രാജ്യത്തെ നടുക്കിയ ഡല്‍ഹി കൂട്ടമാനഭംഗം നടന്നിട്ട് മൂന്ന് വര്‍ഷം തികഞ്ഞിട്ടും തങ്ങള്‍ക്ക് നീതി ലഭിച്ചിട്ടില്ലെന്ന് പീഡനത്തിനിരയായ പെണ്‍കുട്ടിയുടെ അമ്മ. തന്റെ മകളുടെ പേരും അമ്മ വെളിപ്പെടുത്തി. എന്റെ മകളുടെ പേര് ജ്യോതി സിംഗ്, അവളുടെ പേര് വെളിപ്പെടുത്തുന്നതില്‍ തനിക്ക് യാതൊരു വിധത്തിലുള്ള നാണക്കേടുമില്ലെന്നും അവര്‍ പറഞ്ഞു.

പ്രതികളില്‍ ഏറ്റവും പ്രായം കുറഞ്ഞയാളെ മോചിപ്പിക്കുന്നതിനെതിരെ അവര്‍ ശക്തമായ ഭാഷയില്‍ രംഗത്തുവന്നു. വേദിയില്‍ അഛന്‍ ബദ്‌രി നാഥുമുണ്ടായിരുന്നു. ഡല്‍ഹി കൂട്ടബലാത്സംഗത്തിന് ഇന്ന് മൂന്നു വര്‍ഷം പൂര്‍ത്തിയാകുന്നു എനിക്കറിയില്ല അയാള്‍ക്ക് 16 വയസാണോ 18 ആണോ എന്ന്, കുറ്റം നിഷ്ഠൂരമാകുമ്പോള്‍ ശിക്ഷക്ക് പ്രായപരിധി കണക്കാക്കരുത് ആശാ ദേവി പറഞ്ഞു.

നമുക്ക് എന്ത് നീതിയാണ് കിട്ടിയത്? അവളുടെ മരണത്തിന്റെ മൂന്നാം വാര്‍ഷികത്തില്‍ കുറ്റവാളികള്‍ സ്വതന്ത്രരാകാന്‍ പോകുന്നു. ഇതില്‍ എവിടെയാണ് നീതി അവര്‍ ചോദിച്ചു. പ്രായപൂര്‍ത്തിയായ കുറ്റവാളിയെ മറ്റുള്ളവരേപ്പോലെ തന്നെ പരിഗണിക്കണമെന്ന ആവശ്യം നടിയും ബി.ജെ.പി എംപിയുമായ ഹേമമാലിനി പാര്‍ലമെന്റിലുയര്‍ത്തി. ഇയാളാണ് ഏറ്റവും നിഷ്ഠൂരമായി പെരുമാറിയത്.

ദുര്‍ഗുണപരിഹാര പാഠശാലയിലൂടെ നേരേയാക്കാനാകില്ല. അയാളെ ശിക്ഷിച്ചാല്‍ എല്ലാവര്‍ക്കും രാജ്യത്തെ നിയമത്തെ പേടിയുണ്ടാകും. രാജ്യം മുഴുവന്‍ ചിന്തിക്കുന്നത് ഇങ്ങനെയാണ് ഹേമമാലിനി പറഞ്ഞു. ഇപ്പോള്‍ 21 വയസ്സായ പ്രതിയെ തുടര്‍ന്നും നിരീക്ഷണത്തില്‍ വെക്കാന്‍ ഡല്‍ഹി ഹൈക്കോടതി ഉത്തരവിട്ടിരുന്നു. ഇയാളെ മോചിപ്പിക്കുന്നതിന് മുമ്പ് പുനരധിവാസം സംബന്ധിച്ച് വ്യക്തത വരുത്തണമെന്ന് സര്‍ക്കാര്‍ ആവശ്യപ്പെട്ടിരുന്നു. കുറ്റകൃത്യം നടക്കുമ്പോള്‍ 18 വയസ്സ് തികയാത്ത ഇയാള്‍ക്ക് മൂന്ന് വര്‍ഷം ശിക്ഷയാണ് നല്‍കിയത്.

പ്രായത്തിന്റെ പേരില്‍ പ്രതിക്ക് ശിക്ഷ ഇളവ് ചെയ്ത് കിട്ടുന്നത് സംബന്ധിച്ച ചര്‍ച്ചകളിലേക്ക് വിധി നയിച്ചിരുന്നു. 2012 ഡിസംബര്‍ 16ന് ഡല്‍ഹിയില്‍ ഓടുന്ന ബസില്‍വച്ചായിരുന്നു വിദ്യാര്‍ത്ഥിനിയെ ഒരു സംഘം ക്രൂരമായി ബലാത്സംഗം ചെയ്തത്. ഒപ്പമുണ്ടായിരുന്ന സുഹൃത്തിനെ മര്‍ദ്ദിച്ച് അവശനാക്കിയ ശേഷം ബസിലുണ്ടായിരുന്ന ആറ് പേരും അവരെ ബലാത്സംഗം ചെയ്തു.

പിന്നീട് വഴിയരികില്‍ ഉപേക്ഷിച്ച അവര്‍ 13 ദിവസത്തിന് ശേഷം മരിച്ചു. ഇതേത്തുടര്‍ന്ന് ഡല്‍ഹിയില്‍ യുവാക്കളുടെ നേതൃത്വത്തില്‍ നടന്ന ജനകീയപ്രക്ഷോഭത്തിന്റെ അവസാന ദിവസങ്ങളില്‍ ജ്യോതിയെ സിംഗപ്പൂരില്‍ കൊണ്ടുപോയി ചികിത്സിച്ചെങ്കിലും ജീവന്‍ രക്ഷിക്കാനായില്ല. മരണമെത്തുന്നവരെ ധീരതയോടെ നീതിക്കുവേണ്ടി പോരാടിയ അവരെ രാജ്യം നിര്‍ഭയ എന്നു പേരിട്ടു വിളിച്ചു. ആറുപേരില്‍ ഒരു പ്രതി കസ്റ്റഡിയില്‍ മരിച്ചു. നാല് പേര്‍ക്ക് വധശിക്ഷ വിധിച്ചു. പ്രായപൂര്‍ത്തിയായയാളെ വിട്ടയക്കുന്നത് സംബന്ധിച്ച വിവാദം തുടരുകയാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha