ഉത്തരാഖണ്ഡിലെ രുദ്രപ്രയാഗില്‍ ബസ് അളകനന്ദ നദിയിലേക്ക് മറിഞ്ഞുണ്ടായ അപകടത്തില്‍ ഒരു മൃതദേഹം കൂടി കണ്ടെത്തി. രാജസ്ഥാന്‍ ഗോഗുണ്ട സ്വദേശി ലളിത് കുമാറിന്റെ മൃതദേഹമാണ് കണ്ടെത്തിയത്. ഇതോടെ മരണസംഖ്യ ആറായി. ബസ് മറിഞ്ഞ സ്ഥലത്ത് നിന്ന് 150 കിലോമീറ്റര്‍ അകലെ നിന്നാണ് മൃതദേഹം കണ്ടെത്തിയത്.

കഴിഞ്ഞ വ്യാഴാഴ്ചയാണ് അപകടം സംഭവിച്ചത്.. 18 പേരാണ് ബസിലുണ്ടായിരുന്നത്. ബസ് മുകളിലേക്ക് പോകുന്നതിനിടെ ഡ്രൈവര്‍ക്ക് നിയന്ത്രണം നഷ്ടപ്പെട്ട് നദിയിലേക്ക് മറിയുകയായിരുന്നു.

രാജസ്ഥാന്‍, ഗുജറാത്ത്, മഹാരാഷ്ട്ര, മധ്യപ്രദേശ് എന്നിവിടങ്ങളില്‍ നിന്ന് ബദരീനാഥിലേക്ക് തീര്‍ത്ഥാടകരുമായി പോയ 31 സീറ്റുള്ള ബസ്, രുദ്രപ്രയാഗിനും ഗൗച്ചറിനും ഇടയിലുള്ള ഘോള്‍തിറിന് സമീപത്ത് അളകനന്ദ നദിയിലേക്ക് വീഴുകയായിരുന്നു. അപകടത്തില്‍ ഇനിയും ആളുകളെ കണ്ടെത്താനായുണ്ട്. അവര്‍ക്കായുള്ള തിരച്ചില്‍ പുരോഗമിക്കുന്നു.