ഉത്തരകാശിയിൽ തുരങ്കത്തിനുള്ളിൽ കുടുങ്ങിയ 41 തൊഴിലാളികളെ പുറത്തെത്തിക്കാനുള്ള രക്ഷാപ്രവർത്തനം വഴിത്തിരിവിലേക്ക്. ആറ് ഇഞ്ച് വീതിയുള്ള പൈപ്പ് കുടുങ്ങിയ തൊഴിലാളികളുടെ അടുത്തേക്കെത്തുന്നു. കുടുങ്ങിക്കിടക്കുന്ന തൊഴിലാളികൾക്ക് വേണ്ട പോഷകാഹാരം പ്ലാസ്റ്റിക് കുപ്പികളിലൂടെ എത്തിക്കാനാണ് ഉദ്യോഗസ്ഥർ ആലോചിക്കുന്നത്.കുടുങ്ങിക്കിടക്കുന്ന തൊഴിലാളികൾ നേരിടുന്ന വെല്ലുവിളി നിറഞ്ഞ സാഹചര്യങ്ങൾ കണക്കിലെടുത്ത്, അവരുടെ പോഷകാഹാര ആവശ്യങ്ങൾ പരിഹരിക്കുന്നതിന് പ്രത്യേക ഡയറ്റ് പ്ലാൻ ആവിഷ്കരിക്കുന്നതിന് ഉദ്യോഗസ്ഥർ മെഡിക്കൽ വിദഗ്ധരുമായി കൂടിയാലോചിന നടത്തുകയും ചെയ്തു. കുടുങ്ങിയവരെ പുറത്തെടുക്കാൻ രക്ഷാപ്രവർത്തകർ ഘട്ടം ഘട്ടമായുള്ള പദ്ധതി ആസൂത്രണം ചെയ്തിട്ടുണ്ട്. തുടക്കത്തിൽ, സീൽ ചെയ്ത കുപ്പികളിൽ പഴങ്ങൾക്കൊപ്പം ലഘുഭക്ഷണവും പൈപ്പിലൂടെ അയയ്ക്കും.

കൂടാതെ ആശയവിനിമയം നിലനിർത്താൻ ചാർജർ ഘടിപ്പിച്ച ഫോൺ അയക്കുമെന്നും അധികൃതർ അറിയിച്ചു.അതേസമയം തുരങ്ക വിദഗ്ധരുടെ അന്താരാഷ്ട്ര സംഘം സ്ഥലത്തെത്തി. ഇന്റർനാഷണൽ ടണലിംഗ് ആൻഡ് അണ്ടർഗ്രൗണ്ട് സ്പേസ് അസോസിയേഷൻ പ്രസിഡന്റ് അർനോൾഡ് ഡിക്സും രക്ഷാപ്രവർത്തനത്തിന് മേൽനോട്ടം വഹിക്കുന്നുണ്ട്. രക്ഷാപ്രവർത്തനം ഒമ്പതാം ദിവസത്തിലേക്ക് കടന്നതോടെ ഇനി ഒട്ടും വൈകരുതെന്ന നിലപാടിലാണ് അധികൃതർ.'ഞങ്ങൾ ആ തൊഴിലാളികളെ പുറത്തെത്തിക്കാൻ പോകുകയാണ്. വലിയ ജോലിയാണ് ഇവിടെ നടക്കുന്നത്. ഞങ്ങളുടെ മുഴുവൻ ടീമും ഇവിടെയുണ്ട്. ഇതുവരെ രക്ഷപ്പെട്ടവരും രക്ഷപ്പെടുത്തുന്നവരും സുരക്ഷിതരാണ്', അർനോൾഡ് ഡിക്സ് വാർത്താ ഏജൻസിയായ എഎൻഐയോട് പറഞ്ഞു.'ലോകം മുഴുവൻ സഹായിക്കുന്നു. അതിശയകരമായ ടീമാണ് ഇവിടെയുള്ളത്.

ജോലി വളരെ ചിട്ടയായാണ് നടക്കുന്നത്. തൊഴിലാളികൾക്ക് ഭക്ഷണവും മരുന്നുകളും കൃത്യമായി നൽകുന്നുണ്ട്,' അദ്ദേഹം കൂട്ടിച്ചേർത്തു.ഓയിൽ ആൻഡ് നാച്ചുറൽ ഗ്യാസ് കോർപ്പറേഷൻ (ഒഎൻജിസി) ചാർ ധാം റൂട്ടിലെ സിൽക്യാര തുരങ്കത്തിന്റെ ബാർകോട്ട് അറ്റത്ത് ലംബ ഡ്രില്ലിംഗ് ചുമതല ഏറ്റെടുത്തിരുന്നു. അതിന്റെ ഒരു ഭാഗം നവംബർ 12 ന് ആണ് തകർന്നത്. ഒഎൻജിസി ഡ്രില്ലിംഗ് മേധാവി തിങ്കളാഴ്ച സ്ഥലം സന്ദർശിക്കുകയും അടുത്ത ദിവസം തന്നെ റിപ്പോർട്ട് സമർപ്പിക്കുകയും ചെയ്യുമെന്നാണ് പ്രതീക്ഷിക്കുന്നത്. ഒഎൻജിസി റിപ്പോർട്ടിന്റെ അടിസ്ഥാനത്തിൽ ബോർഡർ റോഡ്സ് ഓർഗനൈസേഷൻ (ബിആർഒ) നവംബർ 22-ന് റോഡിന്റെ അലൈൻമെന്റ് അന്തിമമാക്കും.സിൽക്യാരയുടെ ഒരറ്റത്ത് വെർട്ടിക്കൽ ഡ്രില്ലിംഗിനായി റെയിൽ വികാസ് നിഗം ലിമിറ്റഡിനെ (ആർവിഎൻഎൽ) ചുമതലപ്പെടുത്തിയിട്ടുണ്ട്.

ആകെ പ്ലാൻ ചെയ്ത 1,150 മീറ്ററിൽ തുരങ്കത്തിലേക്കുള്ള പ്രവേശന റോഡിന്റെ 970 മീറ്ററും ബിആർഒ ഞായറാഴ്ച പൂർത്തിയാക്കി.ബാക്കിയുള്ള ദൂരം തിങ്കളാഴ്ചയോടെ പൂർത്തിയാക്കാനാകുമെന്നാണ് പ്രതീക്ഷ. വൈദ്യുത കണക്ഷനുവേണ്ടി ആർവിഎൻഎൽ അപേക്ഷ നൽകിയിട്ടുണ്ട്. ഇത് ജില്ലാ ഭരണകൂടം പരിശോധിക്കുകയാണ്. നവംബർ 26ന് ലംബ ഡ്രില്ലിംഗ് പൂർത്തിയാകുമെന്ന് വൃത്തങ്ങൾ അറിയിച്ചു.പ്രത്യേക ഉപകരണങ്ങൾ ഉപയോഗിച്ച് 170 മീറ്റർ ടണൽ നിർമ്മിക്കാനും ആർവിഎൻഎൽ പദ്ധതിയിട്ടിട്ടുണ്ടെന്നും അത് നവംബർ 21-ന് സൈറ്റിലെത്തുമെന്നും അവർ കൂട്ടിച്ചേർത്തു. നവംബർ 23-ന് എല്ലാ സജ്ജീകരണവും പൂർത്തിയാകുമെന്നാണ് ആർവിഎൻഎല്ലിന്റെ പ്രതീക്ഷ. ഇതിനിടെ റീസൈക്ലിംഗ് ഓപ്ഷനുകൾ ഉപയോഗിച്ച് ജലസ്രോതസ്സുകൾ കണ്ടെത്തി. സംസ്ഥാന സർക്കാർ പൈപ്പ് ഉപയോഗിക്കുന്നതിന് ജില്ലാ മജിസ്ട്രേറ്റിന്റെ അനുമതി ആവശ്യമാണ്.

സ്ഥലം വിലയിരുത്തലും തൊഴിലാളികളെ സംഘടിപ്പിക്കുന്നതും പൂർത്തിയാക്കിയതിന് ശേഷം 483 മീറ്റർ ടണൽ നിർമാണം ടിഎച്ച്ഡിസി ഇന്ത്യ ലിമിറ്റഡിനെ ഏൽപ്പിച്ചതായി വൃത്തങ്ങൾ അറിയിച്ചു. തിങ്കളാഴ്ച മുതൽ ടണൽ ബോറിംഗ് ആരംഭിക്കും.നാഷണൽ ഹൈവേസ് ആൻഡ് ഇൻഫ്രാസ്ട്രക്ചർ ഡെവലപ്മെന്റ് കോർപ്പറേഷൻ ലിമിറ്റഡിന് (എൻഎച്ച്‌ഐഡിസിഎൽ) തുരങ്കം ബലപ്പെടുത്താനും രക്ഷപ്പെടാനുള്ള പാത നിർമിക്കാനുമുള്ള ചുമതലയുണ്ടെന്ന് വൃത്തങ്ങൾ അറിയിച്ചു. അടിയന്തര സേവനങ്ങൾക്കായി അവശിഷ്ടങ്ങൾക്കിടയിലൂടെ 150 എംഎം സ്റ്റീൽ പൈപ്പ് സ്ഥാപിക്കുകയാണ്. അതിനുള്ള മൂന്നാമത്തെ ശ്രമമാണ് നടക്കുന്നത്.