ലോക്‌സഭ തിരഞ്ഞെടുപ്പ് അന്തിമ ഫലം പുറത്തുവരുന്നതിന് പിന്നാലെ പ്രധാനമന്ത്രി നരേന്ദ്ര മോദി ബിജെപി ആസ്ഥാനത്തെത്തി. 'ജയ് ജഗന്നാഥ്' മന്ത്രം വിളിച്ചാണ് പ്രധാനമന്ത്രി പ്രവര്‍ത്തകരെ അഭിസംബോധന ചെയ്തത്. 147 അംഗ ഒഡീഷ നിയമസഭാ തിരഞ്ഞെടുപ്പില്‍ ബിജെപി മൃഗീയ ഭൂരിപക്ഷമാണ് നേടിയത്. പാര്‍ലമെന്റില്‍ എന്‍ഡിഎയ്ക്ക് മൂന്നാം തവണയും വോട്ട് ചെയ്തതിന് പ്രധാനമന്ത്രി മോദി പൊതുജനങ്ങളോടുള്ള നന്ദിയും അറിയിച്ചു. 'ഈ പുണ്യദിനത്തില്‍, എന്‍ഡിഎ മൂന്നാം തവണയും സര്‍ക്കാര്‍ രൂപീകരിക്കുന്നുവെന്ന് സ്ഥിരീകരിച്ചു.

ഞങ്ങള്‍ ജനങ്ങളോട് നന്ദിയുള്ളവരാണ്...,' പ്രധാനമന്ത്രി മോദി പറഞ്ഞു. എന്‍.ഡി.എയ്ക്ക് വന്‍വിജയം നല്‍കിയതിന് ആന്ധ്രപ്രദേശിലെ ജനതയ്ക്കും മോദി നന്ദി അറിയിച്ചു. തെലുങ്ക് ദേശം നേതാവ് ചന്ദ്രബാബു നായിഡു, പവന്‍ കല്യാണ്‍ എന്നിവരെ അദ്ദേഹം അഭിനന്ദിക്കുകയും ചെയ്തു. അതേസമയം ലോക്‌സഭാ തിരഞ്ഞെടുപ്പില്‍ വാരണാസി മണ്ഡലത്തില്‍ നിന്ന് പ്രധാനമന്ത്രി നരേന്ദ്രനോദി ഒന്നരലക്ഷം വോട്ടിന്റെ ഭൂരിപക്ഷത്തിലാണ് ജയിച്ചത്.

കഴിഞ്ഞ തവണത്തെ ഭൂരിപക്ഷത്തില്‍ വന്‍കുറവാണ് മോദിക്കുണ്ടായത്. എന്നാല്‍ ഉത്തര്‍പ്രദേശില്‍ അടക്കം ഇന്ത്യ സഖ്യത്തിന് വന്‍ നേട്ടം ഉണ്ടായി. അമേത്തിയില്‍ കേന്ദ്രമന്ത്രി സ്മൃതി ഇറാനി ഉള്‍പ്പെടെ പരാജയപ്പെടുകയും ചെയ്തു. തിരഞ്ഞെടുപ്പിലെ വന്‍മുന്നേറ്റത്തിന് പ്രവര്‍ത്തകര്‍ക്ക് കോണ്‍ഗ്രസ് അദ്ധ്യക്ഷന്‍ മല്ലികാര്‍ജുന്‍ ഖാര്‍ഗെയും രാഹുല്‍ ഗാന്ധിയും നന്ദി പറഞ്ഞിരുന്നു. ഇതിന് പിന്നാലെയാണ് മോദിയുടെ പ്രതികരണവും വരുന്നത്.