ലോക്‌സഭ തെരഞ്ഞെടുപ്പിലെ ആറാംഘട്ട വോട്ടെടുപ്പ് തുടങ്ങി. രാജ്യ തലസ്ഥാനമായ ഡല്‍ഹിയിലെ ഏഴിടങ്ങളില്‍ ഉള്‍പ്പെടെ രാജ്യത്തെ 58 മണ്ഡലങ്ങളിലാണ് പോളിങ് ആരംഭിച്ചത്.

ബിഹാര്‍-എട്ട്, ഹരിയാനയിലെ ആകെ പത്തുസീറ്റുകള്‍, ജമ്മു കശ്മീര്‍-ഒന്ന്, ഝാര്‍ഖണ്ഡ്-നാല്, ഒഡിഷ-ആറ്, യു.പി-14, പശ്ചിമ ബംഗാള്‍-എട്ട് മണ്ഡലങ്ങളിലുമാണ് വോട്ടെടുപ്പ് നടക്കുക.

889 സ്ഥാനാര്‍ഥികളാണ് മത്സരരംഗത്തുള്ളത്. ഇതില്‍ മുന്‍ മുഖ്യമന്ത്രിമാരായ മനോഹര്‍ലാല്‍ ഖട്ടജറും മെഹ്ബൂബ മുഫ്തിയും ഉള്‍പ്പെടുന്നു.
അനന്ത്‌നാഗ്-രജൗരി മണ്ഡലത്തില്‍ 20 സ്ഥാനാര്‍ഥികളുണ്ട്. നേരത്തെ, മേയ് ഏഴിന് നിശ്ചയിച്ച അനന്ത്‌നാഗിലെ വോട്ടെടുപ്പ് മാറ്റിവെക്കുകയായിരുന്നു. യു.പിയിലെ 14 മണ്ഡലങ്ങളില്‍ ആറാം ഘട്ട വോട്ടെടുപ്പ് നടക്കുമ്പോള്‍ അഅ്‌സംഗഢിലും ലാല്‍ഗഞ്ചിലും ഇന്‍ഡ്യക്ക് സാധ്യത. ഏറ്റവുമധികം മത്സരാര്‍ഥികള്‍ യു.പിയിലാണ്. 470 പേര്‍.

സുല്‍ത്താന്‍പൂരില്‍ കേന്ദ്ര മന്ത്രി മനേക ഗാന്ധിയും അഅ്‌സംഗഢില്‍ എസ്.പിയുടെ ധര്‍മേന്ദ്ര യാദവും ജയമുറപ്പിച്ചിരിക്കുകയാണ്.ഭോജ്പൂരി ഗായകന്‍ ദിനേശ് ലാല്‍ ആണിവിടെ ബി.ജെ.പിയുടെ സ്ഥാനാര്‍ഥി. പ്രതാപ്ഗഢ്, ഫുല്‍പൂര്‍, അലഹാബാദ്, അംബേദ്കര്‍ നഗര്‍, ശ്രാവസ്ഥി, ദുമരിയാഗഞ്ച്, ബസ്തി, സന്ത് കബീര്‍ നഗര്‍, ജോന്‍പൂര്‍, മച്‌ലിശഹര്‍, ഭദോയ് എന്നിവയാണ് മറ്റു മണ്ഡലങ്ങള്‍.ഏഴാമത്തെയും അവസാനത്തെയുമായ ഘട്ട വോട്ടെടുപ്പ് ജൂണ്‍ ഒന്നിനാണ്. വോട്ടെണ്ണല്‍ ജൂണ്‍ നാലിനാണ് .