ഈ ലോക്സഭാ തിരഞ്ഞെടുപ്പില്‍ പ്രതിപക്ഷമായ ഇന്ത്യാ മുന്നണി അധികാരത്തില്‍ വന്നാലുള്ള തന്റെ '10 ഗ്യാരണ്ടികള്‍' കേജ്രിവാള്‍ പ്രഖ്യാപിച്ചു. ഞായറാഴ്ച ഡല്‍ഹിയില്‍ വാര്‍ത്താ സമ്മേളനത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

''ഇന്ന് ഞങ്ങള്‍ ലോക്സഭാ തിരഞ്ഞെടുപ്പ് 2024 നുള്ള 'കേജ്രിവാളിന്റെ 10 ഗ്യാരണ്ടികള്‍' പ്രഖ്യാപിക്കാന്‍ പോകുകയാണ്. എന്റെ അറസ്റ്റിനെത്തുടര്‍ന്ന് ഇത് വൈകി. പക്ഷേ തിരഞ്ഞെടുപ്പിന്റെ നിരവധി ഘട്ടങ്ങള്‍ ഇനിയും അവശേഷിക്കുന്നുണ്ട്. 'മറ്റ് ഇന്ത്യാ മുന്നണി പങ്കാളികളുമായി ഇതുവരെ ഈ ഉറപ്പുകളെക്കുറിച്ച് ചര്‍ച്ച ചെയ്തിട്ടില്ലെന്നും എന്നാല്‍ ആര്‍ക്കും ഇതില്‍ ഒരു പ്രശ്‌നവും ഉണ്ടാകില്ലെന്ന് പ്രതീക്ഷിക്കുന്നതായും അദ്ദേഹം പറഞ്ഞു.

'ഇന്ത്യ സഖ്യം അധികാരത്തില്‍ വന്നതിന് ശേഷം ഈ ഗ്യാരണ്ടികള്‍ നടപ്പിലാക്കുമെന്ന് ഞാന്‍ ഉറപ്പ് നല്‍കുന്നു.' അദ്ദേഹം പറഞ്ഞു.

രാജ്യത്ത് 24 മണിക്കൂര്‍ വൈദ്യുതി, സൗജന്യ വിദ്യാഭ്യാസം, ചൈനയില്‍ നിന്ന് ഭൂമി തിരിച്ചുപിടിക്കല്‍, ഡല്‍ഹിക്ക് സംസ്ഥാന പദവി തുടങ്ങിയ നടപടികള്‍ 10 ഗ്യാരന്റികളില്‍ ഉള്‍പ്പെടുന്നു.

'ഞങ്ങള്‍ രാജ്യത്ത് 24 മണിക്കൂറും വൈദ്യുതി നല്‍കും. രാജ്യത്തിന് 3 ലക്ഷം മെഗാവാട്ട് വൈദ്യുതി ഉല്‍പ്പാദിപ്പിക്കാനുള്ള ശേഷിയുണ്ട്, എന്നാല്‍ ഉപയോഗം 2 ലക്ഷം മെഗാവാട്ട് മാത്രമാണ്. നമ്മുടെ രാജ്യത്തിന് ആവശ്യത്തേക്കാള്‍ കൂടുതല്‍ വൈദ്യുതി ഉത്പാദിപ്പിക്കാന്‍ കഴിയും. ഡല്‍ഹിയിലും പഞ്ചാബിലും ഞങ്ങള്‍ ഇത് ചെയ്യും, എല്ലാ ദരിദ്രര്‍ക്കും 200 യൂണിറ്റ് വരെ സൗജന്യ വൈദ്യുതി നല്‍കും, പക്ഷേ ഞങ്ങള്‍ക്ക് അത് ക്രമീകരിക്കാം.''അദ്ദേഹം പറഞ്ഞു.

എല്ലാവര്‍ക്കും നല്ലതും മികച്ചതുമായ സൗജന്യ വിദ്യാഭ്യാസം ഞങ്ങള്‍ ഒരുക്കും. സ്വകാര്യ സ്‌കൂളുകളേക്കാള്‍ മികച്ച വിദ്യാഭ്യാസം സര്‍ക്കാര്‍ സ്‌കൂളുകള്‍ നല്‍കും. ഇതിനായി 5 ലക്ഷം കോടി രൂപ വേണ്ടിവരും. സംസ്ഥാന സര്‍ക്കാരുകള്‍ 2.5 ലക്ഷം കോടി രൂപയും കേന്ദ്ര സര്‍ക്കാര്‍ 2.5 കോടി രൂപയും ഇതിനായി നല്‍കും.'' കേജ്രിവാള്‍ കൂട്ടിച്ചേര്‍ത്തു.

കേജ്രിവാളിന്റെ 10 ഗ്യാരണ്ടികള്‍:

1 വൈദ്യുതിയുടെ ഗ്യാരണ്ടി: രാജ്യത്തുടനീളം ആദ്യത്തെ 200 യൂണിറ്റുകള്‍ സൗജന്യമായി 24 മണിക്കൂര്‍ വൈദ്യുതി വിതരണം.

2 വിദ്യാഭ്യാസത്തിന്റെ ഉറപ്പ്: എല്ലാവര്‍ക്കും സൗജന്യ വിദ്യാഭ്യാസത്തിനുള്ള സംവിധാനം ഒരുക്കുമെന്നും സര്‍ക്കാര്‍ സ്‌കൂളുകളെ സ്വകാര്യ സ്‌കൂളുകളേക്കാള്‍ മികച്ചതാക്കുമെന്നും വാഗ്ദാനം.

3 ആരോഗ്യത്തിന്റെ ഉറപ്പ്: സ്വകാര്യ ആശുപത്രികള്‍ക്ക് തുല്യമായി സര്‍ക്കാര്‍ ആശുപത്രികളില്‍ അടിസ്ഥാന സൗകര്യങ്ങളും സൗകര്യങ്ങളും ഒരുക്കും.

4 ചൈനയില്‍ നിന്ന് ഭൂമി തിരിച്ചു പിടിക്കുമെന്ന ഉറപ്പ് : ഇന്ത്യയുടെ ഭൂമി ചൈനയില്‍ നിന്ന് മോചിപ്പിക്കും, സൈന്യത്തിന് സ്വതന്ത്ര കൈ നല്‍കും.

5 അഗ്‌നിവീര്‍ പദ്ധതി അവസാനിപ്പിക്കുമെന്ന ഉറപ്പ്: മോദി സര്‍ക്കാര്‍ ആരംഭിച്ച അഗ്‌നിവീര്‍ പദ്ധതി നിര്‍ത്തലാക്കുന്നു.

6 എംഎസ്പിയുടെ ഉറപ്പ്: കര്‍ഷകര്‍ക്ക് പൂര്‍ണ താങ്ങുവില ലഭിക്കും.

7 സംസ്ഥാന പദവി ഉറപ്പ്: ഡല്‍ഹിക്ക് പൂര്‍ണ സംസ്ഥാന പദവി ഉറപ്പാക്കും.

8 തൊഴിലുറപ്പ്: പ്രതിവര്‍ഷം 2 കോടി തൊഴിലവസരങ്ങള്‍ സൃഷ്ടിക്കാന്‍ പദ്ധതിയിടുന്നു.

9 അഴിമതിക്കെതിരെ ഗ്യാരണ്ടി: അഴിമതിക്കാര്‍ക്ക് സുരക്ഷിതത്വം നല്‍കുന്ന നയം ഒഴിവാക്കി രാജ്യത്തെ അഴിമതിയില്‍ നിന്ന് മോചിപ്പിക്കുമെന്ന വാഗ്ദാനം.

10 ജിഎസ്ടിയുടെ ഗ്യാരണ്ടി: ചരക്ക് സേവന നികുതി (ജിഎസ്ടി) ലഘൂകരിക്കാനുള്ള പദ്ധതികള്.