അഭിനയത്തിനു താല്‍ക്കാലിക വിരാമമിട്ട് രാഷ്ട്രീയത്തില്‍ തന്റെ പൂര്‍ണ ശ്രദ്ധകേന്ദ്രീകരിക്കുമെന്ന് ദളപതി വിജയ്. ഇതുവരെ കരാറായിരിക്കുന്ന സിനിമകള്‍ പൂര്‍ത്തിയാക്കിയ ശേഷം അഭിനയത്തിനു താല്‍ക്കാലിക വിരാമമിട്ട് രാഷ്ട്രീയത്തില്‍ തന്നെ തന്റെ പൂര്‍ണ ശ്രദ്ധകേന്ദ്രീകരിക്കുമെന്നും നടന്‍ ഔദ്യോഗികമായി പുറത്തുവിട്ട കത്തില്‍ പറയുന്നുണ്ട്. ഇതോടെ ഇപ്പോള്‍ ചിത്രീകരിച്ചുകൊണ്ടിരിക്കുന്ന വെങ്കട് പ്രഭുവിന്റെ ദ് ഗ്രേറ്റസ്റ്റ് ഓഫ് ഓള്‍ ടൈം എന്ന ചിത്രത്തിനു ശേഷം വരുന്ന വിജയ് ചിത്രമാകും ദളപതി 69.

എന്നാല്‍ ഈ സിനിമ ആരു ചെയ്യുമെന്നതില്‍ ഔദ്യോഗിക സ്ഥിരീകരണം ഉണ്ടായിട്ടില്ല. ആര്‍ആര്‍ആര്‍ സിനിമയുടെ നിര്‍മാതാക്കളായ ഡിവിവി ദനയ്യ നിര്‍മിക്കുന്ന പുതിയ ചിത്രത്തില്‍ വിജയ് നായകനായെത്തുമെന്ന് റിപ്പോര്‍ട്ടുകളുണ്ടായിരുന്നു. എന്നാല്‍ സംവിധായകന്‍ ആരെന്ന കാര്യത്തില്‍ വ്യക്തമല്ല. അതുകൊണ്ടുതന്നെ വിജയ് സിനിമ വിടുന്നു എന്നത് ആരാധകരെ സംബന്ധിച്ച് നിരാശ ഉണ്ടാക്കുന്ന വാര്‍ത്തയാണ്. രാഷ്ട്രീയത്തിലേക്കിറങ്ങുന്നതിന്റെ ചെറിയ നിരാശ അദ്ദേഹത്തിന്റെ ആരാധകരിലും പ്രകടമാണ്.

'തമിഴ് വെട്രി കഴകം' എന്നാണ് വിജയ് പാര്‍ട്ടിയ്ക്ക് പേര് നല്‍കിയിരിക്കുന്നത്. കഴിഞ്ഞയാഴ്ച ചെന്നൈയില്‍ നടന്ന യോഗത്തില്‍ തന്റെ ഫാന്‍സ് ക്ലബ്ബായ വിജയ് മക്കള്‍ ഇയക്കം രാഷ്ട്രീയ പാര്‍ട്ടി രൂപീകരണത്തിന് അനുമതി നല്‍കിയതിന് പിന്നാലെയാണ് പ്രഖ്യാപനം.

2026ലെ നിയമസഭാ തിരഞ്ഞെടുപ്പില്‍ മത്സരിച്ച് വിജയിക്കുകയും ജനങ്ങള്‍ ആഗ്രഹിക്കുന്ന അടിസ്ഥാനപരമായ രാഷ്ട്രീയ മാറ്റം കൊണ്ടുവരികയുമാണ് ഞങ്ങളുടെ ലക്ഷ്യമെന്നും വിജയ് വ്യക്തമാക്കി. രാഷ്ട്രീയം എനിക്ക് മറ്റൊരു കരിയര്‍ മാത്രമല്ല. അതൊരു പവിത്രമായ ജനങ്ങളുടെ പ്രവൃത്തിയാണ്. വളരെക്കാലമായി ഞാന്‍ അതിനായി സ്വയം തയ്യാറെടുക്കുകയാണ്. രാഷ്ട്രീയം എനിക്കൊരു ഹോബിയല്ല. അതാണ് എന്റെ അഗാധമായ ആഗ്രഹം. അതില്‍ പൂര്‍ണ്ണമായി ഇടപെടാന്‍ ഞാന്‍ ആഗ്രഹിക്കുന്നുവെന്നും വിജയ് പറഞ്ഞു.