ബോളിവുഡ് താരം ഷാരൂഖ് ഖാനെതിരെ ബി.ജെ.പി നേതാക്കളുടെ ആക്രമണം തുടരുന്നു. രാജ്യത്ത് അസഹിഷ്ണുത നിലനില്‍ക്കുന്നുണ്ടെന്ന ആരോപിച്ച ഷാരൂഖ് പത്മശ്രീ അടക്കമുള്ള പുരസ്‌കാരങ്ങള്‍ തിരിച്ചുനല്‍കണമെന്ന് യോഗാ ഗുരു ബാബാ രാംദേവ്.
ശരിക്കുള്ള രാജ്യസ്‌നേഹി ആണെങ്കില്‍ പത്മശ്രീക്കൊപ്പം കിട്ടിയ പണവും തിരിച്ചുകൊടുക്കാന്‍ ഷാരൂഖ് ഖാന്‍ തയ്യാറാകണം. ഈ പണം പ്രധാനമന്ത്രിയുടെ ദുരിതാശ്വാസനിധിയിലേക്ക് സംഭാവന ചെയ്യണമെന്നും അദ്ദേഹം പറഞ്ഞു.
രാജ്യത്ത് കടുത്ത അസഹിഷ്ണുത നിലനില്‍ക്കുന്നുണ്ടെന്ന് തന്റെ ജന്മദിനാഘോഷ പരിപാടിക്കിടെ ഷാരൂഖ് ഖാന്‍ പറഞ്ഞിരുന്നു. ഇതിനെതിരെ നിരവധി ബി.ജെ.പി നേതാക്കള്‍ രംഗത്തെത്തി. ഇന്ത്യയിലാണ് ജീവിക്കുന്നതെങ്കിലും, ഷാരൂഖ് ഖാന്റെ ഹൃദയം പാകിസ്താനിലാണെന്ന് ബി.ജെ.പി ജനറല്‍ സെക്രട്ടറി കൈലാഷ് വിജയ് വര്‍ഗിയ പറഞ്ഞു. പിന്നീട്, സ്വന്തം പാര്‍ട്ടിയില്‍ നിന്നടക്കം എതിര്‍പ്പുകള്‍ വന്നതിനെ തുടര്‍ന്ന് വിജയ് വര്‍ഗിയ തന്റെ ട്വീറ്റ് പിന്‍വലിക്കുകയും ഖേദം പ്രകടിപ്പിക്കുകയുമായിരുന്നു.
ബി.ജെ.പി എം.പി ആദിത്യനാഥ് യോഗി ഷാരൂഖ് ഖാനെ മുംബൈ തീവ്രവാദ ആക്രമണക്കേസിലെ സൂത്രധാരകന്‍ ഹാഫിസ് സഈദുമായിട്ടാണ് താരതമ്യം ചെയ്തത്. ഷാരൂഖ് ഖാന്‍ പാകിസ്താന്‍ ഏജന്റാണെന്ന് വിശ്വഹിന്ദു പരിഷത്ത് നേതാവ് സാധ്വി പ്രാഞ്ചി പറഞ്ഞു.
അതേസമയം, മുസ്‌ലിമായതിന്റെ പേരില്‍ ഷാരൂഖ് ഖാനെ ലക്ഷ്യം വെയ്ക്കരുതെന്ന് ശിവസേന നിലപാടെടുത്തു. ഇന്ത്യയിലെ ന്യൂനപക്ഷങ്ങള്‍ സഹിഷ്ണുത ഉള്ളവരാണെന്നും ശിവസേന എം.പി സഞ്ജീവ് റോത്ത് പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha