ഞായറാഴ്ച നടക്കുന്ന മെഡിക്കല്‍ പ്രവേശനത്തിനായുള്ള നീറ്റ് യുജി പുനഃപരീക്ഷയ്ക്കായി എല്ലാവിധ സജ്ജീകരണങ്ങളും പൂര്‍ത്തിയായതായി എന്‍ടിഎ വാര്‍ത്താക്കുറിപ്പില്‍ വ്യക്തമാക്കി. പരീക്ഷ നടക്കുന്നതിന്റെ ഭാഗമായി നാളെ രാജ്യവ്യാപകമായി മോക്ക് ഡ്രില്‍ സംഘടിപ്പിക്കുമെന്ന് നാഷണല്‍ ടെസ്റ്റിംഗ് ഏജന്‍സി അറിയിച്ചു. സുരക്ഷാ പരിശോധനയുടെ ഭാഗമായാണ് മോക്ഡ്രില്‍ സംഘടിപ്പിക്കുന്നത്. പരീക്ഷാ സാമഗ്രികള്‍ അതീവ സുരക്ഷിതമായി കേന്ദ്രങ്ങളില്‍ എത്തിക്കാന്‍ ജില്ലാ ഭരണകൂടങ്ങള്‍, പൊലീസ് സേന, പ്രത്യേക എസ്‌കോര്‍ട്ട് സംഘങ്ങള്‍ എന്നിവരെ ചുമതലപ്പെടുത്തിയിട്ടുണ്ട്.

ഞായറാഴ്ച ഉച്ചയ്ക്ക് രണ്ട് മണി മുതല്‍ വൈകിട്ട് 5.15 വരെയാണ് പരീക്ഷ നടക്കുക. ഓഫ്‌ലൈന്‍ രീതിയിലാണ് പരീക്ഷ. ഇന്ത്യയിലെ 551 നഗരങ്ങളിലും വിദേശത്തെ 14 നഗരങ്ങളിലുമായി 22.79 ലക്ഷത്തിലധികം ഉദ്യോഗാര്‍ത്ഥികളാണ് ഇത്തവണ പുനഃപരീക്ഷ എഴുതുന്നത്. ഭിന്നശേഷി വിഭാഗത്തില്‍പ്പെട്ട അര്‍ഹരായ ഉദ്യോഗാര്‍ത്ഥികള്‍ക്ക് വൈകിട്ട് 6:20 വരെ പരീക്ഷ എഴുതാന്‍ സമയം അനുവദിക്കും.