രാജ്യദ്രോഹക്കുറ്റം ചുമത്തപ്പെട്ട ജെഎന്യു വിദ്യാര്ഥി യൂണിയന് പ്രസിഡന്റ് കനയ്യ കുമാര് ഇന്ന് ജയില് മോചിതനാകും
രാജ്യദ്രോഹക്കുറ്റം ചുമത്തപ്പെട്ട ജെ എന് യു വിദ്യാര്ഥി യൂണിയന് പ്രസിഡന്റ് കനയ്യ കുമാര് ഇന്ന് ജയില് മോചിതനാകും. കനയ്യ കുമാറിന് ഡല്ഹി ഹൈക്കോടതി ഇന്നലെ ആറുമാസത്തെ ഇടക്കാല ജാമ്യം അനുവദിച്ചിരുന്നു. പട്യാലഹൗസ് കോടതി റിമാന്ഡ് ചെയ്ത കനയ്യ കുമാര് ഇപ്പോള് തിഹാര് ജയിലിലാണുള്ളത്.
ജെ.എന്.യു അധ്യാപകന്റെ ആള് ജാമ്യം, പതിനായിരം രൂപയുടെ ബോണ്ട് എന്നിവയാണ് കനയ്യ കുമാറിന്റെ ജാമ്യത്തിനായുള്ള ഉപാധികള്. കേസ് അന്വേഷണവുമായി സഹകരിക്കണമെന്നും രാജ്യദ്രോഹപരമെന്ന് വിളിക്കാനിടയുള്ള ഒരു പ്രവര്ത്തനങ്ങളിലും നേരിട്ടോ അല്ലാതെയോ പങ്കാളിയാകരുതെന്നും കനയ്യ കുമാറിനോട് ഡല്ഹി കോടതി നിര്ദേശിച്ചു. ക്യാംപസില് രാജ്യദ്രോഹപ്രവര്ത്തനങ്ങള് നടക്കുന്നില്ലെന്ന് വിദ്യാര്ഥി യൂണിയന് പ്രസിഡന്റ് എന്ന നിലയില് കനയ്യ കുമാര് ഉറപ്പാക്കണമെന്നും ജസ്റ്റിസ് പ്രതിഭാ റാണി ആവശ്യപ്പെട്ടു. കഴിഞ്ഞമാസം 12 നാണ് രാജ്യദ്രോഹക്കുറ്റം ചുമത്തി ഡല്ഹി പൊലീസ് കനയ്യ കുമാറിനെ അറസ്റ്റുചെയ്തത്. കോടതി ഉത്തരവ് തിരിച്ചടിയല്ലെന്നും തുടര്നിയമനടപടികള് ചര്ച്ചചെയ്ത് തീരുമാനിക്കുമെന്നും സ്പെഷ്യല് പബ്ലിക് പ്രോസിക്ക്യൂട്ടര് പറഞ്ഞു.
കഴിഞ്ഞ മാസം 9 ന് ജെ.എന്.യു ക്യാംപസില് നടന്ന അഫ്സല് ഗുരു അനുസ്മരണ പരിപാടിക്കിടെ വിദ്യാര്ഥികള് ഇന്ത്യാവിരുദ്ധ മുദ്രാവാക്യം മുഴക്കിയെന്നുമാണ് കേസ്. കനയ്യയുടെ ജാമ്യലഭിച്ചത് ശുഭവാര്ത്തയാണെന്നും ക്യാംപസ് സാധാരണ നിലയിലാകുമെന്നും ജെ.എന്.യു അധികൃതര് പ്രതികരിച്ചു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
