രാജ്യത്തെ തേടിയെത്തിയ മറ്റൊരു അപകടം!!!!  ആ വിപത്തിനെ കുറിച്ച് കേന്ദ്ര ഏജൻസികൾ മുന്നറിയിപ്പ് നൽകി . സൈബർ തട്ടിപ്പുസംഘങ്ങൾക്കായി അനധികൃതമായി വൻതോതിൽ സിം കാർഡുകൾ സംഘടിപ്പിച്ചു കൈമാറുന്ന സംഘങ്ങൾ പ്രവർത്തിക്കുന്നുവെന്നാണ് മുന്നറിയിപ്പ് . ഈ തട്ടിപ്പിന്റെ രീതി,ഉപയോക്താക്കളിൽനിന്ന് ആവശ്യത്തിൽ കൂടുതൽ തവണ വിരലടയാളം പതിപ്പിച്ച് അവരറിയാതെ വിവിധ കമ്പനികളുടെ സിം കാർഡ് അനധികൃതമായി തട്ടിയെടുത്ത് സൈബർ തട്ടിപ്പുസംഘങ്ങൾക്കു വിൽക്കും.

വൻതോതിൽ സിം കാർഡ് വിൽക്കുന്ന 5 സ്ഥലങ്ങളുടെ വിവരങ്ങളും കേന്ദ്ര ഏജൻസികൾ കൈമാറി. ഇവിടങ്ങളിൽ അന്വേഷണം നടക്കുകയാണ്. വർക്കലയിൽ ഈ സംഭവുമായി ബന്ധപ്പെട്ടു ഒരു അറസ്റ്റ് രേഖപ്പെടുത്തി. അനധികൃതമായി സംഘടിപ്പിച്ച 250 സിം കാർഡുകൾ വിദേശ തട്ടിപ്പുസംഘങ്ങൾക്കു നൽകിയ കടയുടമയെ അറസ്റ്റ് ചെയ്തു. തൃശൂരിൽ ഉൾപ്പെടെ വിവിധ ഇടങ്ങളിലെ തട്ടിപ്പുകളെ കുറിച്ചുള്ള വിവരങ്ങൾ ഇത്തരത്തിൽ പുറത്ത് വന്നു.

13 മലയാളികൾ ചേർന്ന് കംബോഡിയയിൽ നടത്തുന്ന തട്ടിപ്പുസംഘത്തിനാണ് ഇൗ മൊബൈൽ നമ്പറുകൾ നൽകിയത് . സംഘത്തിലുൾപ്പെട്ട വർക്കല സ്വദേശിയെ കംബോഡിയയിൽനിന്ന് കഴിഞ്ഞ ദിവസമാണു തന്ത്രപൂർവം നാട്ടിലെത്തിച്ച് അറസ്റ്റ് ചെയ്തത്. ഇല്ലാത്ത പാഴ്സലിന്റെ പേരു പറഞ്ഞു സിബിഐയുടെയും കസ്റ്റംസിന്റെയും പേരിൽ വാട്സാപ് കോൾ വഴി തട്ടിപ്പ് നടത്തുന്നതായിരുന്നു കംബോഡിയ സംഘത്തിന്റെ രീതി.

മലപ്പുറത്തുനിന്ന് ഒരു കോടി രൂപ തട്ടിയ കേസിൽ കേരള പൊലീസ് കഴിഞ്ഞയാഴ്ച കർണാടകയിൽനിന്ന് പ്രതിയെ അറസ്റ്റ് ചെയ്തിരുന്നു. ഇയാൾ രാജ്യത്തെ സൈബർ തട്ടിപ്പുകളിലെ നിർണായക കണ്ണിയാണെന്നു കണ്ടെത്തി .