മരിക്കാന്‍ ആര്‍ക്കും കഴിയും, എന്നാല്‍ അഭിമാനത്തോടെ ജീവിക്കാന്‍ വളരെ കുറച്ചുപേര്‍ക്ക് മാത്രമേ സാധിക്കൂ. ഇത്തരക്കാരെയാണ് നാം വിജയികളെന്ന് വിളിക്കുന്നതെന്ന് രാമചന്ദ്രന്‍ പറയുന്നു.
ഇങ്ങനെ ചിന്തിക്കുന്ന ഒരാള്‍ക്ക് മുന്നില്‍ എന്ത് പ്രതിസ്ന്ധിക്ക് നിലനില്‍ക്കാനും. അശുഭ പ്രതീക്ഷ ഒരു യുദ്ധവും വിജയിപ്പിച്ചിട്ടില്ലെന്ന തിരിച്ചറിവില്‍ ഒറ്റക്കാലുമായി ജീവിതത്തോട് പൊരുതുന്ന ഒരു കര്‍ഷകനുണ്ട് രാജസ്ഥാനില്‍. ജീവിതം മടുത്ത് ഒരിക്കല്‍ ആത്മഹത്യയെക്കുറിച്ചുപോലും ചിന്തിച്ച ഈ കര്‍ഷകന്റെ പോരാട്ടത്തിന്റെ കഥ രാജ്യത്തെ ഏതൊരു വ്യക്തിയെയും നിരാശയില്‍നിന്ന് കൈപിടിച്ച് കയറ്റുന്നതാണ്.
രാജസ്ഥാനിലെ ശ്രീ ഗംഗാനഗര്‍ ജില്ലയിലാണ് രാമചന്ദ്രന്‍ എന്ന കര്‍ഷകന്റെ താമസം. വര്‍ഷങ്ങളായി രാമചന്ദ്രനെ നട്ടെല്ലു നിവര്‍ത്തി നില്‍ക്കാന്‍ സഹായിക്കുന്നത് തന്റെ വലത് കാലാണ്. വര്‍ഷങ്ങള്‍ക്ക് മുമ്പ് ഇടതുകാല്‍ മുട്ടിന് മുകളില്‍നിന്നും ഇയാള്‍ക്ക് നഷ്ടപ്പെട്ടിരുന്നു. ഒരു കാലേ ഉള്ളുവെങ്കിലും ഇന്ന് രാമചന്ദ്രന് തന്റെ ജീവിതത്തെ പരസഹായമില്ലാതെ നടന്നുതീര്‍ക്കാന്‍ സഹായിക്കുന്നതും ഇതേ ഒറ്റക്കാലുതന്നെ.
കര്‍ഷകനായ രാമചന്ദ്രന്‍ കഴിഞ്ഞ 18 വര്‍ഷങ്ങളായി മണ്ണില്‍ പണിയെടുക്കുന്നു. അതും ഒറ്റക്കാലില്‍ നിന്നുകൊണ്ട്. ജോലിയില്‍ സഹായിക്കുന്നതിനൊ, എന്തിന് എഴുന്നേറ്റ് നില്‍ക്കുന്നതിനോപോലും താന്‍ ആരുടെയും സഹായം അഭ്യര്‍ത്ഥിക്കാറില്ലെന്ന് രാമചന്ദ്രന്‍ പറയുന്നു. നിലം കിളയ്ക്കുന്നതും കൃഷി നനയ്ക്കുന്നതുമെല്ലാം രാമചന്ദ്രന്‍ ഒറ്റക്കാലില്‍ നിന്നുതന്നെ.
രാജ്യത്ത് കര്‍ഷക ആത്മഹത്യകള്‍ കൂടുമ്പോള്‍ ഒറ്റക്കാലനായ തനിക്ക് ഇവിടെ യാതൊന്നും ചെയ്യാനില്ലെന്ന തിരിച്ചറിവ് രാമചന്ദ്രനെ ഒരുകാലത്ത് ഭയപ്പെടുത്തിയിരുന്നു. കുടുംബത്തിന് ഭാരമാകാതെ ആത്മഹത്യയെ ശരണം പ്രാപിക്കാമെന്നുപോലും ഈ കര്‍ഷകന്‍ ചിന്തിച്ചിരുന്നു. എന്നാല്‍ തന്റെ കാലശേഷം കുടുംബത്തിന്റെ ഭാവിയോര്‍ത്തപ്പോള്‍ മരണത്തെ താന്‍ ഭയപ്പെട്ടുവെന്ന് രാമചന്ദ്രന്‍ പറയുന്നു.
പിന്നീടങ്ങോട്ട് ജീവിക്കാനുള്ള പ്രയത്‌നമായിരുന്നു. ഒരുകാല്‍ നഷ്ടപ്പെട്ടത് വകവയ്ക്കാതെ രാമചന്ദ്രന്‍ കൃഷിയിടങ്ങളിലേക്ക് ഇറങ്ങി. പരസഹായമില്ലാതെ ഒറ്റക്കാലില്‍നിന്ന് മണ്ണുമായി മല്ലടിച്ച് വിളവ് കൊയ്തു. കൃഷിയുടെ സീസണ്‍ അവസാനിക്കുമ്പോള്‍ വെറുതെ വീട്ടിലിരിക്കാനും ഈ കര്‍ഷകന്‍ തയ്യാറായില്ല. ഈ അവസരങ്ങളില്‍ നഗരങ്ങളിലിറങ്ങി കൂലിപ്പണികളില്‍ മുഴുകി. അതും വെപ്പുകാലിന്റെ പോലും സഹായമില്ലാതെ. ഇങ്ങനെ സമ്പാദിച്ച പണത്തിലൂടെ രണ്ട് പെണ്‍മക്കളെയും നല്ല നിലയില്‍ വിവാഹം കഴിച്ചയക്കാന്‍ രാമചന്ദ്രനായി.
ഒരുകാലത്ത് മരണത്തെ സ്വപ്‌നം കണ്ട ഈ കര്‍ഷകന്‍, സമാന സാഹചര്യങ്ങളിലൂടെ കടന്നുപോകുന്ന രാജ്യത്തെ നിരവധിപ്പേര്‍ക്ക് പ്രതീക്ഷയുടെ വെളിച്ചം സമ്മാനിക്കുന്നു. രാമചന്ദ്രന്റെ കഥ ഒരു ദേശിയ മാധ്യമമാണ് റിപ്പോര്‍ട്ട് ചെയ്തത്. ഒരു പ്രതിസന്ധിവരുമ്പോള്‍ തോല്‍ക്കാന്‍ ആര്‍ക്കും കഴിയും എന്നാല്‍ അതിജീവിക്കാനാണ് കഴിവും സാമര്‍ത്ഥ്യവും കാണിക്കേണ്ടതെന്ന് ഇദ്ദേഹം ജീവിതം കൊണ്ട് കാണിച്ച് തരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha