പുതിയ പാര്‍ലമെന്റ് മന്ദിരത്തിന്റെ ഉദ്ഘാടനം മേയ് 28-ന് പ്രധാനമന്ത്രി നരേന്ദ്രമോദി നിര്‍വഹിക്കും. നിര്‍മാണ ജോലികള്‍ പൂര്‍ത്തിയായ പശ്ചാത്തലത്തില്‍ ലോക്സഭാ സ്പീക്കര്‍ ഓം ബിര്‍ള പ്രധാനമന്ത്രിയെ നേരില്‍ സന്ദര്‍ശിച്ച് ഉദ്ഘാടനത്തിന് ക്ഷണിച്ചു.

ആത്മനിര്‍ഭര്‍ ഭാരതിനെ പ്രതീകവത്കരിക്കുന്നതാണ് പുതിയ പാര്‍ലമെന്റ് മന്ദിരമെന്ന് ലോക്സഭാ സെക്രട്ടേറിയറ്റ് പത്രക്കുറിപ്പില്‍ അറിയിച്ചു.

പഴയ പാര്‍ലമെന്റ് മന്ദിരം 1927-ല്‍ പണികഴിപ്പിച്ചതായിരുന്നു. അതില്‍ സ്ഥലപരിമിതി അനുഭവപ്പെട്ടിരുന്നുവെന്ന് പത്രക്കുറിപ്പില്‍ പറഞ്ഞു. ഇരുസഭകളിലും എം.പി.മാര്‍ക്ക് ഇരിപ്പിടങ്ങള്‍ ഒരുക്കാന്‍പോലും പരിമിതികളായിരുന്നു

2020 ഡിസംബര്‍ 10-നാണ് പുതിയ മന്ദിരത്തിന് പ്രധാനമന്ത്രി ശിലാസ്ഥാപനം നടത്തിയത്. റെക്കോഡ് സമയത്തിലാണ് പാര്‍ലമെന്റ് മന്ദിരം പണി കഴിപ്പിച്ചത്.


പുതിയ പാര്‍ലമെന്റ് മന്ദിരത്തിന്റെ ലോക്സഭാ ഹാളില്‍ 888 അംഗങ്ങള്‍ക്ക് ഇരിക്കാനുള്ള സൗകര്യങ്ങളുണ്ട്. രാജ്യസഭാ ഹാളില്‍ 300 അംഗങ്ങള്‍ക്കുമിരിക്കാം. ഇരുസഭകളുടെയും സംയുക്ത സമ്മേളനം ലോക്സഭാ ചേംബറിലാകും നടക്കുക. പഴയ മന്ദിരത്തില്‍ ലോക്സഭയില്‍ 543 പേര്‍ക്കും രാജ്യസഭയില്‍ 250 പേര്‍ക്കുമാണ് ഇരിക്കാന്‍ സൗകര്യമുണ്ടായിരുന്നത്. ഇപ്പോള്‍ 1280 എം.പി.മാര്‍ക്കുവരെ പങ്കെടുക്കാനാവും.