പശ്ചിമ ബംഗാളില്‍ മുഖ്യമന്ത്രി മമത ബാനര്‍ജിയുടെ നേതൃത്വത്തില്‍ തൃണമൂല്‍ കോണ്‍ഗ്രസിന്റെ മുന്നേറ്റം. 11 മണിയിലെ ലീഡ് നില അനുസരിച്ച് 30 സീറ്റില്‍ തൃണമൂല്‍ മുന്നേറുകയാണ്.

10 സീറ്റില്‍ ബിജെപി ലീഡ് ചെയ്യുകയാണ്. 42 ലോക്‌സഭാ സീറ്റുകളാണ് ബംഗാളിലുള്ളത്. സീറ്റ് വിഭജന ചര്‍ച്ചകള്‍ പരാജയപ്പെട്ടതോടെ ഇന്ത്യ മുന്നണിയും തൃണമൂലും വെവ്വേറെ സ്ഥാനാര്‍ത്ഥികളെ നിര്‍ത്തിയിരുന്നു.

കോണ്‍ഗ്രസിന്റെ അധിര്‍ രഞ്ജന്‍ ചൗധരി ബഹ്റാംപൂരില്‍ ലീഡ് ചെയ്യുന്നു. 2019 ല്‍ പാര്‍ട്ടി നേടിയ രണ്ട് സീറ്റുകളില്‍ ഒന്നാണിത്. മമതാ ബാനര്‍ജിയുടെ അനന്തരവന്‍ കൂടിയായ തൃണമൂല്‍ നേതാവ് അഭിഷേക് ബാനര്‍ജി ഡയമണ്ട് ഹാര്‍ബര്‍ സീറ്റില്‍ ലീഡ് ചെയ്യുന്നു.

തൃണമൂലിന്റെ മാലാ റോയ് കൊല്‍ക്കത്ത ദക്ഷിണ്‍ സീറ്റിലും സുദീപ് ബന്ദ്യോപാധ്യായ കൊല്‍ക്കത്ത ഉത്തര്‍ സീറ്റിലും മുന്നേറുന്നു. ബിജെപിയുടെ അഗ്‌നിമിത്ര പോളാണ് മേദിനിപൂര്‍ സീറ്റില്‍ ലീഡ് ചെയ്യുന്നത്. കല്‍ക്കട്ട ഹൈക്കോടതിയില്‍ നിന്ന് രാജിവെച്ച മുന്‍ ജഡ്ജി അഭിജിത് ഗംഗോപാധ്യായ തംലുകില്‍ ലീഡ് ചെയ്യുന്നു.