മിശ്ര വിവാഹം നടത്തിയതിന് സിപിഐഎം ഓഫീസ് അടിച്ചു തകര്‍ത്ത് പെണ്‍വീട്ടുകാര്‍. മിശ്ര വിവാഹം നടത്തിയതിന് തമിഴ്നാട്ടിലെ തിരുനെല്‍വേലിയിലാണ് സിപിഐഎം ഓഫീസ് തല്ലിത്തകര്‍ത്തത്. തിരുനെല്‍വേലി സ്വദേശികളായ യുവാവിന്റെയും യുവതിയുടെയും വിവാഹം ഇന്നലെ ഓഫിസില്‍ വച്ച് നടത്തിയിരുന്നു. ഇതില്‍ പ്രകോപിതരായ പെണ്‍വീട്ടുകാരാണ് ഓഫിസ് അടിച്ചു തകര്‍ത്തത്.

ജൂണ്‍ 13-ന് വിവാഹിതരായ വ്യത്യസ്ത ജാതികളില്‍പ്പെട്ട യുവ ദമ്പതികളെ മാര്‍ക്സിസ്റ്റ് പാര്‍ട്ടി പിന്തുണച്ചതിനെ എതിര്‍ത്ത ഒരു സംഘം രണ്ട് പാര്‍ട്ടി പ്രവര്‍ത്തകരെ ആക്രമിക്കുകയും ചെയ്തു. സംഭവവുമായി ബന്ധപ്പെട്ട് 10 പേരെ അറസ്റ്റ് ചെയ്തിട്ടുണ്ട്. വ്യത്യസ്ത ജീതിയില്‍പ്പെട്ടവരെ വിവാഹം കഴിക്കാന്‍ പാര്‍ട്ടി സഹായിച്ചതിനാല്‍ വെള്ളിയാഴ്ച തിരുനെല്‍വേലിയിലെ പാര്‍ട്ടി ഓഫീസ് ചില ഉയര്‍ന്ന ജാതിക്കാര്‍ തകര്‍ത്തുവെന്ന് സിപിഐ(എം) തമിഴ്നാട് ഘടകം ആരോപിച്ചിരുന്നു.

ജൂണ്‍ 13 ന് സിപിഐ എമ്മിന്റെയും തൊട്ടുകൂടായ്മ നിര്‍മ്മാര്‍ജ്ജന മുന്നണിയുടെയും സഹായത്തോടെ ആത്മാഭിമാന വിവാഹ ചടങ്ങിലാണ് മദന്‍ കുമാറും (28) ഉദയ ദാക്ഷായിണിയും (23) വിവാഹിതരായത്. അവരുടെ വീട്ടില്‍ നിന്ന് ഒളിച്ചോടിയെത്തിയ ദാക്ഷായിണി ഉയര്‍ന്ന ജാതിയില്‍പ്പെട്ടപ്പോള്‍ മദന്‍ പട്ടികജാതി വിഭാഗത്തില്‍ നിന്നുള്ളയാളാണ്.

വെള്ളിയാഴ്ച വിവാഹം രജിസ്റ്റര്‍ ചെയ്യുന്നതിനായി ഇരുവരും രജിസ്ട്രാര്‍ ഓഫീസില്‍ അപ്പോയിന്റ്‌മെന്റ് എടുത്തിരുന്നു, എന്നാല്‍ ദാക്ഷായിണിയുടെ കുടുംബാംഗങ്ങള്‍ വിവാഹം രജിസ്റ്റര്‍ ചെയ്യുന്നതില്‍ നിന്ന് തടയാന്‍ ശ്രമിച്ചു, തുടര്‍ന്ന് ദമ്പതികള്‍ പ്രാദേശിക സിപിഐ എം യൂണിറ്റിനോട് സംരക്ഷണം തേടി. ദാക്ഷായിണിയുടെ കുടുംബാംഗങ്ങള്‍ 25-ലധികം പേര്‍ ജില്ലാ കമ്മിറ്റി ഓഫീസിലേക്ക് അതിക്രമിച്ച് കയറി ഫര്‍ണിച്ചറുകള്‍ ഉള്‍പ്പെടെ നിരവധി വസ്തുക്കള്‍ നശിപ്പിക്കുകയും രണ്ട് പാര്‍ട്ടി പ്രവര്‍ത്തകരെ ആക്രമിക്കുകയും ചെയ്തതായി സിപിഐ എം സംസ്ഥാന സെക്രട്ടറി പറഞ്ഞു.

കുടുംബവുമായുള്ള പ്രശ്നം പരിഹരിക്കാന്‍ സിപിഐ(എം) പ്രാദേശിക ഘടകം ശ്രമിച്ചതായി തിരുനെല്‍വേലിയില്‍ നിന്നുള്ള മുതിര്‍ന്ന പോലീസ് ഉദ്യോഗസ്ഥന്‍ പറഞ്ഞു. ദാക്ഷായിനിയുടെ കുടുംബാംഗങ്ങള്‍ പാര്‍ട്ടി ഓഫീസിലെത്തി അത് നശിപ്പിച്ചതായി ഉദ്യോഗസ്ഥര്‍ പറഞ്ഞു. സംഭവസ്ഥലത്തെത്തിയ പൊലീസ് ഉദ്യോഗസ്ഥര്‍ ദാക്ഷായിണിയുടെ മാതാപിതാക്കളടക്കം 10 പേരെ അറസ്റ്റ് ചെയ്തു. മറ്റ് പ്രതികള്‍ക്കായി തിരച്ചില്‍ തുടരുകയാണെന്നും കൂടുതല്‍ അന്വേഷണം തുടരുകയാണെന്നും പോലീസ് അറിയിച്ചു. അക്രമികള്‍ക്കെതിരെ കര്‍ശന നിയമനടപടി സ്വീകരിക്കണമെന്ന് സിപിഐ സംസ്ഥാന സര്‍ക്കാരിനോട് ആവശ്യപ്പെട്ടു. അന്തര്‍ജാതി ദമ്പതികള്‍ക്ക് സംരക്ഷണവും പാര്‍ട്ടി ആവശ്യപ്പെട്ടിട്ടുണ്ട്.