാലം ബീഫ് വേണ്ടെന്നു തീരുമാനിക്കുകയായിരുന്നു.
https://www.facebook.com/Malayalivartha
