കർണാടക സർക്കാരിനെ താഴെയിറക്കാൻ മൃഗബലി നടത്തിയെന്ന കർണാടക ഉപമുഖ്യമന്ത്രി ഡി കെ ശിവകുമാറിന്റെ ആരോപണത്തെ തള്ളി കണ്ണൂർ തളിപ്പറമ്പ് രാജരാജേശ്വര ക്ഷേത്രം ഭാരവാഹികൾ. ക്ഷേത്രത്തെ വിവാദത്തിലേക്ക് വലിച്ചിഴച്ചത് മോശമായിപ്പോയെന്നും മൃഗബലി പൂജയുള്ള ക്ഷേത്രമല്ല രാജരാജേശ്വര ക്ഷേത്രമെന്നും ഭാരവാഹികൾ പറഞ്ഞു. ക്ഷേത്ര പരിസരത്തും മൃഗബലി പൂജകൾ നടന്നിട്ടില്ലെന്നും ഭാരവാഹികൾ വ്യക്തമാക്കി.

തളിപ്പറമ്പിലെ രാജരാജേശ്വര ക്ഷേത്രത്തിൽ മൃഗബലി പൂജകളില്ല. മറ്റ് വഴിപാടുകളാണ് പ്രധാനം. ശത്രുസംഹാര പൂജയ്ക്ക് പ്രസിദ്ധം മാടായി ക്ഷേത്രമാണ്. നൂറുകണക്കിന് ശത്രുസംഹാര പൂജകൾ ഇവിടെ നടക്കാറുണ്ട്. അമാവാസി ദിവസം കർണാടകത്തിൽ നിന്ന് നിരവധി പേർ ഇവിടെ എത്താറുണ്ട്. കോഴിയിറച്ചി നിവേദ്യമാണ് പ്രധാനം. എന്നാൽ മൃഗബലി ഇവിടെയില്ല.

ക്ഷേത്രത്തിൽ ശിവകുമാർ പറഞ്ഞതുപോലുളള പൂജയും നടന്നിട്ടില്ല. എന്നാൽ ക്ഷേത്രത്തോട് അനുബന്ധിച്ചുളള പൂജാരിമാരിൽ ചിലർ വീടുകളിൽ പ്രത്യേക പൂജ നടത്താറുണ്ട്. അവിടെ ഇത്രയും വിപുലമായ മൃഗബലിയുൾപ്പെടെ നടന്നതായും വിവരമില്ല.

അനുബന്ധ വാർത്തകൾ
നേരത്തേ ദേവസ്വം മന്ത്രി കെ രാധാകൃഷ്ണനും ആരോപണത്തിനെതിരെ രംഗത്തെത്തിയിരുന്നു. കേരളത്തിൽ ഒരിക്കലും നടക്കാനിടയില്ലാത്ത കാര്യമാണിതെന്നും ഇത്തരത്തിൽ എന്തെങ്കിലുമുണ്ടോയെന്ന് അന്വേഷിക്കുമെന്നുമാണ് മന്ത്രി വാർത്താക്കുറിപ്പിൽ അറിയിച്ചത്.

കേരളത്തിലെ ഒരു രാജരാജേശ്വര ക്ഷേത്രത്തിന് സമീപം വച്ച് ശത്രുഭൈരവ എന്ന പേരിൽ നടത്തിയ യാഗത്തിൽ 52 മൃഗങ്ങളെ ബലി നൽകിയെന്നാണ് ഡികെയുടെ ആരോപണം. കണ്ണൂരിലാണ് മൃഗബലി നടന്നതെന്ന തരത്തിൽ അഭ്യൂഹങ്ങൾ പ്രചരിച്ചെങ്കിലും അത്തരമൊരു സംഭവമുണ്ടായിട്ടില്ലെന്നാണ് വിവരം.

ഡികെ ശിവകുമാറിൻ്റെ മൃഗബലി ആരോപണം
തന്നെയും മുഖ്യമന്ത്രി സിദ്ധരാമയ്യയെയും ലക്ഷ്യമിട്ട് ഈയിടെ കേരളത്തിലെ ഒരു ക്ഷേത്രത്തിൽ നടന്ന മൃഗബലിയെ കുറിച്ച് തനിക്ക് വിവരം ലഭിച്ചതായി കർണാടക ഉപമുഖ്യമന്ത്രി ഡികെ ശിവകുമാർ അവകാശപ്പെട്ടു. വ്യാഴാഴ്ച മാധ്യമങ്ങളെ അഭിസംബോധന ചെയ്ത ശിവകുമാർ തൻ്റെ കൈത്തണ്ടയിൽ കെട്ടിയിരിക്കുന്ന ഒരു വിശുദ്ധ ചരടിനെക്കുറിച്ച് സംസാരിച്ചു. ദുഷിച്ച കണ്ണുകളെ തടയാനാണ് ഇത് കെട്ടിയിട്ടുള്ളതെന്നും അദ്ദേഹം പറഞ്ഞു.

"എനിക്കും നമ്മുടെ സർക്കാരിനുമെതിരെ കേരളത്തിൽ ഗൂഢാലോചന നടക്കുന്നുണ്ട്. എനിക്കെതിരെ ചില 'പൂജയും' നടക്കുന്നുണ്ട്. ആരാണ് ഈ പൂജ നടത്തുന്നതെന്നും എവിടെയാണ് ഇത് നടത്തുന്നതെന്നും വ്യക്തമായി അറിയാം." അദ്ദേഹം പറഞ്ഞു. കർണാടകയിൽ നിന്നുള്ളവരാണെ് ഇതിന് പിന്നിൽ എന്നാരോപിച്ച അദ്ദേഹം ഇത്തരം ആചാരങ്ങൾ നടത്തുന്നവരെ കുറിച്ച് തനിക്ക് അറിവുണ്ടെന്നും അവകാശപ്പെട്ടു.

"എനിക്കും മുഖ്യമന്ത്രിക്കും എതിരെയാണ് ഇത് ചെയ്യുന്നത്. കേരളത്തിലെ രാജരാജേശ്വരി ക്ഷേത്രത്തിന് സമീപം ശത്രുക്കളെ ഇല്ലാതാക്കാൻ 'ശത്രു ഭൈരവി യാഗം' (അഗ്നിബലി) നടത്തുന്നു. 'പഞ്ചബലി' (അഞ്ച് ബലിവസ്തുക്കൾ) സമർപ്പിക്കുന്നു. ചുവന്ന ആട്, 21 എരുമകൾ, മൂന്ന് കറുത്ത ആടുകൾ, അഞ്ച് പന്നികൾ എന്നിവയുമായി അഗ്നിയാഗത്തിൻ്റെ ഫലമായി ശത്രുക്കൾ 'അഘോരികളെ' (ഹിന്ദു സന്യാസിമാരുടെ ഒരു വിഭാഗം) സമീപിക്കുകയാണ്." അദ്ദേഹം പറഞ്ഞു.

ആചാരം ഇപ്പോഴും നടക്കുന്നുണ്ടെന്നും അതിൽ പങ്കെടുത്തവരിൽ നിന്ന് തനിക്ക് അതിനെക്കുറിച്ച് അപ്‌ഡേറ്റുകൾ ലഭിക്കുന്നുണ്ടെന്നും ശിവകുമാർ അവകാശപ്പെട്ടു. അതേസമയം, ഡി കെ ശിവകുമാറിൻ്റെ മൃഗബലി ആരോപണത്തിൽ വിവരശേഖരണത്തിനായി കർണാടക ഇൻ്റലിജൻസ് ഉദ്യോഗസ്ഥർ കണ്ണൂരിലെത്തി. അഞ്ചംഗ സംഘമാണ് അന്വേഷണത്തിനായി എത്തിയത്. പയ്യന്നൂരും തളിപ്പറമ്പും കേന്ദ്രീകരിച്ചാണ് അന്വേഷണം നടക്കുന്നത്.

ഡി.കെ ആരുടെയും പേര് പറഞ്ഞില്ലെങ്കിലും രാഷ്ട്രീയക്കാരൻ്റെ ആജ്ഞ പ്രകാരമാണ് ചടങ്ങുകൾ നടക്കുന്നതെന്ന് അദ്ദേഹം അവകാശപ്പെട്ടു.
"അത് അവരുടെ വിശ്വാസമാണ്, ഞാൻ അത് അവർക്ക് വിട്ടുകൊടുക്കുന്നു. അവർ ആഗ്രഹിക്കുന്നതെന്തും അവർ ശ്രമിക്കട്ടെ, പക്ഷേ നമ്മെ സംരക്ഷിക്കുന്ന ഉയർന്ന ഊർജ്ജം നമ്മോടൊപ്പമുണ്ട്." അദ്ദേഹം പറഞ്ഞു.