യുജിസി നീറ്റ് പരീക്ഷയുമായി ബന്ധപ്പെട്ട വിദ്യാര്‍ത്ഥികളുടെ ആശങ്കകള്‍ ഉടന്‍ പരിഹരിക്കുമെന്ന് കേന്ദ്ര വിദ്യാഭ്യാസ വകുപ്പ് മന്ത്രി ധര്‍മേന്ദ്ര പ്രധാന്‍ പറഞ്ഞു. കുറ്റക്കാര്‍ക്കെതിരെ കര്‍ശന നടപടിയുണ്ടാകുമെന്നും വിദ്യാര്‍ത്ഥികളുടെ താത്പര്യം സംരക്ഷിക്കുമെന്നും അദ്ദേഹം മാധ്യമങ്ങളോട് പറഞ്ഞു. എന്‍ടിഎയുടെ സുതാര്യത ഉറപ്പാക്കാന്‍ വിദ്യാഭ്യാസ മന്ത്രാലയം പ്രത്യേക സമിതിയെ നിയോഗിച്ചതായും അദ്ദേഹം പറഞ്ഞു. ബീഹാറിലെ നീറ്റ് പേപ്പര്‍ ചോര്‍ച്ച ഒറ്റപ്പെട്ട സംഭവമാണെന്നും ഉദ്യോഗാര്‍ത്ഥികളുടെ ഭാവിയെ സര്‍ക്കാര്‍ തകര്‍ക്കില്ലെന്നും വിദ്യാഭ്യാസ മന്ത്രി പറഞ്ഞു.

യുജിസി നെറ്റ് പരീക്ഷാ നടത്തിപ്പിനെ കുറിച്ചുള്ള ആശങ്കകള്‍ കാരണം റദ്ദാക്കിയ പരീക്ഷകളുടെ പുതിയ തീയതികള്‍ ഉടന്‍ പ്രഖ്യാപിക്കുമെന്ന് വിദ്യാഭ്യാസ മന്ത്രാലയം (എംഒഇ) അറിയിച്ചു. 317 നഗരങ്ങളില്‍ 1,205 കേന്ദ്രങ്ങളിലായി 11 ലക്ഷത്തിലധികം ഉദ്യോഗാര്‍ത്ഥികളുള്ള യുജിസി നെറ്റ് പരീക്ഷ നടത്തി ഒരു ദിവസത്തിന് ശേഷമാണ് റദ്ദാക്കിയത്.

ജൂണ്‍ 18ന് നടത്തിയ പരീക്ഷയില്‍ വിട്ടുവീഴ്ച ഉണ്ടായേക്കാമെന്ന് സൂചിപ്പിക്കുന്ന വിവരങ്ങള്‍ നാഷണല്‍ ടെസ്റ്റിംഗ് ഏജന്‍സിക്ക് (എന്‍ടിഎ) ലഭിച്ചതിനെ തുടര്‍ന്നാണ് ബുധനാഴ്ച രാത്രി ഈ തീരുമാനമെടുത്തത്.
'പരീക്ഷയില്‍ വിട്ടുവീഴ്ചയുണ്ടാകാന്‍ സാധ്യതയുണ്ടെന്ന് മന്ത്രാലയം കണ്ടു. പരീക്ഷ റദ്ദാക്കാന്‍ മന്ത്രാലയം തീരുമാനിച്ചു. വിഷയം സിബിഐക്ക് വിട്ടിരിക്കുകയാണ്.' അടുത്ത തീയതി ഉടന്‍ പ്രഖ്യാപിക്കുമെന്ന് എംഒഇ ജോയിന്റ് സെക്രട്ടറി ഗോവിന്ദ് ജയ്സ്വാള്‍ വ്യാഴാഴ്ച പത്രസമ്മേളനത്തില്‍ പറഞ്ഞു.