പൊതുമേഖല ബാങ്കുകളില്‍ ഉദ്യോഗക്കയറ്റത്തിനു സംവരണം പാടില്ലെന്നു സുപ്രീം കോടതി. ബാങ്കുകളിലെ ഉയര്‍ന്ന തസ്തികകളിലുള്ള ജോലിയില്‍ പട്ടികജാതി, പട്ടികവര്‍ഗ വിഭാഗങ്ങള്‍ക്കു സംവരണം ഏര്‍പ്പെടുത്തുന്ന രീതിയാണു സുപ്രീം കോടതി റദ്ദാക്കിയത്. ഉദ്യോഗക്കയറ്റത്തിനു സംവരണം ആകാമെന്ന നിലപാടു ശരിവച്ച വിധി റിവ്യൂ ഹര്‍ജിയിലൂടെയാണു സുപ്രീം കോടതി തിരുത്തിയത്. ജസ്റ്റീസുമാരായ ജെ. ചെലമേശ്വര്‍, എ.കെ സിക്രി എന്നിരവടങ്ങിയ ഡിവിഷന്‍ ബെഞ്ചിന്റേതാണ് പുതിയ ഉത്തരവ്. 
ബാങ്കുകളില്‍ ഗ്രേഡ് ഒന്നു മുതല്‍ ഗ്രേഡ് ആറു വരെയുള്ള തസ്തികകളില്‍ പട്ടികവിഭാഗങ്ങള്‍ക്കു സംവരണം അംഗീകരിച്ച മദ്രാസ് ഹൈക്കോടതിയുടെ ഉത്തരവാണു സുപ്രീം കോടതി റദ്ദാക്കിയത്. മുന്‍പ് ഹൈക്കോടതി ഉത്തരവിനെതിരേ പൊതുമേഖല ബാങ്കുകള്‍ സുപ്രീം കോടതിയെ സമീപിച്ചെങ്കിലും കീഴ്‌ക്കോടതിയുടെ ഉത്തരവ് ശരിവച്ച സുപ്രീംകോടതി ബാങ്കുകളുടെ ഹര്‍ജി തള്ളുകയായിരുന്നു. ഈ വിധിയാണ് കഴിഞ്ഞ ദിവസം റിവ്യൂ ഹര്‍ജി അനുവദിച്ച് സുപ്രീം കോടതി തന്നെ തിരുത്തിയത്. ഇക്കാര്യത്തില്‍ ബാങ്കുകള്‍ക്കും സര്‍ക്കാരിനും തീരുമാനമെടുക്കാമെന്നും കോടതി വ്യക്തമാക്കി.
ക്ലര്‍ക്ക് തസ്തികയില്‍ നിന്ന് ഓഫീസര്‍ തസ്തിക വരെയുള്ള സ്ഥാനക്കയറ്റത്തിന് കേന്ദ്ര സര്‍ക്കാരിലെ സംവരണ വ്യവസ്ഥകളാണ് പൊതുമേഖലാ ബാങ്കുകളും പിന്തുടരുന്നത്. എന്നാല്‍, ഉയര്‍ന്ന ഓഫീസര്‍ തസ്തികയില്‍ നിന്നു മറ്റൊന്നിലേക്കുള്ള സ്ഥാനക്കയറ്റത്തില്‍ സംവരണം പാലിക്കുന്നതിനു നിലവില്‍ ചട്ടങ്ങളില്ലാത്തതിനാല്‍ തെരഞ്ഞെടുപ്പിലൂടെയാണ് ഈ തസ്തികകളില്‍ ഒഴിവു നികത്തിയിരുന്നത്. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha