കേന്ദ്രസര്‍ക്കാരിന്റെ സ്വച്ഛഭാരതം പദ്ധതിക്ക് ലോകബാങ്ക് നൂറ്റിയന്‍പത് കോടി ഡോളര്‍ വായ്പ അനുവദിച്ചു. എല്ലാ പൗരന്മാര്‍ക്കും ശുചിത്വത്തിനുള്ള അവകാശം ലഭ്യമാക്കാനും 2019-ഓടെ എല്ലാവര്‍ക്കും ശുചിമുറികള്‍ സാദ്ധ്യമാക്കാനും വേണ്ടിയുള്ള പദ്ധതിക്കാണ് ലോക ബാങ്ക് വായ്പ അനുവദിച്ചത്.

2014-ല്‍ ഗാന്ധിജയന്തി ദിനത്തില്‍ ആരംഭിച്ച സ്വച്ഛ ഭാരതം പദ്ധതിയ്ക്ക് ജനങ്ങളില്‍ നിന്ന് നല്ല പ്രതികരണമാണ് ലഭിച്ചത്. മഹാത്മാ ഗാന്ധിയുടെ നൂറ്റിയന്‍പതാം ജന്മവാര്‍ഷികമായ 2019 ആകുമ്പോഴേക്കും ഗ്രാമ നഗര വ്യത്യാസമില്ലാതെ ശുചിത്വ ഭാരതം സാദ്ധ്യമാക്കുക എന്നതാണ് പദ്ധതിയുടെ ലക്ഷ്യം .

രാജ്യത്ത് സംഭവിക്കുന്ന പത്ത് മരണങ്ങളില്‍ ഒന്ന് ശുചിത്വത്തിന്റെ അഭാവത്താലാണെന്ന് കണ്ടെത്തിയതിനെ തുടര്‍ന്നാണ് കേന്ദ്ര സര്‍ക്കാര്‍ ഈ പദ്ധതി ആവിഷ്‌കരിച്ചത്. ശുചിത്വ സംവിധാനങ്ങള്‍ സാദ്ധ്യമാക്കുന്നതിനൊപ്പം മനോനിലയിലുള്ള മാറ്റവും പദ്ധതിയുടെ ലക്ഷ്യമാണ് . ഭാരത സര്‍ക്കാരിനൊപ്പം സഹകരിക്കുന്നത് അഭിമാനമായി കരുതുന്നുവെന്ന് ലോക ബാങ്ക് സൗത്ത് ഏഷ്യാ റീജിയണ്‍ വൈസ് പ്രസിഡന്റ് അനറ്റെ ഡിക്‌സണ്‍ വ്യക്തമാക്കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha