പൊതുമേഖലാ ബാങ്കുകളില്‍ സ്ഥാനകയറ്റത്തിന് സംവരണം വേണ്ടെന്ന് സുപ്രീംകോടതി. പട്ടിക വിഭാഗങ്ങള്‍ക്ക് സംവരണം വേണമെന്ന മദ്രാസ് ഹൈക്കോടതി ഉത്തരവ് ശരിവെച്ച സുപ്രീംകോടതിയുടെ മുന്‍ ഉത്തരവ് ഡിവിഷന്‍ ബെഞ്ച് റദ്ദാക്കി. പൊതുമേഖലാ ബാങ്കുകളില്‍ പട്ടിക ജാതിവര്‍ഗ വിഭാഗത്തില്‍പ്പെട്ട ഉദ്യോഗസ്ഥര്‍ക്ക് സ്ഥാനക്കയറ്റം അനുവദിക്കാന്‍ വ്യവസ്ഥയില്ലെന്ന് ചൂണ്ടിക്കാട്ടിയാണ് ജസ്റ്റിസ് ജെ. ചെലമേശ്വറും ജസ്റ്റിസ് എ.കെ സിക്രിയും അടങ്ങുന്ന ഡിവിഷന്‍ ബെഞ്ചിന്റെ സുപ്രധാന വിധി. 

പൊതുമേഖലാ ബാങ്കുകളില്‍ പട്ടിക ജാതിവര്‍ഗ വിഭാഗക്കാരുടെ പ്രാതിനിധ്യം വളരെ കുറവാണ് എന്നത് ഒരു യാഥാര്‍ഥ്യമാണ്. സംവരണത്തിന്റെ കാര്യത്തില്‍ സര്‍ക്കാരും ബാങ്കുകളുമാണ് തീരുമാനം എടുക്കേണ്ടത്. സംവരണം ഏര്‍പ്പെടുത്തിയാല്‍ അത് ഏതുതലം വരെ വേണമെന്നുള്ളത് ബന്ധപ്പെട്ടവര്‍ക്ക് തീരുമാനിക്കാമെന്നും സുപ്രീംകോടതി വ്യക്തമാക്കി.
പൊതുമേഖലാ ബാങ്കുകളില്‍ ഗ്രേഡ് ഒന്ന് മുതല്‍ ആറ് വരെയുള്ള പദവികളില്‍ പട്ടിക വിഭാഗങ്ങള്‍ക്ക് സംവരണം നല്‍കണമെന്നാണ് മദ്രാസ് ഹൈക്കോടതിയുടെ വിധി. ഈ വിധിക്കെതിരെ പൊതുമേഖലാ ബാങ്കുകള്‍ സമര്‍പ്പിച്ച ഹര്‍ജി തള്ളിയ സുപ്രീംകോടതി 2015ല്‍ കീഴ്‌കോടതി വിധി ശരിവെച്ചിരുന്നു.

എന്നാല്‍, കേന്ദ്രസര്‍ക്കാറിന്റെ പുന:പരിശോധനാ ഹര്‍ജിയിലൂടെ സുപ്രീംകോടതിയുടെ മുന്‍ വിധി തിരുത്തുകയാണ് ഡിവിഷന്‍ ബെഞ്ച് ചെയ്തത്. ഒരിക്കല്‍ തെറ്റുപറ്റിയാല്‍ അത് അംഗീകരിച്ച് തിരുത്തേണ്ടതും ഇത്തരം പുന:പരിശോധനാ ഹര്‍ജികള്‍ അനുവദിക്കേണ്ടതുമാണെന്നും കോടതി വ്യക്തമാക്കി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha